ശബരിമല വിഷയത്തില്‍ ആദ്യം മുതലേ ഭക്തര്‍ക്ക് എതിരായ നിലപാടാണ് ദേവസ്വം ബോര്‍ഡ് എടുത്തിരുന്നത്. അതേസമയം ശബരിമലയിലെ കോടിക്കണക്കിന് വരുമാനം കൊണ്ടാണ് ദേവസ്വം ബോര്‍ഡ് ധനികരായി നില്‍ക്കുന്നത് എന്ന് സമ്മതിയ്ക്കുകയും ചെയ്യുന്നുണ്ട്. ഇത് മനസിലാക്കിയ ഭക്തര്‍ ഒന്നിക്കുകയും ഭക്തരുടെ കാണിക്ക കൊണ്ട് ദേവസ്വം ബോര്‍ഡ് അഹങ്കരിക്കേണ്ടതില്ലെന്നും തീരുമാനിച്ചു. ഇതോടെ കാണിക്കയ്ക്ക് പകരം സ്വാമിശരണം മാത്രമായി. ശബരിമലയിലെ വരുമാനം വലിയ തോതില്‍ കുറഞ്ഞുവെന്നാണ് കണക്കാക്കിയിരിക്കുന്നത്.

എന്നാല്‍ ഇതുകൊണ്ടൊന്നും ദേവസ്വം ബോര്‍ഡ് പിന്നോട്ടില്ലെന്നാണ് റിപ്പോര്‍ട്ട്. ആദ്യമൊക്കെ അനുകൂല നിലപാട് സ്വീകരിച്ച ദേവസ്വം ബോര്‍ഡ് പ്രസിഡന്റ് പോലും മുഖ്യമന്ത്രി പിണറായി വിജയന്റെ വിരട്ടലില്‍ മലക്കം മറിഞ്ഞു. റിവ്യൂ ഹര്‍ജി കൊടുക്കുമെന്ന് ഒരു ഘട്ടത്തില്‍ പറഞ്ഞ ദേവസ്വം ബോര്‍ഡ് വീണ്ടും മലക്കം മറിഞ്ഞിരിക്കുകയാണ്. 

സര്‍ക്കാര്‍ നിലപാടിനെ പിന്തുണച്ചു സുപ്രീം കോടതിയില്‍ പുതിയ നിലപാട് അറിയിക്കാനാണു ദേവസ്വം ബോര്‍ഡിന്റെ നീക്കം. ചൊവ്വാഴ്ചയാണു യുവതീ പ്രവേശനം സംബന്ധിച്ച പുനപരിശോധനാ ഹര്‍ജികള്‍ കോടതി പരിഗണിക്കുന്നത്. യുവതീ പ്രവേശനമാകാം എന്ന നിലപാടിലേക്കാണ് ദേവസ്വം ബോര്‍ഡ് നീങ്ങുന്നത്. യുവതീപ്രവേശനം സംബന്ധിച്ച് രണ്ടു പതിറ്റാണ്ടിലേറെയായി ദേവസ്വം ബോര്‍ഡ് സ്വീകരിച്ചുവന്ന നിലപാടില്‍ നിന്നുള്ള വലിയ മാറ്റമാണ് ഇപ്പോഴത്തേത്.

അതേസമയം ദേവസ്വം ബോര്‍ഡിന്റെ സാമ്പത്തിക അടിത്തറയിളകുമെന്ന തരത്തിലാണ് റിപ്പോര്‍ട്ടുകള്‍ വരുന്നത്. വരുമാനത്തില്‍ വന്‍ ഇടിവാണ് ഇപ്പോള്‍ കാണിക്കുന്നത്. ഇങ്ങനെ പോയാല്‍ ശമ്പളവും പെന്‍ഷനും കൊടുക്കാനാകാതെ ബോര്‍ഡ് വെള്ളം കുടിക്കും. വളരെ ലാഭത്തിലായിരുന്ന ദേവസ്വം ബോര്‍ഡ് എല്ലും തോലുമാകുകയാണ്. 

