സിംഗപ്പൂരിലെ ഇടക്കാല പ്രസിഡന്റായി ഇന്ത്യന്‍ വംശജന്‍ ജെ.വൈ പിള്ളയെ നിയമിച്ചു. മുന്‍ സര്‍ക്കാര്‍ ഉദ്യോഗസ്ഥനും പ്രസിഡന്റിന്റെ ഉപദേശക സമിതി(സിപിഎ) ചെയര്‍മാനുമായിരുന്നു പിള്ള. സിംഗപ്പൂർ പ്രസിഡന്റ് വിദേശ സന്ദർശനങ്ങൾക്കായി പോകുമ്പോൾ ആക്ടിംഗ് പ്രസിഡന്റായി പ്രവർത്തിച്ച പരിചയമുണ്ട് പിള്ളയ്ക്ക്

പ്രസിഡന്റ് ടോണി ടാൻ കെംഗ് യാം സ്ഥാനമൊഴിഞ്ഞതിനെ തുടർന്നാണ് ജെ.വൈ പിള്ള പ്രസിഡന്റ് പദവിയിലെത്തിയത്. അടുത്ത പ്രസിഡന്റ് തിരഞ്ഞെടുപ്പ് വരെയാണ് ഇദ്ദേഹം പ്രസിഡന്റ് പദവിയിൽ തുടരുക. പ്രസിഡന്റ് സ്ഥാനത്തേക്ക് മത്സരമില്ലെങ്കിൽ സെപ്റ്റംബർ 13ന് പുതിയ പ്രസിഡന്റ് സ്ഥാനമേൽക്കും. തിരഞ്ഞെടുപ്പ് നടത്തേണ്ടിവന്നാല്‍ സെപ്റ്റംബര്‍ 23 വരെ പിള്ള പ്രസിഡന്റ് സ്ഥാനത്ത് തുടരും.

പ്രസിഡന്റ് സ്ഥാനം ഒഴിഞ്ഞു കിടന്നാൽ പ്രസിഡന്റിന്റെ ഉപദേശക സമിതി ചെയർമാനെയാണ് സിംഗപ്പൂരിൽ പ്രസിഡന്റ് സ്ഥാനത്തേക്ക് പരിഗണിക്കാറുള്ളത്. സിപിഎ ചെയര്‍മാന്‍, പാര്‍ലമെന്റ് സ്പീക്കര്‍ എന്നിവരാണ് സിംഗപ്പുരില്‍ ഇടക്കാല പ്രസിഡന്റ് സ്ഥാനത്തേക്ക് എത്തുന്നത്. 1991ന് ശേഷം ആദ്യമായാണ് പ്രസിഡന്റ് സ്ഥാനം ഒഴിഞ്ഞു കിടക്കുന്ന അവസ്ഥയുണ്ടാകുന്നത്.