ജലവിഭവമന്ത്രി മാത്യൂ ടി.തോമസിനെ മന്ത്രി സ്ഥാനത്ത് നിന്ന് നീക്കുന്നതായി ജെ.ഡി.എസ് ദേശീയ ജനറല്‍ സെക്രട്ടറി ഡാനിഷ് അലി. തീരുമാനം എല്‍.ഡി.എഫ് കണ്‍വീനറെയും മുഖ്യമന്ത്രിയേയും അറിയിച്ചിട്ടുണ്ടെന്നും അദ്ദേഹം വാര്‍ത്താസമ്മേളനത്തില്‍ അറിയിച്ചു. മുമ്പുണ്ടായിരുന്ന ധാരണപ്രകാരമാണ് മാത്യു ടി.തോമസിനെ മാറ്റിയത്. പകരം കെ.കൃഷ്ണന്‍ കുട്ടി മന്ത്രിയാകും.

ദേശീയനേതൃത്വം ഇടപെട്ടശേഷമാണ് മാത്യു ടി.തോമസ് സമ്മതം അറിയിച്ചത്. മുമ്പും പാര്‍ട്ടി തീരുമാനങ്ങള്‍ അനുസരിച്ചിട്ടുണ്ടെന്നും അദ്ദേഹം വാര്‍ത്താസമ്മേളനത്തില്‍ അറിയിച്ചു. ദേവഗൗഡയുടെ വിശ്വസ്ഥനായിരുന്നു മാത്യു ടി.തോമസ്. എന്നാല്‍ കഴിഞ്ഞ ദിവസം ഗൗഡ ചര്‍ച്ചയ്ക്ക് വിളിച്ചപ്പോള്‍ മാത്യു ടി.തോമസ് പോയില്ല. സംസ്ഥാന അധ്യക്ഷന്‍ കെ.കൃഷ്ണന്‍കുട്ടിക്കൊപ്പം ചര്‍ച്ചയ്ക്ക് തയ്യാറല്ലെന്ന് അദ്ദേഹം ഗൗഡയെ അറിയിച്ചു. ഇത് അദ്ദേഹത്തിന് ഇഷ്ടപ്പെട്ടില്ലെന്നാണ് അറിയുന്നത്.

കഴിഞ്ഞ എല്‍.ഡി.എഫ് സര്‍ക്കാരിന്റെ കാലത്ത് ഗതാഗതവകുപ്പ് മന്ത്രിയായിരുന്ന മാത്യു ടി.തോമസിനെ എം.പി വീരേന്ദ്രകുമാറിന്റെ നിര്‍ബന്ധപ്രകാരം രണ്ട് വര്‍ഷം കഴിഞ്ഞപ്പോള്‍ മാറിയിരുന്നു. ചിറ്റൂര്‍ എം.എല്‍.എയായ കെ.കൃഷ്ണന്‍കുട്ടിക്ക് ഒപ്പമാണ് സംസ്ഥാനത്തെ കൂടുതല്‍ ജില്ലാ പ്രസിഡന്റ്മാരും അവരുടെയെല്ലാം തീരുമാനപ്രകാരമാണ് മാത്യു ടി. തോമസിനെ മാറ്റിയത്. അദ്ദേഹത്തെ നിലനിര്‍ത്തണമെന്നാണ് മുഖ്യമന്ത്രി പിണറായി വിജയന്‍ ആവശ്യപ്പെട്ടത്. കാരണം മാത്യു ടി.തോമസിന്റെ അഴിമതിവിരുദ്ധ പ്രതിച്ഛായയായിരുന്നു. എന്നാല്‍ പാര്‍ട്ടിയുടെ ധാരണപ്രകാരം മാറണമെന്ന് സംസ്ഥാന ഘടകം ആവശ്യപ്പെട്ടു. ഇതേ തുടര്‍ന്ന് ഡാനിഷ് അലിയും ദേവഗൗഡയും രണ്ട് തവണ മാത്യു ടി.തോമസിനെ ചര്‍ച്ചയ്ക്ക് വിളിച്ചിരുന്നു. 

മുഖ്യമന്ത്രി പിണറായി വിജയന് കൃഷ്ണന്‍കുട്ടിയോട് അത്ര താല്‍പര്യമില്ല. കാരണം പിണറായിയോളം സീനിയര്‍ നേതാവാണ് കൃഷ്ണന്‍കുട്ടി. അതിനാല്‍ പിണറായിയോട് നേരിട്ട് എന്തും പറയാനും സംസാരിക്കാനും കൃഷ്ണന്‍കുട്ടിക്ക് ആര്‍ജ്ജവമുണ്ട്, വിധേയനായി നില്‍ക്കുകയുമില്ല. മന്ത്രിസ്ഥാനം ഒഴിയുന്നതോടെ മാത്യൂ ടി.തോമസ് ഇനി പാര്‍ട്ടിയില്‍ പിടിമുറുക്കും. പാര്‍ട്ടി പിളര്‍പ്പിലേക്ക് നീങ്ങുമെന്ന ആശങ്ക ദേശീയനേതൃത്വത്തിനുണ്ടായിരുന്നു. ദേശീയനേതൃത്വത്തിന്റേത് ഏകപക്ഷീയമായ നടപടിയാണെന്ന് മാത്യു ടി.തോമസ് വിഭാഗം ആരോപിക്കുന്നു. പാര്‍ട്ടിക്കുള്ളില്‍ നിന്ന് തന്നെ അപമാനിക്കുന്ന നിലപാട് പലരും സ്വീകരിച്ചു. അതിന് പിന്നില്‍ കൃഷ്ണന്‍കുട്ടിയാണെന്ന് മാത്യു ടി.തോമസ് ദേശീയനേതൃത്വത്തിന് പരാതി നല്‍കിയിരുന്നു. 

മാത്യു ടി.തോമസിന്റെ പേഴ്‌സണല്‍ സ്റ്റാഫിലുണ്ടായിരുന്ന ജീവനക്കാരിയെ മന്ത്രിയുടെ ഭാര്യ ജാതിപ്പേര് വിളിച്ച് അധിക്ഷേപിച്ചെന്ന പരാതിക്ക് പിന്നില്‍ കൃഷ്ണന്‍ കുട്ടിയാണെന്ന് അദ്ദേഹം ആരോപിക്കുന്നു. പാര്‍ട്ടിയുടെ സംസ്ഥാന കമ്മിറ്റി തിരുവനന്തപുരത്ത് നടന്നപ്പോള്‍ പരാതിക്കാരി എത്തിയിരുന്നു. ഇതിന് പിന്നില്‍ കൃഷ്ണന്‍കുട്ടിയും സി.കെ നാണുവും ആയിരുന്നു.

താന്‍ അഴിമതിക്കാരനാണെന്ന് വരുത്തിതീര്‍ക്കാന്‍ നോക്കി. സ്ഥലംമാറ്റം ഉള്‍പ്പെടെയുള്ള കാര്യങ്ങളില്‍ മന്ത്രി അനുകൂലനിലപാട് സ്വീകരിച്ചില്ലെന്ന് കേരളത്തിലെ നേതാക്കള്‍ പരാതി ഉന്നിയിച്ചിരുന്നു. യാതൊരുതരത്തിലുമുള്ള അഴിമതിക്കും താന്‍ കൂട്ട് നില്‍ക്കില്ലെന്ന് മാത്യു ടി.തോമസ് നിലപാട് എടുത്തതോടെയാണ് അദ്ദേഹത്തെ ഒഴിവാക്കേണ്ടി വന്നത്.