ഉരുളയ്ക്കുപ്പേരി പോലെ മറുപടി പറയുന്ന പ്രസംഗം കഴിഞ്ഞ നിയമസഭാ തെരഞ്ഞെടുപ്പില്‍ കെ.എം. ഷാജി മലര്‍ത്തിയടിച്ചത് എം.വി. രാഘവന്റെ മകനും മാധ്യമ പ്രവര്‍ത്തനത്തിലെ തനതു കലകൊണ്ട് മലയാളിക്കു പരിചിതനായ എം.വി. നികേഷ്‌കുമാറിനെ. അതും പിതാവിന്റെ തട്ടകമായ അഴീക്കോട് മണ്ഡലത്തില്‍.

കിണറ്റില്‍ ഉപ്പുവെള്ളമുണ്ടെന്ന് പറഞ്ഞ് കിണറ്റിലിറങ്ങിയ നികേഷിനെ പൊളിച്ചടുക്കി. അന്നു കെ.എം. ഷാജി കളം നിറഞ്ഞത് കൗതുകമായിരുന്നു. കിണറ്റില്‍ നിന്നും തൊട്ടിയില്‍ വെള്ളം കോരിയശേഷം കിണറ്റിലിറങ്ങാതെയും വെള്ളമെടുക്കാം എന്നുപറഞ്ഞ് അതേ കിണറ്റിന്‍ കരയില്‍നിന്ന് ഷാജിയുടെ വീഡിയോ. ആ കിണറ്റിലെ വെള്ളത്തില്‍ ഉപ്പില്ലെന്നും തൊട്ടടുത്ത സി.പി.എം കേന്ദ്രത്തിലെ ഫാക്ടറിയില്‍ നിന്നുവരുന്ന ചായം കലര്‍ന്ന ജലം ആ പ്രദേശത്തുകൂടെ ഒഴുകുന്ന ദൃശ്യവും ഷാജി പകര്‍ത്തി. പഞ്ചായത്തു ഭരിക്കുന്നതും, മെമ്പറും സി.പി.എമ്മും. ഒടുവില്‍ നികേഷും മുട്ടുമടക്കി.

കെ.എം. ഷാജിയുടെ പ്രസംഗങ്ങള്‍ തീപ്പൊരിയാണ്. ഇടിവെട്ടു പ്രസംഗം കൊണ്ട് സദസ്സു കയ്യിലെടുക്കും വയനാടന്‍ പുലിക്കുട്ടിയെന്നാണ് ലീഗുകാര്‍ വിളിക്കുന്നത്. കെ.എം. ഷാജി സി.പി.എമ്മിനെയും, പിണറായിയെയും ആക്രമിച്ചു മുന്നേറുന്ന പ്രസംഗങ്ങള്‍ യു ട്യൂബിലും, സോഷ്യല്‍ മീഡിയയിലും ഏറെ വൈറലാണ്. മുസ്ലീം ലീഗില്‍ സി.പി.എമ്മിനെ ആക്രമിക്കാന്‍ എന്നും തന്റേടം കാട്ടുന്നത് കെ.എം. ഷാജിയാണ്. അതുകൊണ്ടു തന്നെ സി.പി.എമ്മിന്റെ കണ്ണിലെ കരടും. എം.വി. നികേഷ് കുമാറുമായി ഏറ്റുമുട്ടിയപ്പോള്‍ മാധ്യമലോകത്തിന്റെ പിന്തുണ നികേഷിനായിരുന്നു എങ്കിലും തനതു കലയിലുള്ള പ്രസംഗം കൊണ്ട് മണ്ഡലം കയ്യിലെടുത്തു. ഓരോ മീറ്റിംഗുകളിലും ആളുകള്‍ ഇരമ്പിയെത്തി.

സമകാലിക വിവാദ വിഷയങ്ങളില്‍ നിയമസഭയില്‍ പിണറായി സര്‍ക്കാരിനെതിരെ രൂക്ഷ വിമര്‍ശനങ്ങളുയര്‍ത്തി കൈയ്യടി നേടുന്ന ഷാജിയുടെ വെടിക്കെട്ട് എന്നും ഭരണപക്ഷത്തെ ഭയപ്പെടുത്തിയിരുന്നു. ഷാജിയുടെ പ്രസംഗങ്ങള്‍ പതിവായി സോഷ്യല്‍ മീഡിയ ഏറ്റെടുക്കാറുണ്ടായിരുന്നു.
കുറിക്കുകൊള്ളുന്ന ഷാജിയുടെ പ്രസംഗങ്ങളുടെ തുടക്കം ഒരുദാഹരണം. ഞാന്‍ ജനിച്ചു വളര്‍ന്നത് ഉഗാണ്ടയിലൊന്നുമല്ല. വയനാട്ടിലെ കണിയാമ്പറ്റയിലെ മുല്ലഹാജി മദ്രസയില്‍ പത്താംതരവും പഠിച്ചിറങ്ങിയ എന്നെ ആ നാട്ടിലെ ഉസ്താദുമാര്‍ക്കറിയാം. ആ നാട്ടുകാര്‍ക്കറിയാം;

