പ്രളയത്തില് തകര്ന്ന കേരളത്തിന്റെ പുനര്നിര്മാണത്തിനായി ലോകബാങ്ക് 3500 കോടി രൂപ നല്കുമെന്ന് മുഖ്യമന്ത്രി പിണറായി വിജയന്, ജൂണ്, ജൂലൈയോടെ വായ്പ ലഭിച്ചേക്കും
പ്രളയത്തില് തകര്ന്ന കേരളത്തിന്റെ പുനര്നിര്മാണത്തിനായി ലോകബാങ്ക് 3500 കോടി രൂപ നല്കുമെന്ന് മുഖ്യമന്ത്രി പിണറായി വിജയന്. ഈ വര്ഷം ജൂണ്, ജൂലൈയോടെ വായ്പ ലഭിക്കുന്നതിനാവശ്യമായ തുടര് പ്രവര്ത്തനങ്ങള് ഏകോപിപ്പിക്കാന് ചീഫ് സെക്രട്ടറിയെ ചുമതലപ്പെടുത്തിയിട്ടുണ്ടെന്നും മുഖ്യമന്ത്രി അറിയിച്ചു. പ്രളയദുരന്തത്തിന്റെ പശ്ചാത്തലത്തില് വിശദമായ പഠനം യു.എന് ഏജന്സികളും ലോക ബാങ്കും ചേര്ന്ന് നടത്തിയിരുന്നു. ഇതിന്റെ അടിസ്ഥാനത്തില് പുതിയ കേരള നിര്മ്മിതിക്ക് ഏകദേശം 32,000 കോടി രൂപ ആവശ്യമാണെന്ന് കണ്ടെത്തിയിരുന്നു.
പഠനങ്ങളുടെ അടിസ്ഥാനത്തില് സംസ്ഥാന സര്ക്കാര് റീബില്ഡ് കേരള ഇനിഷ്യേറ്റീവ് എന്ന പുനര്നിര്മ്മാണ സംവിധാനത്തിന് രൂപം നല്കുകയുണ്ടായി. 70:30 അനുപാതത്തിലാകും ലോകബാങ്ക് വായ്പ ലഭ്യമാക്കുക. പദ്ധതി പ്രവര്ത്തനത്തിനായി ആകെ 5000 കോടിയിലധികം രൂപ കേരളത്തിന് ഉപയോഗിക്കാനാകും. ഇതിനു പുറമെ, ബൃഹത്തായ പുനര്നിര്മ്മാണത്തിനായി ദുരന്തനിവാരണം, പരിസ്ഥിതി, സ്ഥാപന ശാക്തീകരണം, വിവര സമുച്ചയങ്ങളുടെ ഉപയോഗം എന്നീ നാലു തലങ്ങളും ജലവിഭവം, ജലവിതരണം, സാനിറ്റേഷന്, നഗരമേഖല, റോഡുകളും പാലങ്ങളും, ഗതാഗതം, വനം, കൃഷിയും അനുബന്ധ മേഖലകളും, മത്സ്യബന്ധനം, ഉപജീവനം, ഭൂവിനിയോഗം എന്നീ 11 മേഖലകളും ഉള്പ്പെടുന്ന റീബില്ഡ് കേരള വികസന പദ്ധതിയുടെ കരട് രേഖ മന്ത്രിസഭ പരിഗണിച്ചു.
വായ്പ ലഭ്യമാക്കുന്നതിനു മുന്നോടിയായി അംഗീകരിക്കേണ്ട മുന്നൊരുക്ക പ്രവര്ത്തനങ്ങള്ക്ക് മന്ത്രിസഭ തത്വത്തില് അംഗീകാരം നല്കുകയും തുടര്നടപടികള് സ്വീകരിക്കാന് അതത് വകുപ്പുകളെ ചുമതലപ്പെടുത്തുകയും ചെയ്തു. പുറമ്പോക്കില് താമസിക്കുന്ന പ്രളയബാധിത കുടുംബങ്ങള്ക്ക് അവര് താമസിക്കുന്ന വികസന ബ്ലോക്കില് സര്ക്കാര് ഭൂമി ലഭ്യമാണെങ്കില് ചുരുങ്ങിയത് മൂന്ന് സെന്റോ പരമാവധി അഞ്ച് സെന്റോ പതിച്ചു നല്കാന് തീരുമനിച്ചു. ഇവിടെ പുതിയ വീട് നിര്മ്മിക്കാന് നാലുലക്ഷം രൂപ അനുവദിക്കും. സര്ക്കാര് വക ഭൂമി ലഭ്യമല്ലെങ്കില് ചുരുങ്ങിയത് മൂന്നു സെന്റ് ഭൂമി വാങ്ങുന്നതിന് പരമാവധി ആറുലക്ഷം രൂപയും നല്കുന്നതാണ്. ഇത്തരത്തില് വാങ്ങിയ സ്ഥലത്ത് വീട് നിര്മ്മിക്കാന് പരമാവധി നാലു ലക്ഷം രൂപ അനുവദിക്കാനും തീരുമാനിച്ചു. ഇതിന് വേണ്ടിവരുന്ന ചെലവ് മുഖ്യമന്ത്രിയുടെ ദുരിതാശ്വാസ നിധിയില് നിന്ന് വഹിക്കും.
ഓഖി ദുരന്ത ബാധിതരായ മത്സ്യത്തൊഴിലാളികളുടെ ജീവനോപാധിയുടെ നിലവാരം ഉയര്ത്തുന്നതിനും തൊഴില് പുനഃസ്ഥാപനത്തിനുമായി 120 എഫ്.ആര്.പി ബോട്ടുകള് വാങ്ങുന്നതിന് 7.94 കോടി രൂപ മുഖ്യമന്ത്രിയുടെ ദുരിതാശ്വാസ നിധിയിലെ ഓഖി ഫണ്ടില്നിന്ന് ലഭ്യമാക്കാന് തീരുമാനിച്ചു. വിഴിഞ്ഞം തുറമുഖപ്രദേശത്ത് ഓഖി ദുരന്ത ബാധിതരായ മത്സ്യത്തൊഴിലാളി വിഭാഗത്തിന്റെ ജീവിതസാഹചര്യങ്ങള് പുനഃസ്ഥാപിക്കുന്നതിനായി നാലുകോടി രൂപ അടങ്കല് വരുന്ന ഒരു ആധുനിക സമുദ്ര ഭക്ഷ്യസംസ്കരണ യൂണിറ്റും വിപണന ഔട്ട്ലെറ്റും ആരംഭിക്കുന്നതിനും ഇതിനാവശ്യമായ തുക മുഖ്യമന്ത്രിയുടെ ഓഖി ദുരിതാശ്വാസ ഫണ്ടില്നിന്ന് ലഭ്യമാക്കാനും തീരുമാനിച്ചു.
https://www.facebook.com/Malayalivartha
