യുവതികളുടെ ദര്ശനത്തിനായി രണ്ട് ദിവസം; ശബരിമലയില് സ്ത്രീകളുടെ ദര്ശനത്തിന് രണ്ട് ദിവസം മാറ്റി വയ്ക്കാമെന്ന് സംസ്ഥാന സര്ക്കാര് ഹൈക്കോടതിയെ അറിയിച്ചു
ശബരിമലയില് സ്ത്രീകളുടെ ദര്ശനത്തിന് രണ്ട് ദിവസം മാറ്റി വയ്ക്കാമെന്ന് സംസ്ഥാന സര്ക്കാര് ഹൈക്കോടതിയെ അറിയിച്ചു. ശബരിമലയില് എല്ലാ പ്രായത്തിലുമുള്ള സ്ത്രീകള്ക്ക് ദര്ശനം നടത്താന് വേണ്ട നടപടികളെടുക്കാന് നിര്ദേശം നല്കണമെന്നാവശ്യപ്പെട്ട് നാല് യുവതികള് നല്കിയ ഹര്ജിയിലാണ് സ്റ്റേറ്റ് അറ്റോര്ണി സര്ക്കാര് നിലപാട് വ്യക്തമാക്കിയത്.
മൗലിക അവകാശത്തിനൊപ്പം വ്യക്തികളുടെ സുരക്ഷയും പ്രധാനമാണെന്ന് കോടതി ഹര്ജിക്കാരെ അറിയിച്ചു. യുവതീ പ്രവേശന വിഷയത്തില് ഇതുവരെ എന്തുചെയ്തെന്ന് കോടതി ദേവസ്വംബോര്ഡിനോട് ചോദിച്ചു. യുവതീ പ്രവേശനത്തിനു വേണ്ട സൗകര്യങ്ങള് ഒരുക്കിയോ എന്നും കോടതി ബോര്ഡിനോട് ചോദിച്ചു.
അതേസമയം സുപ്രീം കോടതിയുടെ ശബരിമല യുവതീ പ്രവേശന വിധി നടപ്പാക്കുന്നത് തടഞ്ഞ അഞ്ച് പേര്ക്കെതിരേ സുപ്രീംകോടതിയില് കോടതിയലക്ഷ്യ ഹര്ജി ഫയല് ചെയ്തു. ബിജെപി അധ്യക്ഷന് പിഎസ് ശ്രീധരന് പിള്ള, ക്ഷേത്രം തന്ത്രി കണ്ഠരര് രാജീവര്, കൊല്ലം തുളസി, പന്തളം രാജകുടുംബാംഗം രാമരാജ വര്മ്മ, ബിജെപി പത്തനംതിട്ട നേതാവ് മുരളീധരന് ഉണ്ണിത്താന് എന്നിവര്ക്ക് എതിരെയാണ് ഹര്ജി.
ഹര്ജി ഫയല് ചെയ്യാന് അനുമതി നിഷേധിച്ച സോളിസിറ്റര് ജനറലുടെ മറുപടി സഹിതമാണ് അഭിഭാഷകയായ ഗീന കുമാരി, എവി വര്ഷ എന്നിവര് ഹര്ജി സമര്പ്പിച്ചത്. ജസ്റ്റിസ് ഇന്ദു മല്ഹോത്രയുടെ വിധിയെ തെറ്റായി വ്യാഖ്യാനിച്ചു, വിധി നടപ്പാക്കാതിരിക്കാന് പ്രതിഷേധ പ്രകടനങ്ങള് നടത്തി പ്രസംഗിച്ചു എന്നിവയാണ് ഹര്ജിയില് ഒന്നാം കക്ഷിയായ ശ്രീധരന് പിള്ളയ്ക്ക് എതിരായ ആരോപണങ്ങള്. ഭരണഘടന കത്തിക്കുമെന്ന് പറഞ്ഞതിന് മുരളീധരന് ഉണ്ണിത്താനും സ്ത്രീകളെ കീറിയെറിയുമെന്ന് ഭീഷണിപ്പെടുത്തിയത്തിനു കൊല്ലം തുളസിക്കും എതിരെ കോടതിയലക്ഷ്യം ആരോപിക്കുന്നു.
https://www.facebook.com/Malayalivartha
