അയോധ്യാകേസില് സുപ്രീംകോടതി വിധി വരാനിരിക്കെ, രാജ്യത്ത് സമാധാനം പുലരാനായി കേന്ദ്രസര്ക്കാര് മാധ്യമങ്ങള്ക്കും സോഷ്യല്മീഡിയാ ഗ്രൂപ്പുകള്ക്കും ജാഗ്രതാ നിര്ദ്ദേശങ്ങള് പുറപ്പെടുവിച്ചു
അയോധ്യാകേസില് സുപ്രീംകോടതി വിധി വരാനിരിക്കെ, രാജ്യത്ത് സമാധാനം പുലരാനായി കേന്ദ്രസര്ക്കാര് മാധ്യമങ്ങള്ക്കും സോഷ്യല്മീഡിയാ ഗ്രൂപ്പുകള്ക്കും ജാഗ്രതാ നിര്ദ്ദേശങ്ങള് പുറപ്പെടുവിച്ചു. ബാബറിമസ്ജിദ് തകര്ക്കുന്ന ദൃശ്യങ്ങള് കാണിക്കരുത്. അയോദ്ധ്യ വിധിയുമായി ബന്ധപ്പെട്ടു നടക്കുന്ന ആഘോഷങ്ങളുടെയും പ്രതിഷേധങ്ങളുടെയും ദൃശ്യങ്ങള് കാണിക്കരുത് തുടങ്ങിയ കര്ശന മാധ്യമ വിലക്കാണ് കേന്ദ്ര ഉത്തരവില് പറയുന്നത്. അയോദ്ധ്യ കേസില് അന്തിമവിധി വരാനിരിക്കെ പക്ഷുബ്ധവും, വിദ്വേഷം പ്രചരിപ്പിക്കുന്നതും, തീവ്രവികാരമുണര്ത്തുന്ന വാര്ത്ത സംപ്രേക്ഷണം ചെയ്യുന്നതും രാജ്യത്തിന്റെ മതേതരത്വവും സാമുദായിക ഐക്യവും പൊതുതാത്പര്യവും സംരക്ഷിക്കുന്ന വാര്ത്തകള് നല്കാന് പാടുള്ളൂ എന്നും കേന്ദ്ര വാര്ത്താപ്രഷേപണ അതോറിറ്റിയുടെ കര്ശന മാര്ഗ്ഗനിര്ദേശന ഉത്തരവില് പറയുന്നു.
സുപ്രീംകോടതിയുടെ വിധി വരുന്നതിനു മുന്പ് കോടതി നടപടികള് മുന്നിര്ത്തി ഊഹാപോഹങ്ങള് പ്രചരിപ്പിക്കരുത്. സുപ്രീംകോടതി രേഖകള് പരിശോധിച്ച ശേഷം വാര്ത്തയുടെ ആധികാരികതയും, യാഥാര്ഥ്യവും, കൃത്യതയും മനസിലാക്കിയ ശേഷമോ അല്ലെങ്കില് ചുരുങ്ങിയപക്ഷം നേരിട്ട് കോടതിയില് നിന്നും അറിഞ്ഞതിനു ശേഷമേ കോടതിയുടെ പരിഗണനയിലിരിക്കുന്ന ഈ വിഷയത്തില് റിപ്പോര്ട്ടര്മാരും, എഡിറ്റര്മാരും വാര്ത്തകള് നല്കാന് പാടുള്ളൂ.
