തീവ്രവാദികളെ സഹായിക്കുന്ന നിലപാടാണ് പാകിസ്ഥാൻ സ്വീകരിക്കുന്നതെന്ന് വ്യക്തമാക്കി അമേരിക്ക പാക്കിസ്ഥാന് നൽകുന്ന സാമ്പത്തിക സഹായങ്ങൾ അവസാനിപ്പിച്ചതിനു പിന്നാലെ പാലസ്‌തീന്‌ നൽകുന്ന സഹായങ്ങളും അവസാനിപ്പിക്കുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ്. എന്നാൽ ജെറുസലേം വിൽപ്പനക്കുള്ള സ്ഥലമല്ലെന്ന് വ്യക്തമാക്കി പാലസ്തീൻ രംഗത്തെത്തി.

ജെറുസലേമിനെ ഇസ്രയേലിന്റെ തലസ്ഥാനമായി അംഗീകരിച്ച അമേരിക്കയുടെ ഏകപക്ഷീയമായ നടപടിയ്ക്കെതിരെയാണ് പാലസ്തീന്റെ പ്രതികരണം. ജെറുസലേം എന്നത് പാലസ്തീന്റെ അനശ്വര തലസ്ഥാനമാണ് അത് സ്വര്‍ണത്തിനോ പണത്തിനോ വേണ്ടി വില്‍ക്കാനുള്ളതല്ലെന്നും പലസ്തീന്‍ പ്രസിഡന്റ് മഹമൂദ് അബ്ബാസിന്റെ ഓഫീസ് വ്യക്തമാക്കി. ഇസ്രയേലുമായുള്ള സമാധാന ചര്‍ച്ചയില്‍ സഹകരിക്കാന്‍ പാലസ്തീന്‍ താല്പര്യം കാട്ടുന്നില്ലെന്ന് ചൂണ്ടിക്കാട്ടിയാണ് ട്രംപ് സാമ്പത്തിക സഹായം നിര്‍ത്തലാക്കുമെന്ന് സന്ദേശം അയച്ചത്.