കെ.എം ഷാജിയെ അയോഗ്യനാക്കിയ ഹൈക്കോടതി നടപടിയില്‍ തൃപ്തിയുണ്ടെന്നും രണ്ടര വര്‍ഷത്തെ നിയമപോരാട്ടം ഫലം കണ്ടെന്നും എം.വി നികേഷ് കുമാര്‍. കഴിഞ്ഞ നിയമസഭാ തെരഞ്ഞെടുപ്പില്‍ സി.പി.എം സ്ഥാനാര്‍ത്ഥിയായാണ് നികേഷ് മത്സരിച്ചത്. അതേസമയം തന്നെ വിജയിയായി പ്രഖ്യാപിക്കണമെന്നാണ് കോടതിയോട് ആവശ്യപ്പെട്ടതെന്നും അത് അംഗീകരിച്ചില്ലെന്നും നികേഷ് കണ്ണൂരില്‍ പ്രതികരിച്ചു. തെരഞ്ഞെടുപ്പ് പ്രചരണ ഘട്ടംമുതല്‍ യു.ഡി.എഫ് തനിക്കെതിരെ വ്യക്തിഹത്യനടത്തിയെന്നും വര്‍ഗീയ പ്രചരണം അഴിച്ചുവിട്ടെന്നും അദ്ദേഹം ആരോപിച്ചു. അതിനെയാണ് കോടതിയില്‍ ചോദ്യം ചെയ്തത്. 

മാധ്യമപ്രവര്‍ത്തകന്‍ എന്നനിലയില്‍ നമ്മള്‍ കാണുന്നത് പോലെയല്ല തെരഞ്ഞെടുപ്പ് രംഗം. നമ്മള്‍ കാണാത്ത ചുഴികള്‍ തെരഞ്ഞെടുപ്പിന്റെ ഘട്ടത്തില്‍ കാണാനായി. മതാതിഷ്ഠിത രാഷ്ട്രീയ പാര്‍ട്ടിയും മതേതരപാര്‍ട്ടിയും തമ്മില്‍ മത്സരിക്കുമ്പോള്‍ മതാതിഷ്ഠിത പാര്‍ട്ടിക്ക് കൂടുതല്‍ പ്രാമുഖ്യം കിട്ടുന്നു. ഇത് വലിയ വിഷയമാണ്. അതേക്കുറിച്ച് പഠനങ്ങള്‍ നടത്തണമെന്നും നികേഷ്‌കുമാര്‍ ആവശ്യപ്പെട്ടു. പിതാവ് എം.വി രാഘവനുമായി ബന്ധപ്പെട്ട പരിപാടികള്‍ക്ക് കണ്ണൂരില്‍ എത്തിയതായിരുന്നു നികേഷ് കുമാര്‍.

തെരഞ്ഞെടുപ്പ് സമയത്ത് കരുത്തായി നിന്ന കണ്ണൂരിലെ എല്‍.ഡി.എഫ് പ്രവര്‍ത്തകരോട് ഏറെ നന്ദിയുണ്ട്, അതോടൊപ്പം അഭിഭാഷകനായ ഗോപാലകൃഷ്ണക്കുറുപ്പ്, തെരഞ്ഞെടുപ്പിലെ വര്‍ഗീയത ചൂണ്ടിക്കാട്ടി കോടതിയെ സമീപിച്ച വോട്ടറായ പ്രൊഫ. ടി.വി ബാലന്‍, അദ്ദേഹത്തിന്റെ അഭിഭാഷകന്‍ വര്‍ഗീസ് എന്നിവരോടും നന്ദി അറിയിക്കുന്നു. തെരഞ്ഞെടുപ്പ് ന്യായമായാല്ല നടന്നത് എന്ന ഉത്തമബോധ്യത്തിന്റെ അടിസ്ഥാനത്തിലാണ് ഹൈക്കോടതിയില്‍ ഹര്‍ജി നല്‍കിയതെന്നും നികേഷ് പറഞ്ഞു.

വിധിക്കെതിരെ നിയമപോരാട്ടം തുടരുമെന്ന് കെ.എം ഷാജിയും യു.ഡി.എഫും പ്രതികരിച്ചിട്ടുണ്ടെന്ന കാര്യം മാധ്യമപ്രവര്‍ത്തകര്‍ ശ്രദ്ധയില്‍പ്പെടുത്തിയപ്പോള്‍ , തീര്‍ച്ചയായും അവര്‍ക്ക് അതിനുള്ള അവകാശമുണ്ടെന്നും താനും നിയമപോരാട്ടം തുടരുമെന്നും നികേഷ് പറഞ്ഞു. ഉപതെരഞ്ഞെടുപ്പ് നടത്തണമോ എന്നതടക്കമുള്ള കാര്യം തെരഞ്ഞെടുപ്പ് കമ്മീഷനാണ് തീരുമാനിക്കേണ്ടത്. വിധിയുടെ പകര്‍പ്പ് കിട്ടിയ ശേഷം കൂടുതല്‍ കാര്യങ്ങള്‍ സംസാരിക്കാമെന്നും നികേഷ് പറഞ്ഞു.