മതസ്വാതന്ത്ര്യം ഉറപ്പു വരുത്താന്‍ ഇന്ത്യന്‍ എന്‍.ജി.ഒകള്‍ക്ക് അമേരിക്കയുടെ ധനസഹായം.
മതസ്വാതന്ത്ര്യം ഉറപ്പു വരുത്താന്‍ ഇന്ത്യന്‍ എന്‍.ജി.ഒകള്‍ക്ക് അമേരിക്കയുടെ ധനസഹായം. 3.25കോടി രൂപയാണ് മതപരമായ സംഘര്‍ഷവും വിവേചനവും കുറയ്ക്കുന്നതിന് സര്‍ക്കാരിതര എന്‍.ജി.ഒ.കള്‍ക്ക് അമേരിക്ക നല്‍കുന്നത്. യു.എസ് സ്‌റ്റേറ്റ് ഡിപ്പാര്‍ട്ട്‌മെന്റാണ് ഇക്കാര്യം പ്രഖ്യാപിച്ചത്. ഇന്ത്യയ്‌ക്കൊപ്പം ശ്രീലങ്കയ്ക്കും സമാന സഹായം ലഭിക്കും.
വലിയ തോതിലുള്ള അക്രമങ്ങളെ ലഘൂകരിക്കുന്നതിനും ന്യൂനപക്ഷങ്ങള്‍ക്കും ഭൂരിപക്ഷ സമുദായങ്ങള്‍ക്കുമിടയില്‍ പരിവര്‍ത്തന പരിപാടികള്‍ നടപ്പാക്കുകയും മുന്നറിയിപ്പ് സംവിധാനങ്ങള്‍ വികസിപ്പിക്കുകയും നടപ്പിലാക്കുകയും ചെയ്യുന്നവരായിരിക്കണം ഗ്രാന്റിനായി അപേക്ഷിക്കുന്ന എന്‍.ജി.ഒകളെന്ന് സ്‌റ്റേറ്റ് ഡിപ്പാര്‍ട്ട്‌മെന്റ് വ്യക്തമാക്കി. ഈ സംഘടനകള്‍ പൊതുസമൂഹത്തെ അവരുടെ അവകാശങ്ങളെകുറിച്ച് ബോധവത്കരിക്കുകയും പത്രപ്രവര്‍ത്തകര്‍ക്ക് നിയമസംരക്ഷണം നല്‍കുകയും വേണം. പ്രത്യേകിച്ച് മതന്യൂനപക്ഷങ്ങള്‍ക്ക്. മതസ്വാതന്ത്ര്യ ലംഘനങ്ങള്‍ രേഖപ്പെടുത്തുകയും അധികാരികളെ അറിയിക്കുകയും ചെയ്യണമെന്നും സ്‌റ്റേറ്റ് ഡിപ്പാര്‍ട്ട്‌മെന്റ് വ്യക്തമാക്കുന്നു. അമേരിക്കന്‍ സ്‌റ്റേറ്റ് ഡിപ്പാര്‍ട്ട്‌മെന്റിനൊപ്പം ബ്യൂറോ ഒഫ് ഡെമോക്രസി, ഹ്യൂമണ്‍ റൈറ്റ്‌സ് ആന്‍ഡ് ലേബര്‍ എന്നീ ഡിപ്പാര്‍ട്ട്‌മെന്റുകള്‍ ചേര്‍ന്നാണ് ഗ്രാന്റ് നല്‍കുക.
ഇന്ത്യയിലേയും ശ്രീലങ്കയിലേയും അപേക്ഷകരെ സ്‌ക്രീനിംഗ് നടത്തിയാകും യോഗ്യരായ എന്‍.ജി.ഒകളെ തിരഞ്ഞെടുക്കുക. നിലവില്‍ പാകിസ്ഥാന്‍, അഫ്ഗാനിസ്ഥാന്‍, ബംഗ്ലാദേശ്, നേപ്പാള്‍, കസാക്കിസ്ഥാന്‍, താജിക്കിസ്ഥാന്‍, കിര്‍ഗിസ്ഥാന്‍ എന്നീ രാജ്യങ്ങള്‍ക്ക് അമേരിക്ക ഇപ്രകാരം ഗ്രാന്റ് നല്‍കുന്നുണ്ട്.
https://www.facebook.com/Malayalivartha
