കൊച്ചി നഗരം ഇന്ന് മൂടല്‍ മഞ്ഞിനാല്‍ മൂടി. കാഴ്ചയെപ്പോലും ബാധിക്കുന്ന തരത്തില്‍ നെടുമ്പാശേരി വിമാനത്താവളത്തിലും മഞ്ഞുണ്ടെങ്കിലും സര്‍വീസുകളെ ബാധിച്ചിട്ടില്ല. അതേസമയം, മഞ്ഞ് മൂടിയത് ദേശീയ പാതയില്‍ അടക്കം വാഹന ഗതാഗതത്തെ ബാധിച്ചു.

ജലാംശം തീരെ ദൃശ്യമാകാത്തതിനാല്‍ ഇത് മഞ്ഞ് തന്നെയാണോ എന്ന സംശയവും ബലപ്പെട്ടു. ചിലയിടത്ത് നേരിയ ഗന്ധം അനുഭവപ്പെട്ടതായി നാട്ടുകാര്‍ പറയുന്നു. നഗരത്തില്‍ അര്‍ധരാത്രി ഇടിയോടുകൂടിയ മഴയുണ്ടായിരുന്നെങ്കിലും ഇപ്പോള്‍ മഴയ്ക്ക് കുറവുണ്ട്.

കൊച്ചി നഗരത്തില്‍ രാവിലെ കണ്ടത് മൂടല്‍മഞ്ഞെന്നും കാലാവസ്ഥാമാറ്റത്തിന്റെ ഫലമെന്നും കുസാറ്റ് കാലാവസ്ഥാവിഭാഗം അസി.പ്രഫസര്‍ ഡോ. എസ്.അഭിലാഷ് പറഞ്ഞു.

മലിനീകരണമാണ് മഞ്ഞിന്റെ ആപേക്ഷികസാന്ദ്രത കൂട്ടിയത്. പകല്‍സമയത്തെ പൊടിപടലങ്ങള്‍ അന്തരീക്ഷത്തില്‍ വ്യാപിക്കാതെ താഴെ അടിഞ്ഞു കിടക്കുന്നതിനാലാണിത്. ആശങ്കപ്പെടേണ്ട സാഹചര്യമില്ലെന്നും അദ്ദേഹം പറഞ്ഞു.