ശ്രീലങ്കയുടെ ഔദ്യോഗിക ഭാഷയായ സിംഹള പഠിക്കാന്‍ തന്നെ ഫേസ്ബുക്ക് തീരുമാനിച്ചു. തങ്ങളുടെ ജീവനക്കാരില്‍ ഒരു വിഭാഗത്തെ ഇതിനായി ചുമതലപ്പെടുത്തിയതായി ഫേസ്ബുക്ക് വക്താവ് അറിയിച്ചു.

ലങ്കന്‍ ജനതയുടെ പോസ്റ്റുകളുടെ അര്‍ഥം മനസിലാക്കി ജനങ്ങള്‍ക്കിടയില്‍ വിദ്വേഷമുണര്‍ത്തുന്നവയുണ്ടെങ്കില്‍ നീക്കം ചെയ്യുന്നതിനാണ് നടപടി. ഫേസ്ബുക്കിലൂടെ വ്യാപകമായി വിദ്വേഷസന്ദേശങ്ങള്‍ പ്രചരിച്ചതിനേത്തുടര്‍ന്ന് രണ്ടാഴ്ചമുമ്പ് ലങ്കയില്‍ സാമുദായിക കലാപമുണ്ടാവുകയും മൂന്നു പേര്‍ കൊല്ലപ്പെടുകയും ചെയ്തിരുന്നു.

ഇതേത്തുടര്‍ന്ന് ഫേസ്ബുക്കിന് സര്‍ക്കാര്‍ ഏര്‍പ്പെടുത്തിയ വിലക്ക് കഴിഞ്ഞ ദിവസമാണ് പിന്‍ വലിച്ചത്. ഇനി ഇതുപോലുള്ള ദുരന്തങ്ങള്‍ ആവര്‍ത്തിക്കാതിരിക്കാന്‍ നടപടി സ്വീകരിക്കുമെന്നും ഫേസ്ബുക്ക് വക്താവ് അറിയിച്ചു.