ഒരു ചെറിയ ആവശ്യത്തിന് സംസാരിക്കാന്‍ ഒരിക്കല്‍ മര്‍ഹൂം കാളമ്പാടി ഉസ്താതിനെ കാണാന്‍ പോയതു ഞാനോര്‍ക്കുന്നു. ജാഡകളേതുമില്ലാതെ ചുറ്റും ആള്‍കൂട്ടത്തെ കൂലികൊടുത്ത് നിര്‍ത്തി ആരവത്തിന്റെ ആദരവുണ്ടാക്കാത്ത ആ മഹാ മനീഷി അന്നു പറഞ്ഞു തന്ന ചില കാര്യങ്ങളുണ്ട് ..
എന്റെ ജീവിതത്തില്‍ ചിലപ്പോള്‍ ചിലര്‍ നടത്തുന്ന ബോധപൂര്‍വ്വമായ പ്രകോപനങ്ങളെ അവഗണിക്കുന്നതു ആ വാക്കുകള്‍ നെഞ്ചിലുള്ളതു കൊണ്ടാണു . അതൊരു ദുര്‍ബലതയായി എനിക്കിന്നുവരെ തോന്നിയിട്ടുമില്ല ..
പിളര്‍ന്നതൊന്നും പോര , പിന്നെയും പിന്നെയും പിളര്‍ത്താന്‍ കച്ചകെട്ടിയിറങ്ങുന്നവരെ പലപ്പോഴും അവഗണിക്കുന്നതു അതൊക്കെകൊണ്ടു തന്നെയാണു ..
സമസ്ഥയെയും ലീഗിനെയും ഒക്കെ തമ്മില്‍ തല്ലിച്ചു അതിന്റെ ചലം കുടിചു ജീവിക്കാന്‍ ആഗ്രഹിക്കുന്നവര്‍ കെ എം ഷാജിയെ അതിനുപയോഗിക്കാം എന്നു വിചാരിക്കരുത്
എന്റെ നിലപാടുകള്‍ സുതാര്യവും വ്യക്തവുമാണു !!
ഏതെങ്കിലും ഒരു മതസംഘടനയില്‍ അംഗത്വമെടുത്തു പ്രവര്‍ത്തിക്കുന്നവനല്ല ഞാന്‍ .
സമുദായവുമായി ബന്ധപെട്ട വിഷയങ്ങളില്‍ ശരിയെന്നു തോന്നുന്ന ബോധ്യങ്ങള്‍ ഇനിയും പറഞ്ഞുകൊണ്ടെയിരിക്കും , അതേതു കൊമ്പത്തവന്റെ മുന്നിലായാലും ..
അതു തെറ്റാണെങ്കില്‍ തിരുത്തിതരാന്‍ അവകാശമുള്ള പണ്ഡിത നേതൃത്വവും ഇവിടെയുണ്ട് .
സമുദായത്തെ കൊണ്ടുപോയി സി പി എമ്മിന്റെ ആലയില്‍ കെട്ടാന്‍ അച്ചാരം വാങ്ങിയവര്‍ ഉപദേശകരുടെയും വിമര്‍ശ്ശകരുടെയുമൊക്കെ വേഷംകെട്ടി വരുന്നത് തിരിച്ചറിയാനുള്ള സാമാന്യ ബുദ്ധിയുള്ളതുകൊണ്ടാണു പലപ്പോഴുമുള്ള ഈ മൗനം :

അതല്ലാതെ ഭീരുത്വമൊ ഉത്തരമില്ലായ്മയൊ ആണെന്നു കരുതി വെറുതെ സന്തോഷിക്കരുത്
പോരാടാനും, വെല്ലുവിളിക്കാനും നെഞ്ചുറപ്പുള്ള ഷാജിക്ക് ഈ കോടതി വിധിയുടെ തിരിച്ചടി കൂടുതല്‍ കരുത്താകും. ഇനിയുള്ള അങ്കങ്ങള്‍ക്ക് ഊര്‍ജമാകും. ഷാജി തീയില്‍ കുരുത്തവനാണ്. ഈ വയനാടന്‍ പുലി പതുങ്ങുന്നത് ഇനിയൊരു മുന്നേറ്റത്തിനാണ്.