മെക്സിക്കോയിൽ ചിഹ്വാഹ്വ പുനരധിവാസ കേന്ദ്രത്തിൽ വെടിവയ്പ്പ്. മയക്കുമരുന്നിന് അടിമകളായവരെതാമസിച്ചിരുന്ന കേന്ദ്രത്തിലാണ് ആക്രമണമുണ്ടായത്. ആക്രമണത്തിൽ 14 പേർ മരിച്ചു. എട്ട് പേർക്ക് പരിക്കേറ്റു. പ്രാദേശിക സമയം ചൊവ്വാഴ്ച രാത്രി 9.50നായിരുന്നു സംഭവം. പരിക്കേറ്റവരിൽ ഒരു സ്ത്രീ ഉൾപ്പെടെ അഞ്ച് പേരുടെ നില ഗുരുതരമാണ്. സംഭവസമയം 25 പേരാണ് പുനരധിവാസ കേന്ദ്രത്തിൽ ഉണ്ടായിരുന്നത്.

ഒരു സംഘം പുനരധിവാസ കേന്ദ്രത്തിലേക്ക് അതിക്രമിച്ചുകടന്ന് വെടിയുതിർക്കുകയായിരുന്നുവെന്ന് ചിഹ്വാഹ്വ അധികൃതർ പറഞ്ഞു. കഴിഞ്ഞ കുറേ കാലമായി നിരവധി ആക്രമണങ്ങളാണ് പുനരധിവാസകേന്ദ്രങ്ങൾക്കു നേരെ ഉണ്ടായിരിക്കുന്നത്. മയക്കുമരുന്നു കടത്തുകാർ തമ്മിലുള്ള വൈരാഗ്യമാണ് ആക്രമണത്തിനു പിന്നിലെന്നും അധികൃതർ പറഞ്ഞു.