വാളയാറിലെ പിഞ്ച് ബാലികമാരുടെ കൊലപാതകങ്ങള്‍ നമ്മുടെ മനസില്‍ തന്നെയുണ്ട്. ഇതിനിടെ തിരുവനന്തപുരം കഴക്കൂട്ടത്ത് നിന്നാണ് നാടിനെ ഞെട്ടിക്കുന്ന വാര്‍ത്ത പുറത്തുവരുന്നത്. പ്രായപൂര്‍ത്തിയാകാത്ത സ്‌കൂള്‍ വിദ്യാര്‍ഥിനിയെ തട്ടിക്കൊണ്ടുപോയി സംഘം ചേര്‍ന്നു പീഡിപ്പിച്ചെന്ന പരാതിയില്‍ 4 യുവാക്കള്‍ അറസ്റ്റിലായിരിക്കുകയാണ്. വെട്ടുതുറ സ്വദേശി സോജന്‍(23), മര്യനാട് സ്വദേശികളായ അഭിലാഷ്(25), ടോമി(23), നിരഞ്ജന്‍(20) എന്നിവരെയാണു പോക്‌സോ നിയമപ്രകാരം അറസ്റ്റ് ചെയ്തത്.

വെള്ളിയാഴ്ച വൈകിട്ടാണ് സംഭവങ്ങളുടെ തുടക്കം. സ്‌കൂളില്‍ നിന്നു വീട്ടിലേക്കു വരികയായിരുന്ന ഒന്‍പതാം ക്ലാസുകാരിയെയാണ് ബൈക്കില്‍ വന്ന നാലംഗ സംഘം തട്ടിക്കൊണ്ടുപോയത്. ഹോസ്റ്റലില്‍ താമസിച്ചു പഠിക്കുന്ന പെണ്‍കുട്ടി വീട്ടിലേക്കു പോകാന്‍ ഇറങ്ങിയതായിരുന്നു. എന്നാര്‍ ഈ നാലംഗ സംഘം പെണ്‍കുട്ടിയെ തട്ടിക്കൊണ്ടു പോകുകയായിരുന്നു.

പിറ്റേന്നു രാവിലെ കുട്ടിയെ തുമ്പ ഭാഗത്തു റോഡില്‍ ഇറക്കിവിടുകയായിരുന്നു. പെണ്‍കുട്ടി അറിയിച്ചതനുസരിച്ചു വീട്ടുകാര്‍ നല്‍കിയ പരാതിയിന്മേല്‍ അന്വേഷണം നടത്തിയ പൊലീസ് നാലംഗ സംഘത്തെ പിടികൂടുകയായിരുന്നു. കോവളം, വര്‍ക്കല ബീച്ചുകളില്‍ കൊണ്ടുപോയി പീഡിപ്പിച്ചതായാണു വിദ്യാര്‍ഥിനി പൊലീസില്‍ മൊഴി നല്‍കിയിരിക്കുന്നത്. പ്രതികള്‍ ലഹരിമരുന്ന് ഉപയോഗിക്കുന്നവരാണെന്നു വ്യക്തമായിട്ടുണ്ട്.

ആറ്റിങ്ങല്‍ ഡിവൈഎസ്പി കെ.എ.വിദ്യാധരനാണ് അന്വേഷണ ചുമതല. കഠിനംകുളം എസ്എച്ച്ഒ പി.ബി. വിനോദ്കുമാര്‍,എസ്‌ഐ മാരായ പി. അഭിലാഷ്, ജി. സവാദ്ഖാന്‍,കൃഷ്ണപ്രസാദ്, അജയകുമാര്‍ തുടങ്ങിയവരടങ്ങിയ സംഘമാണ് പ്രതികളെ അറസ്റ്റ് ചെയ്തത്.

കുട്ടികള്‍ക്ക് നേരെയുള്ള ലൈംഗിക അതിക്രമങ്ങള്‍ വര്‍ധിച്ച സാഹചര്യത്തില്‍ ലൈംഗിക അതിക്രമങ്ങള്‍ തടയുന്നതിനു വേണ്ടി 2012ല്‍ കൊണ്ടുവന്ന നിയമം ആണ് പോക്‌സോ അഥവാ The Protection of Children from Sexual Offences - POCSO Act. 18 വയസ്സില്‍ താഴെയുള്ളവരെയാണ് ഇതില്‍ കുട്ടികള്‍ എന്നു നിര്‍വചിച്ചിരിക്കുന്നത്. ലൈംഗിക ആക്രമണം, ലൈംഗിക പീഡനം, അശ്ലീലത തുടങ്ങിയ കുറ്റകൃത്യങ്ങളില്‍ നിന്നും കുട്ടികളെ സംരക്ഷിക്കുന്നതിലും അങ്ങനെയുള്ള കുറ്റകൃത്യങ്ങളുടെ വിചാരണയ്ക്കു വേണ്ടി സ്‌പെഷ്യല്‍ കോടതികള്‍ സ്ഥാപിക്കുന്നതിനും അതുമായി ബന്ധപ്പെട്ട മറ്റു കാര്യങ്ങള്‍ക്കും വേണ്ടിയാണ് ഈ നിയമം.

കുട്ടികള്‍ക്കെതിരെയുള്ള ലൈംഗിക കുറ്റകൃത്യങ്ങളെ ഈ നിയമം തരംതിരിച്ച് അതിനുള്ള നടപടിക്രമങ്ങളും ശിക്ഷയും വ്യവസ്ഥ ചെയ്യുന്നു. വകുപ്പ് മൂന്ന് അനുസരിച്ച്, ലൈംഗിക കടന്നു കയറ്റത്തിലൂടെയുള്ള ആക്രമണത്തിന്, ഏഴു വര്‍ഷത്തില്‍ കുറയാത്തതും ജീവപര്യന്തം വരെ ആകാവുന്നതുമായ കാലത്തേക്ക് രണ്ടിലേതെങ്കിലും തരത്തില്‍പ്പെട്ട തടവുശിക്ഷയ്ക്കും വിധേയമാകേണ്ടി വരികയും പിഴ ഈടാക്കുകയും ചെയ്യും. വകുപ്പ് അഞ്ച് അനുസരിച്ച് ഗൌരവകരമായ ലൈംഗിക കടന്നു കയറ്റത്തിലൂടെയുള്ള ആക്രമണത്തിന് 10 വര്‍ഷത്തില്‍ കുറയാത്തതും ജീവപര്യന്തം വരെയാകാവുന്നതുമയ കാലത്തേക്ക് കഠിനതടവും കൂടാതെ പിഴയ്ക്കും വിധേയനാവുകും

ഇന്ത്യന്‍ ശിക്ഷാനിയമം 375 പ്രകാരം 15-18 വയസ്സിനിടയിലുള്ള മുകളില്‍ പ്രായമുള്ള ഭാര്യയുമായുള്ള ലൈംഗികബന്ധം കുറ്റകൃത്യമല്ലെങ്കിലും പോക്‌സോ പ്രകാരം ഇതു കുറ്റകരമാകുന്നു. മാത്രമല്ല പോക്‌സോ പ്രതികള്‍ക്ക് വധ ശിക്ഷ നല്‍കണമേന്ന വാദവും ഇപ്പോള്‍ ശക്തി പ്രാപിക്കുകയാണ്.