അരിമണിയെക്കാളും വലുപ്പം കുറഞ്ഞ ലോകത്തിലെ ഏറ്റവും കുഞ്ഞന്‍ കമ്പ്യൂട്ടര്‍ വികസിപ്പിച്ചെടുത്ത് മിഷിഗന്‍ സര്‍വകലാശാലയിലെ ഗവേഷകര്‍. 0.3 മി.മി മാത്രമാണ് 'മിഷിഗന്‍ മൈക്രോ മോടെ' എന്ന് പേരിട്ടിരിക്കുന്ന ഈ കുഞ്ഞന്‍ കമ്പ്യൂട്ടറിന്റെ വലുപ്പം. അര്‍ബുദം കണ്ടെത്താനും ചികിത്സിക്കാനും ഈ കമ്പ്യൂട്ടര്‍ ഉപകരിക്കും. വൈദ്യുതി ഉള്ള സമയത്തും അതിന്റെ അഭാവത്തിലും സിസ്റ്റത്തിലെ വിവരങ്ങള്‍ പരമ്പരാഗത ഡെസ്‌ക്‌ടോപ് കമ്പ്യൂട്ടറുകള്‍ സൂക്ഷിക്കുമെങ്കിലും കുഞ്ഞന്‍ കമ്പ്യൂട്ടര്‍ സ്വിച്ച് ഓഫ് ചെയ്യുന്ന സമയം എല്ലാ പ്രോഗ്രാമുകളും വിവരങ്ങളും നഷ്ടപ്പെട്ട് പോകുമെന്നതിനാല്‍തന്നെ ഇതിനെ കമ്പ്യൂട്ടര്‍ എന്ന് വിളിക്കാനാകുമോ എന്ന് ഗവേഷണത്തിന് നേതൃത്വം നല്‍കിയ ശാസ്ത്രജ്ഞനായ ഡേവിഡ് ബ്ലോ സംശയം പ്രകടിപ്പിച്ചു.
കമ്പ്യൂട്ടറില്‍ റാം, ഫോട്ടോ വൊളറ്റെല്‍ എന്നിവയോടൊപ്പം പ്രോസസറുകള്‍, ട്രാന്‍സ്മിറ്ററുകള്‍, റെസീവറുകള്‍ എന്നിവയും ഘടിപ്പിച്ചിട്ടുണ്ട്. വലുപ്പം ചെറുതായതിനാല്‍തന്നെ ആന്റിനകള്‍ ഇല്ലാതെ എല്‍.ഇ.ഡികളുടെയും ദൃശ്യ പ്രകാശത്തിന്റെയും സഹായത്തിലാണ് ഇതിലൂടെ വിവരങ്ങള്‍ കൈമാറുകയും സ്വീകരിക്കുകയും ചെയ്യുന്നത്.

ശരീരോഷ്മാവ് പോലും സൂക്ഷ്മമായി നിരീക്ഷിക്കുന്ന തരത്തിലാണ് കമ്പ്യൂട്ടറിന്റെ നിര്‍മാണമെന്നും 0.1 ഡിഗ്രി സെല്‍ഷ്യസിന്റെ വ്യത്യാസം പോലും കണ്ടെത്താന്‍ ഇത് പ്രാപ്തമാണെന്നും അവര്‍ അവകാശപ്പെട്ടു. ഊഷ്മാവ് അളക്കുന്ന സെന്‍സര്‍ ചെറുതും അനുയോജ്യവുമായതിനാല്‍ കാന്‍സര്‍ കോശങ്ങളും സാധാരണ കോശങ്ങളും തമ്മില്‍ ഊഷ്മാവിലുള്ള വ്യത്യാസം കണ്ടെത്താനും ശ്രമിക്കാമെന്ന് സര്‍വകലാശാലയില്‍ പ്രഫസറായ ഗാരി ലൂക്കര്‍ പറഞ്ഞു.

നിര്‍മാണ സമയത്ത് കുറഞ്ഞ വൈദ്യുതിയില്‍ പ്രവര്‍ത്തിപ്പിക്കുക എന്ന വെല്ലുവിളി സര്‍ക്യൂട്ട് ഡിസൈനില്‍ മാറ്റം വരുത്തിയാണ് മറികടന്നതെന്ന് ഡേവിഡ് ബ്ലോ വ്യക്തമാക്കി. കഴിഞ്ഞ മാര്‍ച്ചില്‍ നടന്ന തിങ്ക് കോണ്‍ഫറന്‍സില്‍ ഐ.ബി.എം ഒരു മില്ലിമീറ്റര്‍ വലുപ്പമുള്ള കമ്പ്യൂട്ടര്‍ പുറത്തിറക്കിയിരുന്നു. അതിനും മുമ്പ് കുഞ്ഞന്‍ കമ്പ്യൂട്ടര്‍ എന്ന സ്ഥാനം അലങ്കരിച്ചിരുന്ന 2ഃ2ഃ4 മി.മി മിഷിഗന്‍ മൈക്രോ മോടെക്കിന് വൈദ്യുതി വിതരണം നഷ്ടപ്പെട്ടാലും വിവരങ്ങളും പ്രോഗ്രാമുകളും സൂക്ഷിക്കാന്‍ കെല്‍പുണ്ടായിരുന്നു.