കഞ്ചാവിന്റെ ഉൽപാദനവും ഉപയോഗവും നിയമപരമാക്കാനുള്ള ബിൽ കാനഡ സെനറ്റ് പാസാക്കി. ബിൽ സി–45 അഥവാ മരിജുവാന നിയമം 52 വോട്ടുകളോടെ വ്യാഴാഴ്ചയാണു പാസായത്. മാസങ്ങൾ നീണ്ട ചർച്ചകൾക്കൊടുവിലാണു അന്തിമ തീരുമാനം. തീരുമാനത്തിൽ 30 പേർ എതിർത്തു. സെനറ്റില്‍ കൊണ്ടുവന്ന ബില്ലിന് ഇനി ഹൗസ് ഓഫ് കോമൺസ് അംഗീകാരം നേടണം.

ഹൗസ് ഓഫ് കോമൺസ് അംഗീകാരം ലഭിച്ചാൽ കാനഡയുടെ ദേശീയ ദിനമായ ജൂലൈ ഒന്നുമുതൽ നിയമം പ്രാബല്യത്തിൽ വരും. പ്രധാനമന്ത്രി ജസ്റ്റിൻ ട്രൂ‍ഡോയുടെ തിരഞ്ഞെടുപ്പ് വാഗ്ദാനങ്ങളിലൊന്നായിരുന്നു കഞ്ചാവിന്റെ നിയമപരമായ ഇടപാട്. കൂട്ടുകാരോടൊപ്പം അഞ്ചോ ആറോ തവണ മരിജുവാന ഉപയോഗിച്ചിട്ടുള്ളതായും ട്രൂ‍ഡോ അന്നു പറഞ്ഞിരുന്നു. മരുന്ന് ആവശ്യങ്ങള്‍ക്കായി മരിജുവാന വിൽക്കുന്നതിന് 2001 മുതൽ കാനഡയിൽ അംഗീകാരമുണ്ട്. 18 വയസ്സിനു മുകളിലുള്ളവർക്കു വ്യക്തിപരമായ ആവശ്യങ്ങൾക്കായി 30 ഗ്രാം വരെ മരിജുവാന കൈവശം വയ്ക്കാമെന്ന് ബിൽ വ്യവസ്ഥ ചെയ്യുന്നു.