കഴിഞ്ഞ ഫെബ്രുവരിയിലാണ് ആഫ്രിക്കക്കാരനായ ഒരു അധ്യാപകനും വിദ്യാര്‍ത്ഥികളും ലോക ശ്രദ്ധയിലേക്ക് കടന്ന് ചെല്ലുന്നത്. പരിമിതികൾ കഴിവു കൊണ്ടു മറികടന്ന അധ്യാപകന്റെ ജീവിതം ഒട്ടനവധി പേർ ചർച്ച ചെയ്യപ്പെട്ടിരുന്നു. കമ്പ്യൂട്ടർ ഇല്ലാതെ മൈക്രോസോഫ്റ്റ് വേര്‍ഡ് ബോര്‍ഡില്‍ വരച്ചു പഠിപ്പിക്കുന്ന അധ്യാപകന്റെ ചിത്രങ്ങൾ സോഷ്യല്‍ മീഡിയയിലൂടെയാണ് കൈയടി നേടിക്കൊടുത്തത്.

ഘാനയിലെ ബെറ്റനേസ് എന്ന കു​ഗ്രാമത്തിലെ അധ്യാപകനാണ് 33 കാരനായ റിച്ചാര്‍ഡ് അപ്പിയോ അകോട്ടോ. ഒരു കമ്പ്യൂട്ടർ പോലുമില്ലാത്ത സ്കൂളില്‍ കുട്ടികളെ ബോര്‍ഡില്‍ വരച്ചാണ് റിച്ചാര്‍ഡ് ഐടി ക്ലാസെടുത്തിരുന്നത്. എന്നാൽ റിച്ചാര്‍ഡിന്റെ ചിത്രം സോഷ്യല്‍ മീഡിയയിലെത്തിയതോടെ ലോകത്തെമ്പാടുമുള്ള സുമനസ്സുകളുടെ സഹായം ഈ കൊച്ചു സ്കൂളിനെ തേടിയെത്തി.

കമ്പ്യൂട്ടർ ഇല്ലാതിരുന്ന സ്കൂളിനെ ഇ-സ്കൂളാക്കാന്‍ ലോകത്തിന്റെ വിവിധഭാഗത്ത് നിന്നും സഹായങ്ങളുടെ പെരുമഴ തന്നെ ഉണ്ടായി. ഘാന എന്‍ഐഐടിയില്‍ നിന്നും, യുകെയില്‍ നിന്നും ഒട്ടേറെ കംപ്യൂട്ടറുകളും ലാപ്ടോപ്പുകളും കുട്ടികള്‍ക്കായി എത്തി. ഒടുവില്‍ മൈക്രോസോഫ്റ്റിന്റെ എഡ്യൂക്കേറ്റേഴ്സ് എക്സചേഞ്ച് എന്ന പരിശീലന പരിപാടിയിലും റിച്ചാര്‍ഡ് സൗജന്യമായി പങ്കെടുക്കാൻ കഴിഞ്ഞു.