ബോര്‍ഡിന്റെ നിലനില്‍പിന് പ്രധാനമായും ആശ്രയിക്കുന്നത് ശബരിമലയിലെ വരുമാനത്തെയാണ്. കാണിക്കയില്‍ ഉണ്ടായ ഗണ്യമായ കുറവിനൊപ്പം ലേലങ്ങളിലൂടെ ലഭിക്കേണ്ട കോടികളും നഷ്ടമാകുകയാണ്. ബോര്‍ഡിന്റെ സാമ്ബത്തിക സൂക്ഷിപ്പുകാരായ ധനലക്ഷ്മി ബാങ്കിന്റെ കണക്കനുസരിച്ച് പ്രളയം മുതല്‍ ഇതുവരെ വരുമാനത്തില്‍ 30 ശതമാനത്തിന്റെ കുറവുണ്ട്.

1236 ക്ഷേത്രങ്ങളാണ് ബോര്‍ഡിന്റെ കീഴിലുള്ളത്. ഇതില്‍ ചെറുതും വലുതുമായ 127 ക്ഷേത്രങ്ങളാണ് സ്വയംപര്യാപ്തമായവ. ജീവനക്കാരുടെ ശമ്ബളം, പെന്‍ഷന്‍, മറ്റ് ആനുകൂല്യങ്ങള്‍ എന്നിവയ്ക്ക് പുറമേ വരുമാനമില്ലാത്ത മറ്റ് ക്ഷേത്രങ്ങളുടെ നിത്യനിദാന ചെലവുകള്‍ക്കും പണം കണ്ടെത്തുന്നത് ശബരിമലയില്‍ നിന്നുള്ള വരുമാനത്തില്‍ നിന്നാണ്

12 കോടിയുടെ കുറവ് വരുമാനത്തിലുണ്ടായത്. പ്രളയത്തില്‍ തുടങ്ങിയ പ്രതിസന്ധിയും ശബരിമല പ്രശ്‌നവും ദേവസം ബോര്‍ഡിനെ ബാധിച്ചു. 

ചിത്തിര ആട്ടവിശേഷത്തിനായി പത്തിരട്ടിയിലധികം തീര്‍ത്ഥാടകര്‍ എത്തിയിട്ടും അപ്പം, അരവണ വില്പനയിലൂടെയും വിവിധ പൂജകള്‍ക്കുമായി ലഭിച്ച തുക 28 ലക്ഷം രൂപയാണ്. കാണിക്ക എണ്ണാനുണ്ട്. 90 കടമുറികള്‍മാത്രം ലേലത്തില്‍ പോയി : ശബരിമല, പമ്പ, നിലയ്ക്കല്‍ എന്നിവിടങ്ങളില്‍ മൊത്തം 220 കടമുറികള്‍. ലേലമെടുത്ത പലരും ഒഴിയാന്‍ ബോര്‍ഡിനെ സമീപിച്ചു.

ഇന്നലെ ലേലത്തില്‍ പോയ ഏഴ് കടമുറികള്‍ക്കും കഴിഞ്ഞ സീസണെക്കാള്‍ 15 ശതമാനം കുറഞ്ഞ തുക. ശേഷിക്കുന്നവയ്ക്ക് 14ന് തുറന്ന ലേലം നടത്തും. കോടിക്കണക്കിന് രൂപയുടെ നഷ്ടത്തിന് സാധ്യത. പുഷ്പാഭിഷേകം 1.68 കോടി രൂപയ്ക്ക് പിടിച്ച കരാറുകാരനും പിന്‍മാറാന്‍ കത്തുനല്‍കി. ഇങ്ങനെ പോകുകയാണെങ്കില്‍ എല്ലാം അവതാളത്തിലാകുമെന്നാണ് ദേവസ്വം ബോര്‍ഡ് പോലും കണക്കാക്കുന്നത്. എന്നാല്‍ സര്‍ക്കാരിനെ പേടിച്ച് മാത്രമാണ് യുവതീ പ്രവേശനമാകാമെന്ന് വാദിക്കുന്നതും.