തുര്‍ക്കിയിലെ കനാക്സി ജില്ലയിലെ കുസ്കോയ് ഗ്രാമം ഇനി മുതൽ യുനസ്കോ പട്ടികയിൽ. യുനസ്കോയുടെ അവര്‍ണനീയ സാംസ്കാരിക പൈതൃകങ്ങളുടെ പട്ടികയിലാണ് ഈ ഗ്രാമം ഇടം പിടിക്കുന്നത്. യുനസ്കോ പട്ടികയിൽ ഈ ഗ്രാമം സ്ഥാനം പിടിക്കാൻ കാരണം അസാധാരണമായ പക്ഷി ശബ്ദത്തിലൂടെ ആശയവിനിമയം നടത്താന്‍ വടക്കന്‍ തുര്‍ക്കിയിലെ ഈ ഗ്രാമവാസികള്‍ക്ക് സാധിക്കും എന്നതുകൊണ്ടാണ്.

നഷ്ടമായികൊണ്ടിരിക്കുന്ന ഗ്രാമവാസികളുടെ പക്ഷിഭാഷാ പൈതൃകം സംരക്ഷിക്കുക എന്ന ലക്ഷ്യത്തോടെയാണ് യുനസ്കോ ഗ്രാമത്തിന് പ്രത്യേക പരിഗണന നല്‍കിയിരിക്കുന്നത്.

500 വര്‍ഷം മുമ്പ് ഓട്ടോമന്‍ സാമ്രാജ്യകാലത്തോളം പഴക്കമുണ്ട് ഈ പക്ഷിഭാഷയ്ക്ക്. വിസില്‍ അഥവാ ഉച്ചത്തില്‍ ചൂളമിടുന്നതിലൂടെയാണ് ആശയവിനിമയം നടത്തുന്നത്. എന്നാല്‍ ആധുനിക ആശയവിനിമയ സാങ്കേതിക വിദ്യ വളര്‍ച്ച പ്രാപിച്ചതോടെ ഈ ആശയ വിനിമയ രീതി മരണത്തിന്റെ വക്കിലാണ്.

കുന്നും മലയും നിറഞ്ഞ കനാക്സി പ്രവിശ്യയില്‍ പതിനായിരത്തോളം ആളുകളാണ് താമസിക്കുന്നത്. മലനിരകളില്‍ പരസ്പരം കാണാന്‍ പറ്റാത്ത ദൂരെ നില്‍ക്കുന്ന ആളുകളുമായി പോലും ഈ പക്ഷിഭാഷയിലൂടെ സംസാരിക്കാന്‍ ഗ്രാമവാസികള്‍ക്ക് സാധിക്കും.

നൂറ്റാണ്ടുകളായി തലമുറകള്‍ ഈ ഭാഷ കൈമാറിവരുന്നു.ഇന്ന് ഈ ഭാഷയറിയുന്നവര്‍ വിരളമാണ്. പലര്‍ക്കും പ്രായമാവുകയും ചെയ്തു. യുവാക്കള്‍ക്ക് ഈ ഭാഷ പഠിക്കുന്നതിലോ ഭാഷയെ കാലത്തിനനുസരിച്ച്‌ പരിഷ്കരിക്കുന്നതിനോ താല്‍പര്യവുമില്ല.

അതെ ഭാഷ സംരക്ഷിക്കുന്നതിനായി ഇന്ന് ഗ്രാമവാസികളെ ഈ ഭാഷ പരിശീലിപ്പിക്കുന്നുണ്ട്. 2014 മുതല്‍ തന്നെ പ്രൈമറി സ്കൂള്‍ തലത്തില്‍ പക്ഷി ഭാഷ പഠിപ്പിക്കുന്നുമുണ്ട്. പക്ഷേ ഇത് പരീക്ഷിക്കാന്‍ പലരും തയാറാകാത്തതുകൊണ്ട് തന്നെ ഫലമുണ്ടാകുന്നില്ല. വരും കാലങ്ങളിൽ ഈ ആശയ വിനിമയ രീതി ഇല്ലാതായി പോകാതിരിക്കാൻ സംരക്ഷണവുമായി യുനെസ്‌കോ മുന്നോട്ട് വന്നിരിക്കുകയാണ്.