ശബരിമലയിലെ പോലീസ് നിയന്ത്രണത്തിനും സംഘര്‍ഷാവസ്ഥയ്ക്കും അയവ് വന്നതോടെ തീര്‍ത്ഥാടക പ്രവാഹം തുടങ്ങി. ഇന്നലെ മാത്രം അര ലക്ഷത്തോളം അയ്യപ്പന്‍മാരെത്തി. വൈകിട്ട് 7വരെ 43,420 തീര്‍ത്ഥാടകര്‍ മലകയറിയെന്നാണ് പൊലീസിന്റെ കണക്ക്. മണ്ഡലപൂജയ്ക്ക് നട തുറന്ന ശേഷം കൂടുതല്‍ തീര്‍ത്ഥാടകര്‍ എത്തിയത് കാര്‍ത്തിക ദിവസമായ ഇന്നലെയാണ്. ഉച്ചകഴിഞ്ഞ് കനത്ത മഴ പെയ്‌തെങ്കിലും തീര്‍ത്ഥാടകരുടെ വരവിനു കുറവുണ്ടായില്ല. സംഘര്‍ഷ സാദ്ധ്യത കണക്കിലെടുത്ത് പമ്പയിലും സന്നിധാനത്തും പൊലീസ് കടുത്ത നിയന്ത്രണങ്ങള്‍ ഏര്‍പ്പെടുത്തിയത് അയ്യപ്പന്‍മാരുടെ വരവിനെ ബാധിച്ചിരുന്നു. നടവരവില്‍ വന്‍ തോതില്‍ കുറവുമുണ്ടായി.
ആന്ധ്ര, തെലുങ്കാന, കര്‍ണാടകം എന്നിവിടങ്ങളില്‍ നിന്നുള്ള തീര്‍ത്ഥാടകരാണ് ദര്‍ശനത്തിനെത്തുവരില്‍ അധികവും. 'ഗജ' ചുഴലിക്കാറ്റും പ്രളയവും തമിഴ്‌നാട്ടില്‍ നിന്നുള്ള തീര്‍ത്ഥാടകര്‍ കുറയാന്‍ മറ്റൊരു കാരണമായി. വെര്‍ച്വല്‍ ക്യൂ വഴി ദര്‍ശനത്തിനുള്ള ഭക്തരുടെ എണ്ണത്തിലും വര്‍ദ്ധനയുണ്ട്. ഗണപതി ക്ഷേത്രത്തോടു ചേര്‍ന്ന് ആഞ്ജനേയ ഓഡിറ്റോറിയത്തിലാണ് വെര്‍ച്വല്‍ ക്യൂവില്‍ ബുക്ക് ചെയ്തവരുടെ രേഖകള്‍ പരിശോധിക്കുന്നത്.