പാൽ കുടിക്കാത്തതിന് അച്ഛൻ രാത്രിയിൽ വീടിന് പുറത്ത് നിറുത്തി ശിക്ഷിച്ച മൂന്ന് വയസുകാരിയെ കാണാതായി. സംഭവത്തെ തുടർന്ന് അച്ഛനെ പൊലീസ് അറസ്റ്റ് ചെയ്തു. ടെക്സാസ് സ്വദേശിയായ വെസ്ലി മാത്യൂസാണ് മകൾ ഷെറിനെ അസമയത്ത് പുറത്ത് നിറുത്തി ശിക്ഷിച്ചത്. കുട്ടിയുടെ ജീവൻ അപകടത്തിലാക്കുന്ന തരത്തിൽ പ്രവർത്തിച്ചതിന് വെസ്ലിക്കെതിരെ കേസെടുത്ത പൊലീസ് പിന്നീട് അയാളെ ജാമ്യത്തിൽ വിട്ടു.

ശനിയാഴ്ച പുലർച്ചെ മൂന്ന് മണിയോടെയാണ് സംഭവം. മകളോട് പാൽ കുടിക്കാൻ വെസ്ലി നിർദ്ദേശിച്ചെങ്കിലും കുട്ടി തയ്യാറായില്ല. ഇതോടെയാണ് ഷെറിനോട് വീടിന് പുറത്തെ മരച്ചുവട്ടിൽ ചെന്ന് നിൽക്കാൻ മാത്യൂസ് നിർദ്ദേശിച്ചത്. തുടർന്ന് മാത്യൂസ് വാതിൽ അടയ്ക്കുകയും ചെയ്തു. 15 മിനിട്ടിന് ശേഷം മാത്യൂസ് നോക്കുമ്പോൾ ഷെറിൻ മരച്ചുവട്ടിലുണ്ടായിരുന്നു.

പിന്നീടാണ് കുട്ടിയെ കാണാതായത്. ഉടൻ തന്നെ പൊലീസിൽ വിവരം അറിയിക്കുകയായിരുന്നു. കുട്ടിയെ നിറുത്തിയ മരത്തിന് സമീപത്ത് ചെന്നായയെ കണ്ടതായി മാത്യൂസ് പൊലീസിനോട് പറഞ്ഞു. മാത്യൂസിന്റെ പരാതിയിൽ പൊലീസ് അന്വേഷണം തുടങ്ങി.

ഇന്ത്യയിൽ ജനിച്ച ഷെറിനെ മാത്യൂസിന്റെ കുടുംബം ദത്തെടുക്കുകയായിരുന്നു. പോഷകാഹാരക്കുറവിനെ തുടർന്ന് പ്രത്യേക ഭക്ഷണമാണ് ഷെറിന് നൽകിവന്നത്.