മാത്യു ടി.തോമസിന്റെ സമ്മതത്തോടെയാണ് അദ്ദേഹത്തെ മന്ത്രി സ്ഥാനത്ത് നിന്ന് നീക്കുന്നതെന്ന് ജെ.ഡി.എസ് ദേശീയ ജനറല്‍ സെക്രട്ടറി ഡാനിഷ് അലി പറയുമ്പോഴും ഇക്കാര്യം താന്‍ അറിഞ്ഞിട്ടില്ലെന്ന് മാത്യു ടി പ്രതികരിച്ചു. ഇതോടെ ജെ.ഡി.എസില്‍ ആകെ ആശയക്കുഴപ്പമാണെന്ന് വ്യക്തമായി. മന്ത്രിയെ മാറ്റണമെന്ന് ധാരണയില്ലാതിരുന്നിട്ടും ദേശീയനേതൃത്വം ഏകപക്ഷീയമായ നിലപാട് സ്വീകരിച്ചതിലുള്ള പ്രതിഷേധത്തിന്റെ ഭാഗമായാണോ അദ്ദേഹം ഇങ്ങനെ പ്രതികരിച്ചതെന്ന് അറിയുന്നു. പാര്‍ട്ടി അധ്യക്ഷന്‍ ദേവഗൗഡയുടെ വിശ്വസ്ഥനായിരുന്ന മാത്യു ടി. തോമസിനെ വെട്ടിയാണ് കൃഷ്ണന്‍കുട്ടി മന്ത്രി കസേരിയില്‍ ഇരിക്കാന്‍ പോകുന്നത്. പാര്‍ട്ടി സംസ്ഥാന ഘടകത്തോട് ചോദിക്കാതെ എം.എല്‍.എമാരെ മാത്രം ചര്‍ച്ചയ്ക്ക് വിളിച്ച് മന്ത്രിയെ മാറ്റിയ ദേവഗൗഡയുടെയും ഡാനിഷ് അലിയുടെയും നടപടി മാത്യു ടി.തോമസും അദ്ദേഹത്തിനൊപ്പം ഉള്ളവരും അംഗീകരിക്കുന്നില്ല.

എന്നാല്‍ സംസ്ഥാന കമ്മിറ്റി ചേര്‍ന്ന് മാത്യു ടി.തോമസിനെ മാറ്റണമെന്ന് തീരുമാനിച്ചതായും ഭൂരിപക്ഷം ജില്ലാ കമ്മിറ്റികളും ഇക്കാര്യം ആവശ്യപ്പെട്ടതായും കൃഷ്ണന്‍കുട്ടി വിഭാഗം പറയുന്നു. സീനിയര്‍ നേതാവായ കൃഷ്ണന്‍കുട്ടി എം.പി വീരേന്ദ്രകുമാറിന്റെ വലംകൈ ആയിരുന്നു. എന്നാല്‍ സി.പി.എം അദ്ദേഹത്തെ വര്‍ഷങ്ങളായി തോല്‍പ്പിച്ചുവരുകയായിരുന്നു. കോണ്‍ഗ്രസിലെ അച്യുതനായിരുന്നു ചിറ്റൂര്‍ മണ്ഡലത്തില്‍ പതിവായി ജയിച്ചിരുന്നത്. കഴിഞ്ഞതവണ അച്യുതന് കാലിടറി. കര്‍ഷകനായ കൃഷ്ണന്‍കുട്ടിക്ക് മണ്ഡലത്തില്‍ നല്ല ബന്ധമാണുള്ളത്. എന്നാല്‍ സി.പി.എമ്മിലെ ചില നേതാക്കള്‍ക്ക് അനഭിമിതനാണ്. 

വി.എസ് മന്ത്രിസഭയില്‍ ഗതാഗതമന്ത്രിയായിരുന്ന മാത്യു ടി തോമസ് കെ.എസ്.ആര്‍.ടി.സി ബസ് വാങ്ങുന്നതിലെ അഴിമതിക്ക് കൂട്ട് നിന്നില്ല. ഇതേ തുടര്‍ന്ന് അന്ന് പാര്‍ട്ടിയില്‍ കരുത്തനായിരുന്ന എംപി വീരേന്ദ്രകുമാറും സംഘവും ഇടപെട്ട് അദ്ദേഹത്തിന്റെ കസേര ഇളക്കി. സന്തേഷത്തോടെ അദ്ദേഹം രാജി വെച്ചു. പിന്നീട് വിരേന്ദ്രകുമാറും മകന്‍ ശ്രേയാംസ്‌കുമാറും യു.ഡി.എഫിലേക്ക് ചേക്കേറി. വീണ്ടും തിരികെ എല്‍.ഡി.എഫിന്റെ വാതില്‍ കടക്കാന്‍ അനുമതി കാത്ത് നില്‍ക്കുകയാണ്. ജെ.ഡി.എസുമായി ലയിക്കണമെന്ന് സി.പി.എം ആവശ്യപ്പെട്ടെങ്കിലും മാത്യു ടി.തോമസ് വിഭാഗം അതിനെ എതിര്‍ത്തു.