വിദേശികളുടെ വിസ പുതുക്കുന്നതിനായി പുതിയ സംവിധാനം ആവിഷ്‌ക്കരിക്കാനൊരുങ്ങുകയാണ് കുവൈറ്റ്. ഇതിനായി ഓട്ടോമാ​റ്റിക് റിന്യുവൽ സംവിധാനം ആവിഷ്കരിക്കുമെന്ന് കുവൈറ്റ് താമസാനുമതികാര്യ വിഭാഗം ഡയറക്ടർ ജനറൽ മേജർ ജനറൽ തലാൽ അൽ മറാഫി അറിയിച്ചു.

വിവിധ കമ്പനികളുടെ അഭ്യർത്ഥന കണക്കിലെടുത്താണ് പുതിയ തീരുമാനം. കമ്പനികളിൽ ജോലി ചെയ്യുന്നവരുടെയും കുടുംബാംഗങ്ങളുടെയും വിസ പുതുക്കുന്നതിന് ഓട്ടോമാ​റ്റിക് റിന്യുവൽ സംവിധാനം വരുന്നതോടെ ചെലവ് ചുരുക്കാനാവും. ഓഫീസുകളിൽ ഓഡി​റ്റർമാർ, മ​റ്റ് ഉദ്യോഗസ്ഥർ എന്നിവരുടെ എണ്ണം കുറയ്ക്കാനാവും. സമയവും അധ്വാനവും കുറച്ചുമതിയെന്നതാണ് പുതിയ സംവിധാനം നിലവിൽ വരുന്നതോടെയുള്ള നേട്ടം.

ആശ്രിത വിസയിൽ കുവൈറ്റിൽ കഴിയുന്നവർക്ക് 21 വയസ് പൂർത്തിയായാൽ തൊഴിൽ വിസയിലേക്ക് മാ​റ്റുന്നതിന് മാൻപവർ അതോറി​റ്റിക്ക് അധികാരമുണ്ടാകും. എന്നാൽ വിവാഹമോചിതരായ വനിതകൾക്ക് ഈ ആനുകൂല്യം ലഭിക്കില്ല. വിസ പുതുക്കാത്ത വിവാഹമോചിതർ രാജ്യം വിടേണ്ടിവരും.

21വയസിനു മുകളിലുള്ളവർ ആശ്രിതവിസയിൽ തുടരണമെങ്കിൽ അവർ വിദ്യാർത്ഥികളായിരിക്കണം. പ്രായവും അവർ പഠിക്കുന്ന കാലവും പരിഗണിച്ചാകും ആനുകൂല്യം ലഭിക്കുക. അല്ലാത്തപക്ഷം അവർ ആശ്രിത വിസയിൽനിന്ന് മാറേണ്ടി വരും.