ലണ്ടൻ; ബ്രിട്ടീഷ് രാജകുടുംബത്തിലെ അഞ്ചാം കിരീടാവകാശി ഹാരി രാജകുമാരന്റെ ഭാര്യയായി എത്തുന്നത് മൂന്നു വയസ് മുതിർന്ന രണ്ടാംകെട്ടുകാരി. അമ്മവഴി ആഫ്രിക്കൻ വംശജയും അച്ഛൻ വഴി ജർമൻ ബന്ധവുമുള്ള മെഗാൻ മെർക്കൽ എന്ന കാനഡകാരിയായ പുതിയ ‘’രാജകുമാരി’’യുടെ ജീവിത കഥ സിനിമയെ വെല്ലുന്ന നാടകീയതയും ഭാഗ്യത്തിന്റെ അകമ്പടിയോടെയുള്ള ഉയർച്ചകളും നിറഞ്ഞതാണ്. ഡയാന രാജകുമാരി അണിഞ്ഞ ഡയമണ്ട് റിങ് ഇനി മേഗൻ അണിയും.

തികച്ചും സാധാരണ കുടുംബത്തിൽ പിറന്ന് കഠിനാധ്വാനത്തിലൂടെ വളർന്ന മെർക്കൽ ഇനി കെൻസിംങ്ടൺ പാലസിലെയും ബക്കിംങ്ങാം കൊട്ടാരത്തിലെയും വിൻസർ കാസിലിലെയുമെല്ലാം ആഡംബരങ്ങളുടെ അവകാശിയായി വിരാജിക്കും.

കൊട്ടാരത്തിലെ മരുമകളാകുന്നതോടെ മെഗാന്റെ ഔദ്യോഗിക പദവി ‘’ഡച്ചസ് ഓഫ് സസെക്സ്’’ എന്നാകും.

ബ്രിട്ടീഷ് രാജകുടുംബത്തിലെ അഞ്ചാം കിരീടാവകാശിയാണ് ഹാരി രാജകുമാരൻ. വിവാഹം മേയിൽ. അടുത്തവർഷം വിവാഹം ഉണ്ടാകുമെന്ന് തിങ്കളാഴ്ച ഹാരിയുടെ പിതാവ് ചാൾസ് രാജകുമാരൻ വെളിപ്പെടുത്തിയതിനു തൊട്ടു പിന്നാലെയാണ് ഇന്നലെ വിവാഹത്തിന്റെ കൂടുതൽ വിശദാംശങ്ങൾ കെൻസിങ്ടൺ പാലസ് വൃത്തങ്ങൾ പുറത്തുവിട്ടത്. എലിസബത്ത് രാജ്ഞിയുടെ വസതിയായ വിൻസർ കൊട്ടാരത്തിലെ സെന്റ് ജോർജ് ചാപ്പലിൽ വച്ചാകും താലികെട്ട്.

പ്രൊട്ടസ്റ്റന്റുകാരിയായ മെഗാൻ മെർക്കൽ വിവാഹത്തിനുമുമ്പ് ആംഗ്ലിക്കൻ സഭയുടെ ആചാരങ്ങൾ അനുസരിച്ചുള്ള മാമോദീസയും മറ്റ് കൂദാശകളും സ്വീകരിച്ച് രാജകീയ വധുവായി ഒരുങ്ങും. ഭാവിയിൽ ബ്രിട്ടീഷ് പൗരത്വവും സ്വീകരിക്കും. നിയമപരമായ നടപടികളും പാസ്പോർട്ട് നിയമങ്ങളും പാലിച്ചാകും ഇത്. ചാൾസിനു ശേഷം കിരീടാവകാശിയായ ഹാരിയുടെ സഹോദരൻ വില്യം രാജകുമാരന്റെയും കെയ്റ്റിന്റെയും വിവാഹം ലണ്ടനിലെ വെസ്റ്റ് മിനിസ്റ്റർ ആബിയിൽ വച്ചായിരുന്നു.

’ഡീൽ ഓർ നോ ഡീൽ’’ പരിപാടിയിലെ സ്യൂട്ട് ഗേളായി തുടക്കം.

