താബ്രിയ മേജഴ്സ് എന്ന പേര് ഇപ്പോൾ സമൂഹമാധ്യമങ്ങളിൽ നിറഞ്ഞുനിൽക്കുകയാണ്. താബ്രിയയുടെ ഫോട്ടോഷൂട്ടാണ് ഇപ്പോൾ വൈറലായിരിക്കുന്നത്. ലോകപ്രശസ്ത ബ്രാൻഡായ വിക്ടോറിയ സീക്രട്ടിനെതിരെയുള്ള പ്രതിഷേധമായാണ് താബ്രിയ ഫോട്ടോഷൂട്ട് നടത്തിയത്. ഈ കമ്പനിയുടെ പരസ്യമോഡലുകളെ അനുകരിച്ച് വിക്ടോറിയ സീക്രട്ടിന്റെ അടിവസ്ത്രങ്ങളണിഞ്ഞാണ് താബ്രിയയുടെ പ്രതിഷേധം.

സീറോ സൈസ് മോഡലുകളെ മാത്രം വിക്ടോറിയ എയ്ഞ്ചലുകളായി പരസ്യങ്ങളില്‍ അവതരിപ്പിക്കുന്ന കമ്പനിയുടെ നിലപാടിനെതിരെയാണ് താബ്രിയ രംഗത്തെത്തിയത്. അഴകളവുകളില്‍ സീറോ സൈസ് മാത്രമല്ല ഉള്ളതെന്നും മാംസളമായ ശരീരമുള്ളവര്‍ പോസ് ചെയ്താലും പരസ്യങ്ങള്‍ ഹിറ്റാകുമെന്നും അവകാശപ്പെട്ടായിരുന്നു താബ്രിയയുടെ ഫോട്ടോഷൂട്ട്.

ഈ ചിത്രങ്ങൾ താബ്രിയ തന്നെ ഇന്‍സ്റ്റഗ്രാമില്‍ പോസ്റ്റ് ചെയ്യുകയായിരുന്നു. ഇതോടെ നിരവധി പേരാണ് തബ്രിയയെ പിന്തുണച്ച്‌ രംഗത്തെത്തിയത്. 27,000ലധികം ലൈക്കുകളുമായി വൈറലായിരിക്കുകയാണ് തബ്രിയയുടെ ചിത്രങ്ങള്‍.

ലോകപ്രശസ്തമായ ഈ കമ്പനിക്കെതിരെ ആദ്യമായിട്ടല്ല ഒരു മോഡൽ പ്രതിഷേധിക്കുന്നത്. ഇതിനുമുൻപും ഇതേ ആരോപണവുമായി മോഡലുകള്‍ രംഗത്തെത്തിയിട്ടുണ്ട്. ആഷ്ലി ഗ്രഹാം എന്ന മോഡല്‍ പലതവണ വിക്ടോറിയ സീക്രട്ടിന്റെ പക്ഷപാത നിലപാടിനെതിരെ പ്രതികരിച്ചിട്ടുണ്ട്. സീറോ സൈസുള്ളവര്‍ മാത്രമാണോ അടിവസ്ത്രങ്ങള്‍ ധരിക്കുന്നതെന്ന ആഷ്ലിയുടെ ചോദ്യം അന്ന് ഏറെ ചര്‍ച്ച ചെയ്യപ്പെട്ട ഒന്നായിരുന്നു. #ImNoAngel എന്ന പേരില്‍ ഹാഷ്ടാഗുകളും ഓണ്‍ലൈനില്‍ പ്രചരിച്ചിരുന്നു.