പി.കെ ശശി എം.എല്‍.എയ്‌ക്കെതിരെ പരാതിക്കാരി സി.പി.എം കേന്ദ്രകമ്മിറ്റിക്ക് പരാതി നല്‍കിയത് ശ്രദ്ധയില്‍ പെടുത്തിയപ്പോള്‍ പരാതിയുടെ കോപ്പിയുണ്ടോ എന്ന് സംസ്ഥാന സമിതി നിയമിച്ച അന്വേഷണ കമ്മീഷന്‍ ചെയര്‍മാന്‍ മന്ത്രി എ.കെ ബാലന്‍ മാധ്യമങ്ങളോട് ചോദിച്ചു. പരാതിയുടെ പകര്‍പ്പ് കാണിച്ചപ്പോള്‍ ഇതില്‍ പരാതിക്കാരിയുടെ പേരും മേല്‍വിലാസവും ഇല്ലെന്നും അതിനാല്‍ പ്രതികരിക്കാനാവില്ലെന്നും മന്ത്രി ദേഷ്യപ്പെട്ടു.

ലൈംഗികപീഢന പരാതികളില്‍ ഇരയുടെ പേര് എങ്ങനെ രേഖപ്പെടുത്തുമെന്ന് ചോദിച്ചപ്പോഴും മറുപടി നല്‍കാനില്ലെന്നായിരുന്നു മന്ത്രിയുടെ പ്രതികരണം. കേന്ദ്രകമ്മിറ്റിക്ക് പരാതി നല്‍കിയ കാര്യം അറിയില്ലെന്നും മന്ത്രി പറഞ്ഞു. അതേസമയം താന്‍ അന്വേഷിക്കുന്ന കമ്മീഷന്‍ അന്തിമറിപ്പോര്‍ട്ട് ഉടന്‍ നല്‍കുമെന്ന് മന്ത്രി പറഞ്ഞു.

അന്വേഷണകമ്മീഷനുകള്‍ സാധാരണ രണ്ടര മാസത്തോളമെടുത്താണ് റിപ്പോര്‍ട്ട് സമര്‍പ്പിക്കുന്നത്. പി.കെ ശശിക്കെതിരായ അന്വേഷണം പൂര്‍ത്തിയായെന്നാണ് സിപിഎം കേന്ദ്രനേതൃത്വം നല്‍കുന്ന സൂചന. അടുത്ത മാസം പകുതിയ്ക്ക് ചേരുന്ന സംസ്ഥാന സമിതിയോഗം അന്വേഷണറിപ്പോര്‍ട്ട് പരിഗണിക്കും. അതിന് മുമ്പ് അന്വേഷണറിപ്പോര്‍ട്ട് സംസ്ഥാനസമിതിയ്ക്ക് മുമ്പാകെ സമര്‍പ്പിക്കും. പുതിയ പരാതി ഇതുവരെ പരിശോധിച്ചിട്ടില്ലെന്നും കേന്ദ്രനേതാക്കള്‍ പറയുന്നു. മന്ത്രി എ.കെ ബാലനും പി.കെ ശ്രീമതിയും നടത്തുന്ന അന്വേഷണം അട്ടിമറിക്കുകയാണെന്നും പരാതിയില്‍ നിന്ന് തന്നെ പിന്തിരിപ്പിക്കാന്‍ നീക്കം നടക്കുന്നതായും കാട്ടിയാണ് പാലക്കാട് ജില്ലയിലെ ഡി.വൈ.എഫ്.ഐ വനിതാ നേതാവ് കേന്ദ്രകമ്മിറ്റിക്ക് പരാതി നല്‍കിയത്. 

പരാതി നല്‍കിയ വിവരം മാധ്യമങ്ങള്‍ പുറത്ത് കൊണ്ടുവന്നതോടെ പി.കെ ശശി എം.എല്‍.എയെ പാര്‍ട്ടി പരിപാടികളില്‍ നിന്ന് വിലക്കിയിരുന്നു. എന്നാല്‍ അടുത്തിടെ മുഖ്യമന്ത്രിയും മന്ത്രി എ.കെ ബാലനും പങ്കെടുത്ത, പാലക്കാട് ജില്ലയിലെ ചില പരിപാടികളില്‍ ശശി പങ്കെടുത്തു. ശശിയെ വേദിയില്‍ ഇരുത്തിക്കൊണ്ട് മറ്റേകാര്യം വല്യ കാര്യമല്ലെന്നും എ.കെ ബാലന്‍ പറഞ്ഞു. ഇതോടെയാണ് അന്വേഷണം അട്ടിമറിക്കുകയാണെന്ന് പരാതിക്കാരിക്ക് ബോധ്യമായത്. പരാതിക്കാരിക്കൊപ്പം നിന്ന ഡി.വൈ.എഫ്.ഐ നേതാക്കളെ ജില്ലാ സമ്മേളനത്തില്‍ വെട്ടിനിരത്തുകയും ചെയ്തു.