ജർമനിക്ക് എതിരായ ലോകകപ്പ് മത്സരത്തിൽ മെക്സിക്കോ ഗോളടിച്ചപ്പോൾ ഉണ്ടായത് ആവേശ ഭൂകമ്പം . മെക്സിക്കോ സിറ്റിയിലെ മെയിൻ സ്‌കോയാറിലെ പടുകൂറ്റൻ സ്‌ക്രീനുകൾക്ക് മുന്നിൽ പതിനായിരക്കണക്കിന് ആരാധകരാണ് കളികാണാനായ് അണിനിരന്നത്. നഗരത്തിൽ പലയിടത്തും ഇത്തരത്തിൽ പ്രദർശനങ്ങൾ ഉണ്ടായിരുന്നു. ഗോൾ വീണതോടെ നഗരം ഒന്നടങ്കം ആവേശ ലഹരിയിൽ തുള്ളിച്ചാടി. ഇതോടെ മെക്സിക്കോയിലെ രണ്ടിടങ്ങളിലെ റിക്ടർ സ്കെയിലിൽ ഭൂകമ്പം രേഖപ്പെടുത്തി.

ഗോളടിച്ച് ഏഴാം സെക്കന്റിലാണ് രണ്ടിടത്ത് ഭൂകമ്പം രേഖപ്പെടുത്തിയത്. ഇതോടുകൂടി ജർമനിക്കെതിരെ ഗോളടിച്ചപ്പോൾ ഭൂമിപോലും കുലുങ്ങിയതായി പ്രചാരണം വന്നു. ഒരുപക്ഷെ ആൾക്കൂട്ടവും ബഹളവുമാകാം ഇതിനു കാരണം. സാധാരണയായി പ്രാദേശികമായി ഭൂമിയിലുണ്ടാകുന്ന കമ്പനങ്ങളാണ് ഭൂകമ്പ മാപിനികളിൽ രേഖപ്പെടുത്തുന്നത്. മെക്സിക്കോയിൽ ഉണ്ടായത് സ്വാഭാവിക ഭൂമികുലുക്കമാണോ അതോ ഫുട്ബോൾ ആവേശത്തിന്റെ പരിണിത ബലമാണോ എന്ന് ശാസ്ത്രീയ പരിശോധനയിൽ മാത്രമേ കണ്ടെത്താനാകു.