പാക്കിസ്ഥാൻ ഭീകരതയെ അനുകൂലിക്കുന്ന നിലപാട് മാറ്റിയില്ലെങ്കിൽ കടുത്ത നടപടികൾ സ്വീകരിക്കുമെന്ന് യുഎസ്. ഇന്ത്യയിൽ നിന്നു ഭീഷണിയുണ്ടെന്ന് പറഞ്ഞുകൊണ്ട് പാക്കിസ്ഥാൻ ഭീകരർക്കു താവളമൊരുക്കുന്നതു തുടരുകയാണെന്നും ഉപരോധം അടക്കമുള്ള കർശന നടപടികളുണ്ടാകുമെന്നും യുഎസ് മുൻപും പറഞ്ഞിട്ടുണ്ട്. നയതന്ത്രതലത്തിൽ ഒറ്റപ്പെടുത്തിയും അമേരിക്കയുമായുള്ള നാറ്റോ ഇതര സഖ്യകക്ഷിയെന്ന സ്ഥാനം ഇല്ലാതാക്കുകയും ചെയ്യുമെന്നും ജിം മാറ്റിസ് വ്യക്തമാക്കി. പാക്ക്– ചൈന സാമ്പത്തിക ഇടനാഴിക്കെതിരെയും അദ്ദേഹം നിലപാടെടുത്തിരുന്നു.

ദക്ഷിണേഷ്യ, അഫ്ഗാനിസ്ഥാൻ വിഷയങ്ങളിൽ നിലപാട് വ്യക്തമാക്കി സംസാരിക്കുകയായിരുന്നു മാറ്റിസ്. ഭീകരതയ്ക്കെതിരെ നടപടിയെടുക്കാത്ത പാക്കിസ്ഥാനെക്കുറിച്ചു കോൺഗ്രസ് അംഗം റിക് ലാർസൻ ആശങ്കപ്പെട്ടപ്പോഴായിരുന്നു മാറ്റിസിന്റെ മറുപടി.

യുഎസിന്റെ വൻ സാമ്പത്തിക– സൈനിക സഹായങ്ങൾ സ്വീകരിക്കുമ്പോഴും ഭീകരസംഘടനകൾക്കു പാക്കിസ്ഥാൻ നൽകുന്ന സഹായങ്ങൾ തുടരുകയാണെന്ന് നേരത്തേ ട്രംപ് വിമർശിച്ചിരുന്നു. വിമർശനത്തിനു പിന്നാലെ പാക്കിസ്ഥാനുള്ള സാമ്പത്തിക–സൈനിക സഹായങ്ങൾ യു എസ് വെട്ടിക്കുറച്ചിരുന്നു.