രണ്ടാഴ്ചത്തെ ദാമ്പത്യ ജീവിതത്തിനുശേഷം സമര്‍ എന്ന 28കാരി വിവാഹമോചനത്തിനായി കോടതിയെ സമീപിച്ചു. കാരണം കേട്ടവർ അമ്പരന്നു. വീട്ടിലെ ജോലികളെല്ലാം ഭർത്താവാണത്രേ ചെയ്യുന്നത്. ഭാര്യയെ ജോലികളൊന്നും ചെയ്യാൻ സമ്മതിക്കില്ല. വിവാഹം കഴിഞ്ഞശേഷമുള്ള വിശ്രമജീവിതം ഭാര്യ മടുത്തു. ഈജിപ്തിലാണ് സംഭവം.

ഭര്‍ത്താവ് തന്നെ വീട്ടുകാരിയുടെ റോള്‍ ഏറ്റെടുത്തുകഴിഞ്ഞാല്‍ തനിക്കെന്താണ് ചെയ്യാനാവുക എന്നാണ് സമറിന്റെ ചോദ്യം. സന്തോഷവാനായി വീട്ടുജോലികള്‍ ചെയ്യുന്ന ഭര്‍ത്താവിനെ നോക്കിയിരുന്ന് സമയം കളഞ്ഞ് മതിയായെന്നാണ് സമർ പറയുന്നത്. വിവാഹമോചനമല്ലാതെ മറ്റൊരു പോംവഴി ഇതിനില്ലെന്നും സമര്‍ പറയുന്നു.

'അദ്ദേഹം തന്നെ ഭക്ഷണം പാകം ചെയ്യും, വീട് വൃത്തിയാക്കും, വസ്ത്രങ്ങള്‍ അലക്കും. എന്നെ ഇതൊന്നും ചെയ്യാന്‍ അനുവദിക്കുന്നില്ല. ഹോട്ടല്‍ മുറിയിലെ അതിഥിയെപ്പോലെ ജീവിച്ച് എനിക്ക് മടുത്തു. ഇങ്ങനെയായാല്‍ ബോറടിച്ച്‌ ഞാന്‍ മരിച്ചുപോകും.' സമറിന്റെ പരാതിയില്‍ പറയുന്നു.

ന്യൂ കെയ്റോയിലെ കുടുംബക്കോടതിയിലാണ് സമര്‍ പരാതി സമര്‍പ്പിച്ചിരിക്കുന്നത്. 31കാരനായ ഭര്‍ത്താവിന് ടെക്സ്റ്റൈല്‍ ബിസിനസ്സാണ്. കടയിലെ ജോലികള്‍ തീര്‍ത്തശേഷമാണ് അദ്ദേഹം ഗൃഹനാഥയുടെ ഭരണം ഏറ്റെടുക്കുന്നത്. തിരക്കുകള്‍ കാരണം അടുക്കളയില്‍ കയറാനാവാത്ത ദിവസങ്ങളിൽ തലേന്ന് തന്നെ ഭക്ഷണം പാകം ചെയ്ത് വയ്ക്കും. ഫ്രിഡ്ജില്‍ നിന്ന് ഇതെടുത്ത് കഴിക്കുക മാത്രമാണ് സമറിന് ജോലി.