പാര്‍ട്ടിയിലും മുന്നണിയിലും പിടിനഷ്ടപ്പെട്ട് സി.പി.ഐ സംസ്ഥാന സെക്രട്ടറി കാനംരാജേന്ദ്രന്‍ മുട്ടുമടക്കുന്നു. കൊല്ലം ജില്ലയില്‍ നിന്ന് കാനത്തിനെതിരെ തുടങ്ങിയ പടപ്പുറപ്പാട് സ്ഥാനാര്‍ത്ഥി പട്ടികയായതോടെ പൂര്‍ത്തിയായെന്നാണ് സൂചന. കൊല്ലം ജില്ലാ സെക്രട്ടറിയായിരുന്ന അനിരുദ്ധനെ മാറ്റാനായി ചെന്ന കാനത്തെ നേതാക്കള്‍ കണ്ടംവഴി ഓടിച്ചു. പാര്‍ട്ടിയുടെ ഏറ്റവും ശക്തികേന്ദ്രമായിടത്താണ് ഈ ഗതി വന്നതെന്ന് ഓര്‍ക്കണം. അവസാനം തനിക്ക് നാണക്കേടാവാതിരിക്കാന്‍ കാനം വെള്ളക്കൊടി വീശിയതോടെയാണ് അനിരുദ്ധനെ മാറ്റിയത്. സംസ്ഥാന സെക്രട്ടറിയുടെ തീരുമാനത്തിന് പുല്ലുവില കല്‍പ്പിച്ച ചരിത്രം സി.പി.ഐക്ക് ഉണ്ടായിട്ടില്ല. കാനവും സി.ദിവാകരനും തമ്മിലുള്ള പോര് ഇന്നോ ഇന്നലെയോ തുടങ്ങിയതല്ല. ദിവാകരനെ വെട്ടാനാണ് കഴിഞ്ഞതവണ മന്ത്രിസഭയിലേക്ക് പുതുമുഖങ്ങളെ മാത്രം തെരഞ്ഞെടുത്തത്. 

മലപ്പുറം സമ്മേളനത്തിലും ദിവാകരനും ഇസ്മായിലിനും എതിരെ കാനം ആഞ്ഞടിച്ചു. ഇസ്്മായിലിനെ എല്‍.ഡി.എഫ് യോഗത്തില്‍ പങ്കെടുക്കുന്ന പ്രതിനിധി എന്ന സ്ഥാനത്ത് നിന്ന് പിഴുതെറിഞ്ഞു. ഈ സമയം ദിവാകരന്‍ കാനത്തിനൊപ്പം ചേര്‍ന്ന് പാര്‍ട്ടിയില്‍ പിടിമുറുക്കി. അതിന് വലിയ വിലയാണ് കാനം കൊടുക്കേണ്ടി വന്നത്. സിറ്റിംഗ് എം.പി പരാജയമാണെന്ന് പരസ്യമായി സമ്മതിക്കുന്നതാണ് തൃശൂരിലെ സ്ഥാനാര്‍ത്ഥി നിര്‍ണയം കോണ്‍ഗ്രസും സി.പി.എം സിറ്റിംഗ് എം.പിമാരെ കളത്തിലിറക്കുമ്പോഴാണ് സി.പി.ഐ സിറ്റിംഗ് എം.എല്‍.എമാരെ ഗോദയിലിറക്കിയിരിക്കുന്നത്. മാവേലിക്കരയില്‍ കൊടിക്കുന്നില്‍ സുരേഷിനെ തറപറ്റിക്കാന്‍ പാടാണെങ്കിലും ചെങ്ങറ സുരേന്ദ്രന് വെല്ലുവിളി ഉയര്‍ത്താനാകുമായിരുന്നു. മുമ്പ് അവിടെ നിന്ന് അദ്ദേഹം വിജയിച്ചിട്ടുമുണ്ട്. അത് പരിഗണിക്കാതെ അടൂര്‍ എം.എല്‍.എ ചിറ്റയം ഗോപകുമാറിനെ സ്ഥാനാര്‍ത്ഥിയാക്കേണ്ടി വന്നു കാനത്തിന്. പത്തനംതിട്ട, ആലപ്പുഴ, കൊല്ലം ജില്ലാകമ്മിറ്റികളുടെ തീരുമാനമായിരുന്നു ചിറ്റയം ഗോപകുമാറിന്റെ സ്ഥാനാര്‍ത്തിത്വം. 

തിരുവനന്തപുരം ജില്ലാ കമ്മിറ്റി കാനത്തിനെ വെട്ടാന്‍ അദ്ദേഹത്തെ തന്നെ സ്ഥാനാര്‍ത്ഥി പട്ടികയില്‍ ഒന്നാമനാക്കി. കാനം മത്സരിക്കില്ലെന്ന് ജില്ലാ നേതാക്കള്‍ക്ക് അറായാമായിരുന്നു. അവരുടെ ആഗ്രഹപ്രകാരം അവസാനം ദിവാകരന്‍ തന്നെ സ്ഥാനാര്‍ത്ഥിയായി. ദിവാകരന് കടുത്ത വെല്ലുവിളി ഉയര്‍ത്താനാവുമെന്നാണ് ജില്ലാ നേതൃത്വം വിലയിരുത്തുന്നത്. മാത്രമല്ല കഴിഞ്ഞ തവണ കാശ് വാങ്ങി ബെന്നറ്റ് എബ്രഹാമിനെ സ്ഥാനാര്‍ത്ഥിയാക്കിയതിന് പാര്‍ട്ടി നടപടി ഏറ്റുവാങ്ങേണ്ടിവന്ന സി.ദിവാകരന്‍ ഇത്തവണ സ്ഥാനാര്‍ത്ഥിയുമായി. അതും കാനത്തിന്റെ കൂടെ അംഗീകാരത്തോടു കൂടി. അതിനാല്‍ സ്ഥാനാര്‍ത്ഥിത്വം ദിവാകരനെ സംബന്ധിച്ച് വലിയ വിജയമാണ്. 

പാര്‍ട്ടിയില്‍ കാനത്തിനുള്ള പിടി അയഞ്ഞത് അദ്ദേഹത്തിന്റെ തന്നെ വീഴ്ചകൊണ്ടാണെന്നാണ് സി.പി.ഐയിലെ അടുക്കളരഹസ്യം. മുഖ്യമന്ത്രി പിണറായി വിജയന്റെ ഏകാധിപത്യത്തിനും ധാര്‍ഷ്ട്യത്തിനും മുന്നില്‍ മുട്ടുമടക്കില്ല എന്നതായിരുന്നു കാനത്തിന്റെ വലിയ വിജയം. അത് പാര്‍ട്ടി അണികളിലും നേതാക്കളിലും വലിയ മതിപ്പാണ് ഉണ്ടാക്കിയത്. ലാ അക്കാദമി വിഷയത്തിലും തോമസ് ചാണ്ടിയുടെ രാജിക്കാര്യത്തിലും കാനം ശക്തമായ നിലപാട് എടുക്കുകയും അത് വിജയിക്കുകയും ചെയ്തു. എന്നാല്‍ പിണറായിക്ക് മുന്നില്‍ കാനം അടിയറവ് പറഞ്ഞിരിക്കുകയാണെന്നാണ് അണിയറരഹസ്യം. അതിന്റെ കാരണം എന്തെന്ന് വ്യക്തമല്ല. കാനം പഴയത് പോലെ പിണറായിക്കും സി.പി.എമ്മിനും എതിരെ ചൊറിയാത്തതും അതുകൊണ്ടാണ്.