മൊബൈൽ ഫോൺ ഇല്ലാതെ ജീവിക്കാൻ കഴിയാത്ത അവസ്ഥയാണ് ന്യൂജൻ പിള്ളേർക്ക്. എപ്പോഴും ഫോണിൽ നോക്കി നടക്കുകയാണ് യുവതലമുറയുടെ പതിവ്. എന്നാൽ ഇനി റോഡിലൂടെ മൊബൈലിൽ നോക്കി നടന്നാൽ പണികിട്ടും. റോഡിലൂടെ മൊബൈൽ ഫോണിൽ നോക്കിനടന്നാൽ പിഴയടക്കണം. അമേരിക്കൻ സംസ്ഥാനമായ ഹവായിയുടെ തലസ്ഥാനമായ ഹോണോലുലുവിൽ കഴിഞ്ഞദിവസം മുതലാണ് പുതിയ നിയമം നടപ്പാക്കിയത്.

ഈ നിയമം ലംഘിച്ചാൽ 2400 രൂപ പിഴയടക്കണം. അമേരിക്കയിൽ റോഡപകടങ്ങളിൽ കൂടുതൽ കാൽനടക്കാർ കൊല്ലപ്പെട്ടത് കഴിഞ്ഞവർഷമാണ്. ഇതേത്തുടർന്നാണ് പുതിയ നിയമം നടപ്പാക്കാൻ തീരുമാനിച്ചത്. ഏത് ഇലക്ട്രോണിക് ഉപകരണം നോക്കി നടന്നാലും കാൽനടക്കാർക്ക് പിഴശിക്ഷയുണ്ടാകും.

റോഡ് സുരക്ഷയുടെ കാര്യത്തിൽ വാഹനങ്ങളിൽ യാത്ര ചെയ്യുന്നവർക്കു മാത്രമല്ല കാൽനടയാത്രക്കാർക്കും പ്രധാന പങ്കുണ്ടെന്ന് ബോധ്യംവന്നതോടെയാണ് പുതിയ നിയമം നടപ്പാക്കാൻ തീരുമാനിച്ചതെന്നാണ് അധികാരികൾ പറയുന്നത്. 2016ൽ 5987 കാൽനടയാത്രക്കാരാണ് അമേരിക്കയിൽ കൊല്ലപ്പെട്ടത്. മുൻ വർഷത്തേതിനെ അപേക്ഷിച്ച് ഒൻപതു ശതമാനം വർധനവാണ് ഉണ്ടായത്.