മലേഷ്യയിലെ പ്രമുഖ കമ്പനിയുടെ യുവ സി.ഇ.ഒ മൊബൈല്‍ ഫോണ്‍ പൊട്ടിത്തെറിച്ചതിനെത്തുടർന്ന് മരണപ്പെട്ടു. ക്രഡില്‍ ഫണ്ട് എന്ന മലേഷ്യന്‍ കമ്പനിയുടെ സി.ഇ.ഒ ആയിരുന്ന നസ്രിന്‍ ഹസ്സന്‍ ആണ് അപ്രതീക്ഷിത അപകടത്തിൽ മരിച്ചത്.

ബ്ലാക്ക്‌ബെറി, വാവേ എന്നീ ഫോണുകളായിരുന്നു നസ്രീന്‍ ഹസ്സന്‍ ഉപയോഗിച്ചിരുന്നത്. ഇവ രണ്ടും ഹസ്സന്‍ കിടന്ന കിടക്കയ്ക്ക് സമീപം തന്നെ ചാര്‍ജ്ജ് ചെയ്യാന്‍ ഇട്ടിരുന്നു. ഫോണ്‍ പൊട്ടിത്തെറിച്ചതിനെ തുടര്‍ന്ന് ഉണ്ടായ തീ പിടുത്തത്തില്‍ റൂം മുഴുവന്‍ കത്തി നശിച്ചു. അതിനാല്‍ ഏത് ഫോണാണ് പൊട്ടിത്തെറിച്ചതെന്ന കാര്യത്തില്‍ വ്യക്തതയില്ല.

അതേസമയം തീപിടുത്തത്തിലൂടെയോ ഫോണ്‍ പൊട്ടിത്തെറിച്ചതിനെ തുടര്‍ന്ന് തലക്കേറ്റ പരുക്കേറ്റതിനെ തുടർന്നോ അല്ല ഹസ്സന്‍ കൊല്ലപ്പെട്ടതെന്നും റിപ്പോർട്ടുകളുണ്ട്. പൊട്ടിത്തെറിയെ തുടര്‍ന്നുണ്ടായ പുക ശ്വസിച്ചാണ് മരണകാരണം എന്നാണ് പൊലീസ് പറയുന്നത്.