ലോകത്തിന്റെ ഏത് കോണില്‍ ചെന്നാലും അവിടെ തന്റേതായ ഇടം കണ്ടെത്താനും അവിടെയുള്ളവരെ കൈയ്യിലെടുക്കാനും മലയാളിയെ കഴിഞ്ഞേ ആളുള്ളൂ. ഇക്കഴിഞ്ഞ ദിവസം ഇന്ത്യ അയര്‍ലണ്ട് ക്രിക്കറ്റ് മത്സരം നടക്കുന്ന അയര്‍ലണ്ടിലെ ഡബ്ലിന്‍ സ്റ്റേഡിയത്തില്‍ നിന്നുള്ള ഒരു കാഴ്ചയാണ് ഇപ്പോള്‍ നവമാധ്യമങ്ങളിലടക്കം ചിരിയുണര്‍ത്തി വൈറലായിരിക്കുന്നത്.

ഇന്ത്യ-അയര്‍ലണ്ട് ഒന്നാം ടി20 മത്സരം നടക്കുന്നതിനിടെ അയര്‍ലണ്ടിലെ ഡബ്ലിന്‍ സ്റ്റേഡിയത്തില്‍ കൂട്ടമായെത്തിയ മലയാളി ആരാധകര്‍ ചെണ്ടമേളവും മലയാളും പാട്ടുകളുമായി സായിപ്പന്മാരെ മൊത്തം അമ്പരപ്പിക്കുകയായിരുന്നു. മത്സരത്തിനിടെ കളിനിയന്ത്രിക്കാനെത്തിയ പോലീസുകാരി പെണ്‍കുട്ടിയെ മലായാളം പ്രേമ ഗാനം പാടി വീഴ്ത്തുകയും ചെയ്തു ഈ മലയാളി ആരാധകർ.

‘ആരോടും പറയരുതീ പ്രേമത്തിൻ ജീവരഹസ്യം’ എന്ന മോഹന്‍ലാലിന്റെ ഗാന്ധര്‍വത്തിലെ പാട്ടാണ് ചെണ്ടമേളത്തിന്റെ അകമ്പടിയോടു കൂടി മലയാളികള്‍ പാടി തകര്‍ത്തത്. ആദ്യം ഗൗരവത്തിലായിരുന്നെങ്കില്‍ ‘നിന്‍ മിഴികളില്‍ അജ്ഞനമെഴുതാം ഞാന്‍ ഇതു നീ ആരോടും പറയില്ലെങ്കില്‍’ എന്ന വരികള്‍ കേട്ടപ്പോള്‍ പെണ്‍കുട്ടി ചിരി തുടങ്ങി. അതും ചെണ്ടയുെട താളത്തോട് കൂടിയുള്ള മലയാളികളുടെ പാട്ടിന്.

എന്തായാലും സാമൂഹ്യ മാധ്യമങ്ങളില്‍ ഈ വിഡിയോ വൈറലായിരിക്കുകയാണ്. പതിനായിരക്കണക്കിന് ആളുകളാണ് ഇതനോടകം ഈ ദൃശ്യങ്ങള്‍ ഏറ്റെടുത്തിരിക്കുന്നത്.