ശബരിമലയിലെ പ്രശ്‌നങ്ങള്‍ സംബന്ധിച്ച സത്യവാങ്മൂലം വൈകി സമര്‍പ്പിച്ച എ.ജിയുടെ നടപടിയില്‍ ഹൈക്കോടതിക്ക് കടുത്ത അതൃപ്തി. പതിനൊന്നാം മണിക്കൂറിലാണോ സത്യവാങ്മൂലം നല്‍കുന്നതെന്ന് കോടതി ചോദിച്ചു. രേഖകള്‍ ശേഖരിക്കാന്‍ വൈകിയത് കൊണ്ടാണെന്ന് എ.ജി വിശദീകരിച്ചെങ്കിലും സത്യവാങ്മൂലം പരിശോധിക്കുന്നതും ഹര്‍ജികള്‍ പരിഗണിക്കുന്നതും തിങ്കളാഴ്ചത്തേക്ക് മാറ്റി.

പരിശോധിക്കണമായിരുന്നെങ്കില്‍ ഇന്നലെ സത്യവാങ്മൂലം സമര്‍പ്പിക്കണമായിരുന്നെന്ന് കോടതി പറഞ്ഞു. അതോടൊപ്പം ഹര്‍ജിക്കാരെയും കോടതി വിമര്‍ശിച്ചു. നിമയം കയ്യിലെടുക്കരുതെന്നാണ് കോടതി അവരോട് ആവശ്യപ്പെട്ടത്. ശബരിമലില്‍ ചിലര്‍ക്ക് സ്വകാര്യ താല്‍പര്യമുണ്ട്. അതിന് മുന്നില്‍ കണ്ണ് കെട്ടി നോക്കി നില്‍ക്കാനാവില്ലെന്നും കോടതി വ്യക്തമാക്കി. 

ശബരിമലയില്‍ സമാധാന അന്തരീക്ഷം നിലനില്‍ക്കണം. അതിനായി എല്ലാവരും സഹകരിക്കണം. ദേവസ്വം ഫണ്ട് കോടതിയുടെ അനുമതിയില്ലാതെ ചെലവഴിക്കരുത്. തുടങ്ങിയ നിര്‍ദ്ദേശങ്ങളും ഹൈക്കോടതി നിര്‍ദ്ദേശിച്ചു. ശബരിമലയിലെ സ്ഥിതി പരമദയനീയമെന്ന് ഹൈക്കോടതി രണ്ട് ദിവസം മുമ്പ് എ.ജിയോട് പറഞ്ഞിരുന്നു. അന്ന് അദ്ദേഹത്തെ കോടതി വിമര്‍ശിക്കുകയും ചെയ്തിരുന്നു. എ.ജി പറയുന്നത് പോലെയല്ല കാര്യങ്ങളെന്നും ചില പൊലീസ് ഉദ്യോഗസ്ഥര്‍ നിയമം കയ്യിലെടുക്കുകയാണ്. ഹൈക്കോടതി നിര്‍ദ്ദേശങ്ങള്‍ പാലിക്കുന്നില്ല. രേഖാമൂലം ഉത്തരവിടാത്തത് നിങ്ങളിലുള്ള വിശ്വാസം കൊണ്ടാണ്. കോടതി നിര്‍ദ്ദേശങ്ങള്‍ മനസിലായോ? നിരോധനാജ്ഞ നടപ്പാക്കിയത് ശരിയായ രീതിയിലാണോ? നിരോധനാജ്ഞയുടെ പേരിലുള്ള നിയന്ത്രണങ്ങള്‍ നിയമപരമാണോ? കഴിഞ്ഞ ദിവസം മുംബയില്‍ നിന്ന് വന്ന ഭക്തര്‍ മടങ്ങിയതെന്ത് കൊണ്ട്? ഇതരസംസ്ഥാന ഭക്തര്‍ ദര്‍ശനം നടത്താതെ മടങ്ങിയോ എന്നും കോടതി ചോദിച്ചിരുന്നു.

മണ്ഡലകാലത്ത് സംഘര്‍ഷത്തിന് സാധ്യതയുണ്ടെന്ന് രഹസ്യാന്വേഷണ റിപ്പോര്‍ട്ടുണ്ട്. ചിത്തിരആട്ട വിശേഷത്തിനും തുലാമാസ പൂജയ്ക്കും സംഘര്‍ഷം ഉണ്ടായി. ഇതാണ് നിയന്ത്രണം ഏര്‍പ്പെടുത്താന്‍ കാരണമായതെന്നും എ.ജി അന്ന് പറഞ്ഞു. എ.ജിയുടെ സ്ഥാനം മഹനീയമാണ്. കോടതി നിര്‍ദ്ദേശങ്ങള്‍ എ.ജി ബന്ധപ്പെട്ട ഉദ്യോഗസ്ഥരെ അറിയിച്ചില്ലേ എന്നും കോടതി ചോദിച്ചു. എ.ജിക്ക് വലിയ സ്ഥാനമാണ് കോടതിയിലുള്ളതെന്നും കോടതി ഓര്‍മിപ്പിച്ചു. അതിനാല്‍ വിശദമായ സത്യവാങ്മൂലം നല്‍കണമെന്നും കോടതി ആവശ്യപ്പെട്ടു. തുടര്‍ന്നാണ് ഇന്ന് സത്യവാങ്മൂലം സമര്‍പ്പിച്ചത്.