ടെലിവിഷൻ ലൈറ്റ് ഡയറക്ടറായിരുന്നു ജർമൻ- ഇംഗ്ലീഷ് പാരമ്പര്യമുള്ള മെഗാന്റെ പിതാവ് തോമസ് മെർക്കൽ. ആഫ്രിക്കൻ അമേരിക്കൻ പാരമ്പര്യമുള്ള അമ്മ ഡോറിയ റാഗ് ലാൻഡ് ക്ലിനിക്കൽ തെറാപ്പിസ്റ്റും. കോളജ് വിദ്യാഭ്യാസം പൂർത്തിയാക്കിയ മെഗാൻ സാമൂഹ്യ പ്രവർത്തനത്തിലും കാലിഗ്രാഫിയിലും ശ്രദ്ധയൂന്നി. പിന്നീട് മിനിസ്ക്രീനിലും ചില ഹോളിവുഡ് ചിത്രങ്ങളിലും അവസരം തേടി. അർജന്റീനയിലെ അമേരിക്കൻ എംബസിയിലും കുറച്ചുനാൾ ജോലി . വീണ്ടും ടെലിവിഷൻ പരിപാടികളിൽ ശ്രദ്ധേയയായി. 2011 സെപ്റ്റംബറിൽ ആദ്യ വിവാഹം. ദീർഘകാലത്തെ പ്രണയത്തിനൊടുവിൽ ഫിലിം നിർമാതാവായ ട്രെവോർ ഈഗിൾസണുമായുള്ള വിവാഹത്തിന് രണ്ടുവർഷമേ ആയുസുണ്ടായുള്ളൂ. 2013ൽ ഇവർ പിരിഞ്ഞു.

പിന്നീട് ഹോളിവുഡിൽ താരപദവിയിലേക്കുള്ള വളർച്ച ആരെയും വിസ്മയിപ്പിക്കുന്നത് . കാനഡയിലെ ടൊറന്റോയിലേക്ക് താമസം മാറ്റി. 2016 മേയ് മാസത്തിൽ തന്റെ ടൊറന്റോ സന്ദർശനത്തിലാണ് ഹാരി രാജകുമാരൻ മെഗാനെ ആദ്യം നേരിൽ കാണുന്നത്. ഈ സൌഹൃദം പിന്നീട് പ്രണയമായി. ആറുമാസത്തോളമായി ഇരുവരും ഒരുമിച്ച് ലണ്ടനിലാണ് താമസം. ഇരുവരും ഒരുമിച്ചുള്ള യാത്രകളും പൊതുവേദികളിൽ ഒരുമിച്ച് പങ്കെടുക്കുന്നതും പതിവായിരുന്നു. ഇടക്കിടക്ക് ഹാരി രാജകുമാരന്റെ കാനഡ യാത്രകൾ വാർത്തയിലിടം പിടിച്ചു.

ചാൾസ് രാജകുമാരനാണ് തന്റെ ഇളയപുത്രൻ ഹാരിയുടെ വിവാഹവാർത്ത ഔദ്യോഗികമായി ലോകത്തെ അറിയിച്ചത്. അപ്പോൾ മുതൽ ലോക മാധ്യമങ്ങൾ ഈ വാർത്ത ആഘോഷിക്കുകയാണ്. പത്രങ്ങളിലും ചാനലുകളിലുമെല്ലാം ഇവരുടെ പ്രണയവിശേഷങ്ങൾ മാത്രം. ബ്രിട്ടനിൽ രാജവംശത്തിന്റെ പ്രതാപം അവസാനിക്കുന്നില്ല എന്നതിന്റെ തെളിവാകുകയാണ് ഈ വാർത്തകൾ. ഇരുവരുമൊന്നിച്ചുള്ള റൊമാന്റിക് ചിത്രങ്ങൾ മാധ്യമങ്ങളിൽ നിറയുന്നു.

പ്രണയിനിക്ക് മുന്നിൽ മുട്ടുകുത്തി നിന്നാണ് ഹാരി വിവാഹത്തിനുള്ള പ്രൊപോസൽ മുന്നോട്ട് വച്ചതെന്ന് മെഗാൻ മാധ്യമങ്ങളോട് പറഞ്ഞു.അന്ധമായ പ്രണയമായിരുന്നു തങ്ങളുടേതെന്ന് ഇരുവരും പറഞ്ഞു.രണ്ടാഴ്ച്ച

കൂടുമ്പോൾ ഒരിക്കലെങ്കിലും കാണും. മേഗനും ഡയാന രാജകുമാരിയും നല്ല സുഹൃത്തുക്കളായിരുന്നു. തന്റെ അമ്മ ഉണ്ടായിരുന്നെങ്കിൽ ഈ വിവാഹത്തിൽ ഏറെ സന്തോഷിച്ചേനെ. ഹരി രാജകുമാരൻ വേദനയോടെ വെളിപ്പെടുത്തി.
കെയ്റ്റ് രാജകുമാരി ധരിക്കുന്ന വസ്ത്രങ്ങൾ വാങ്ങാൻ എന്നും ആളുകളുടെ തിരക്കാണ്. വിവാഹ പ്രഖ്യാപന സമയത്തു മെഗാൻ ധരിച്ചിരുന്ന വസ്ത്രത്തിനായി കനേഡിയൻ ബ്രാൻഡ് വെബ്‌സൈറ്റിലേക്ക് ആളുകൾ ഇടിച്ചുകയറി. സൈറ്റ് ഹാങ്ങായി. ഈ വസ്ത്രത്തിന്റെ വില പുറത്തായിട്ടില്ല എന്നാൽ സമാന ഡിസൈനിലുള്ള വസ്ത്രത്തിന്റെ വില 450 പൗണ്ടാണ്.