വാളയാർ പെൺകുട്ടികളുടെ മാതാപിതാക്കൾ മുഖ്യമന്ത്രി പിണറായി വിജയനെ കണ്ട് സിബിഐ അന്വേഷണം എന്ന ആവശ്യം ഉന്നയിച്ചു. 'ആവശ്യപ്പെടുന്നതെന്തും ചെയ്തു തരാമെന്ന് മുഖ്യമന്ത്രി അറിയിച്ചു. ഞങ്ങൾക്ക് നീതി വേണം. ഇനിയൊരു മക്കളും ഇത് പോലെ ആകാൻ പാടില്ല...മുഖ്യമന്ത്രിയിൽ ഉറച്ച വിശ്വാസമുണ്ട്...'.

മാധ്യമങ്ങളുടെ മുന്നിൽ വിതുമ്പിക്കൊണ്ടായിരുന്നു വാളയാർ അമ്മയുടെ പ്രതികരണം.

മുഖ്യമന്ത്രിയുടെ നിലപാടിൽ കേരളം ഉറ്റുനോക്കുകയാണ് , എന്നാല്‍ കോടതിയുടെ പരിഗണനയിലിരിക്കുന്ന വിഷയമാണെന്നും സി.ബി.ഐ അന്വേഷണത്തെ കോടതിയില്‍ സംസ്ഥാനം എതിര്‍ക്കില്ലെന്നും മുഖ്യമന്ത്രി അറിയിച്ചു. പ്രതികളെ വെറുതെ വിട്ടതിനെതിരെ അപ്പീല്‍ നല്‍കുന്നതിനാണ് പ്രഥമ പരിഗണനയെന്നും മുഖ്യമന്ത്രി കുടുംബത്തെ അറിയിച്ചു.

അതേസമയം വാളയാർ കേസിൽ തുടരന്വേഷണം വേണമെന്ന് കോടതിയിൽ ആവശ്യപ്പെടുമെന്ന് ഡിജിപി ലോക്നാഥ് ബെഹ്റ പ്രതികരിച്ചു. കേസിന്റെ വിധി ഇതിനോടകം വന്ന സാഹചര്യത്തിൽ ഹൈക്കോടതിയുടെ അനുമതി ഇല്ലാതെ ഒന്നും ചെയ്യാനാകില്ലെന്നും ഡിജിപി പറഞ്ഞു.