വിധിയുമായി ബന്ധപ്പെട്ടതോ, വിധിയുടെ അനന്തരഫലവുമായി ബന്ധപ്പെട്ടതോ ആയ ഊഹാപോഹങ്ങളോ, ഊഹാപോഹങ്ങള് മുന് നിര്ത്തിയുള്ള വാര്ത്തകളോ നല്കാന് പാടില്ല. വിധിയുമായി ബന്ധപ്പെട്ട ഒരു വാര്ത്തകളിലും ബാബറി മസ്ജിദ് തകര്ക്കുന്ന ദൃശ്യങ്ങള് സംപ്രേഷണം ചെയ്യുന്നത് കര്ശനമായി നിരോധിച്ചിരിക്കുന്നു. അയോധ്യാ വിഷയവുമായി ബന്ധപ്പെട്ട് ഏതെങ്കിലും കക്ഷികള് നടത്തുന്ന പ്രതിഷേധങ്ങളുടെയോ, ആഘോഷങ്ങളുടെയോ ദൃശ്യങ്ങള് സംപ്രേക്ഷണം ചെയ്യാന് പാടില്ല.
ഒരു വാര്ത്തയും, പരിപാടികളും ഏതെങ്കിലും സമുദായത്തിന് അനുകൂലമായോ, മുന്വിധിയോടുകൂടിയോ സംപ്രേക്ഷണം ചെയ്യാന് പാടുള്ളതല്ല.
കാഴ്ചക്കാരെ സ്വാധീനിക്കുന്ന രീതിയിലുള്ള ഏതെങ്കിലും തീവ്രമായ നിലപാടുകള് പറയാന് ചര്ച്ചകളില് ആര്ക്കും അനുവാദം നല്കരുത്. തീവ്രവികാരങ്ങള് ഉണര്ത്തുന്ന ചര്ച്ചകളും, വാഗ്വാദങ്ങളും ഒഴിവാക്കണം. മേല്പ്പറഞ്ഞിട്ടുള്ള മാര്ഗ്ഗ നിര്ദേശങ്ങള് പാലിക്കാത്ത ചാനലുകള്ക്കെതിരെയും, മാധ്യമങ്ങള്ക്കെതിരെയും കര്ശന നിയമനടപടികള് സ്വീകരിക്കുമെന്നും ഉത്തരവില് പറയുന്നു.
സോഷ്യല് മീഡിയയില് വിവിധ സുരക്ഷാ അന്വേഷണ വിഭാഗങ്ങളുടെ അതീവ ജാഗ്രതയിലും നിരീക്ഷണത്തിലും ആയിരിക്കും. സുപ്രീം കോടതി വിധിക്ക് അനുകൂലമായോ, പ്രതികൂലമായോ ഹിന്ദു, മുസ്ലിം വിഭാഗത്തില് പെട്ടവരില് പ്രകോപനം ഉളവാക്കുന്ന രീതിയില് പ്രതികരിക്കരുത്. സാമൂഹിക അന്തരീക്ഷം തകര്ക്കുന്ന രീതിയില്, ഫേക്ക് ഐഡികള്കളുടെ സുരക്ഷിതത്വത്തില് ഇരുന്ന് പ്രചാരണം നടത്തുന്നവരെ പേജുകള്, സീക്രട്ട് ഗ്രൂപ്പുകള് വാട്സ്ആപ്പ് , ഫേസ്ബുക്ക് കൂട്ടായ്മകള് തുടങ്ങി എല്ലാ സോഷ്യന് മീഡിയ സംവിധാനങ്ങളും ഉപയോഗിച്ച് കര്ശനമായി നിരീക്ഷിക്കും എന്നാണ് കേന്ദ്ര സര്ക്കാര് മുന്നറിയിപ്പില് പറയുന്നത്. പബ്ലിക്ക് ഗ്രൂപ്പുകളില് ആര് പ്രകോപന പോസ്റ്റിട്ടാലും ഉത്തരവാദിത്വം അഡ്മിന്മാര്ക്കായിരിക്കും. ആരെങ്കിലും കേന്ദ്ര സംവിധാനങ്ങള് നല്കിയ മുന്നറിയിപ്പുകള്ക്ക് വിരുദ്ധമായി ഉള്ള പ്രചാരണങ്ങള് നടത്തിയാല്, യു.എ.പി.എ അടക്കമുള്ള നിയമങ്ങള് പ്രകാരം അകത്ത് പോകും.
https://www.facebook.com/Malayalivartha
