കോട്ടയം ഏറ്റുമാനൂരില്‍ നിയന്ത്രണം വിട്ട കാറിടിച്ച് അമ്മയ്ക്കും മക്കള്‍ക്കും ദാരുണാന്ത്യം . പേരൂര്‍ കാവുമ്പാടം കോളനി സ്വദേശികളായ ലെജി മക്കളായ അന്നു, നീനു എന്നിവരാണ് മരിച്ചത്. മൂവരുടെയും മരണം പേരൂര്‍ ഗ്രാമത്തെ കണ്ണീരിലാഴ്ത്തി. ഏറ്റുമാനൂര്‍ മണര്‍കാട് ബൈപ്പാസില്‍ പേരൂരിന് സമീപമായിരുന്നു അപകടം നടന്നത്. ദാരുണാന്ത്യം നടന്ന ബൈപാസ് റോഡിലും പേരൂര്‍ കാവുംപാടത്തെ ഇവരുടെ വീട്ടിലേക്കും ഒഴുകിയെത്തിയവര്‍ക്ക് കണ്ണീര്‍കയത്തില്‍ മുങ്ങിയ വീട്ടുകാരെ ആശ്വസിപ്പിക്കാനേ കഴിഞ്ഞില്ല. വൈക്കം വാഴമനയിലുള്ള തന്റെ വീട്ടിലേക്ക് പോകാനാണ് ലിജി മക്കളായ അന്നുവിനെയും നൈനുവിനെയും കൂട്ടി വീട്ടില്‍ നിന്നിറങ്ങിയത്. ശിവരാത്രിയായതിനാല്‍ വൈക്കം ക്ഷേത്രത്തില്‍ ദര്‍ശനം നടത്തണമെന്നും പറഞ്ഞാണ് ലിജി പോയത്.

ക്ഷേത്ര ദര്‍ശനം കഴിഞ്ഞ് മടങ്ങുമ്പോഴാണ് അമ്മയെയും രണ്ട് മക്കളെയും കാറിടിച്ച് തെറിപ്പിച്ചത്. മക്കള്‍ അപകട സ്ഥലത്തും അമ്മ ലെജി കോട്ടയം മെഡിക്കല്‍ കോളജ് ആശുപത്രിയിലുമാണ് മരിച്ചത്.ഏറ്റുമാനൂരില്‍ നിന്ന് പേരൂര്‍ ഭാഗത്തേക്ക് വരികയായിരുന്ന കാറാണ് നിയന്ത്രണം വിട്ട് യാത്രക്കാരുടെ മേല്‍ പാഞ്ഞുകയറിയത്. കാര്‍ റോഡില്‍ നിന്ന് ഇരുപതടിയോളം പുറത്തേക്ക് മാറി പുരയിടത്തിലെ മരത്തില്‍ ഇടിച്ചാണ് നിന്നത്.
ശബ്ദം കേട്ട് ഓടിയെത്തിയ സമീപവാസികള്‍ സഹായത്തിനായി അഭ്യര്‍ത്ഥിച്ചെങ്കിലും വാഹനങ്ങള്‍ നിര്‍ത്തിയില്ല. കാര്‍ ഓടിച്ചയാള്‍ക്കും ഗുരുതര പരിക്കുകളുണ്ട്. ഇയാളും ചികിത്സയിലാണ്. പോലീസും ഫോറന്‍സിക് വിദഗ്ധരും സ്ഥലത്തെത്തി തെളിവെടുപ്പ് നടത്തി. മുന്നറിയിപ്പു ബോര്‍ഡുകള്‍ വെക്കാതെ ബൈപ്പാസ് റോഡ് തുറന്നതിനാല്‍ സമീപ പ്രദേശത്ത് അപകടങ്ങള്‍ പതിവാണെന്ന് നാട്ടുകാര്‍ ആരോപിച്ചു


ബിജു ലിജി ദമ്പതികളുടെ മുത്ത മകള്‍ ആതിര എറണാകുളത്ത് ഒരു സ്വകാര്യ കമ്പനിയിലാണ് ജോലി ചെയ്യുന്നത്. മരിച്ച അന്നു വൈക്കം സെന്റ് സേവ്യേഴ്‌സ് കോളേജില്‍ അവസാനവര്‍ഷ ബികോം വിദ്യാര്‍ത്ഥിനിയാണ്. വൈക്കം വാഴമനയില്‍ അമ്മ ലിജിയുടെ തറവാട്ട് വീട്ടില്‍ നിന്ന് പഠിക്കുന്ന അന്നു അവധിക്ക് പേരൂരില്‍ എത്തിയതാണ്. നൈനു കാണക്കാരി വിഎച്ച്എസിയില്‍ പ്ലസ് ടു വിദ്യാര്‍ത്ഥിനിയാണ്. മൂവരുടെയും മൃതദേഹങ്ങള്‍ കോട്ടയം മെഡിക്കല്‍ കോളേജ് ആശുപത്രിയില്‍ പോസ്റ്റ് മോര്‍ട്ടത്തിന് ശേഷം ഇന്ന് ബന്ധുക്കള്‍ക്ക് വിട്ടുകൊടുക്കും.