വീടുകളും വ്യാപാര സ്ഥാപനങ്ങളും 24 മണിക്കൂര് ക്യാമറ നിരീക്ഷണത്തില് വരുന്ന സംവിധാനവുമായി പൊലീസ്
സെന്ട്രല് ഇന്ട്രൂഷന് മോണിറ്ററിങ് സിസ്റ്റം എന്ന സംവിധാനത്തിലൂടെ വ്യാപാര സ്ഥാപനങ്ങള്ക്കും വീടുകള്ക്കും 24 മണിക്കൂര് ക്യാമറ നിരീക്ഷണത്തിന് സംവിധാനമൊരുക്കുന്നു പൊലീസ്. ഇതിന്റെ പരീക്ഷണം കൊച്ചിയില് വിജയമായതോടെ അടുത്തയാഴ്ച മുഖ്യമന്ത്രി ഇത് ഔപചാരികമായി ഉദ്ഘാടനം ചെയ്യും
കവര്ച്ചകള് അടക്കം ഏത് അതിക്രമവും ക്യാമറ ശൃംഖലയിലൂടെ കേന്ദ്രീകൃതമായി നിരീക്ഷിച്ച് നടപടിയെടുക്കുന്ന ഒരു സംവിധാനം ഏറെക്കാലമായി കേരള പൊലീസിന്റെ പരിഗണനയില് ഉണ്ടായിരുന്നതാണ്. ഇതിന്റെ വിജയകരമായ പരീക്ഷണത്തിനാണ് കൊച്ചിയിലെ പ്രമുഖ ജ്വല്ലറി വേദിയായത്.
കവര്ച്ച പോലെ എന്ത് അസ്വാഭാവിക ചലനം ശ്രദ്ധയില്പെട്ടാലും പ്രസ്തുത സ്ഥലത്ത് ഘടിപ്പിച്ചിട്ടുള്ള ക്യാമറകളും സെന്സറുകളും പ്രവര്ത്തനക്ഷമമാകും. തുടര്ന്ന് അവിടെ നിന്നുള്ള ദൃശ്യങ്ങള് പൊലീസ് ആസ്ഥാനത്ത്, 24 മണിക്കൂറും പ്രവര്ത്തിക്കുന്ന കണ്ട്രോള് റൂമിലേക്ക് തല്സമയം കൈമാറും. അവിടെ നിന്ന് ബന്ധപ്പെട്ട സ്ഥലത്തെ കണ്ട്രോള് റൂമിലേക്കും ലോക്കല് പൊലീസ് സ്റ്റേഷനിലേക്കും നിമിഷങ്ങള്ക്കുള്ളില് വിവരമെത്തും. അനിഷ്ട സംഭവം നടക്കുന്ന സ്ഥലത്തിന്റെ റൂട്ട് മാപ്പ്, ഫോണ്നമ്പര് അടക്കം വിവരങ്ങളും ഒപ്പം കൈമാറും. ഇത്രയുമായാല് പിന്നെ വൈകാതെ, വഴിതെറ്റാതെ ഏതാനും മിനിറ്റുകള് കൊണ്ട് തൊട്ടടുത്തെല്ലാമുള്ള പൊലീസ് സംഘങ്ങള്ക്ക് ഇതുപോലെ ഇവിടേക്ക് എത്തിച്ചേരാനാകും.
ബഹുനില കെട്ടിടങ്ങളെങ്കില് കവര്ച്ചാശ്രമം നടന്നത് ഏത് ഭാഗത്തെന്ന് തന്നെ കൃത്യമായി തിരിച്ചറിയാം. സുരക്ഷയൊരുക്കേണ്ട സ്ഥലത്തിന്റെ പ്രത്യേകതകള്, ക്യാമറകളുടെ എണ്ണം തുടങ്ങിയവയൊക്കെ പരിഗണിച്ചാകും ആദ്യഘട്ട ചെലവ് കണക്കാക്കുക. അങ്ങനെ സംവിധാനം ക്രമീകരിച്ചു കഴിഞ്ഞാല് പിന്നെ പ്രതിമാസം 500 രൂപയാകും പരിപാലന ചിലവായി പൊലീസ് ഈടാക്കുക. വീടുകള്ക്കും മറ്റ് പൊതുസ്ഥാപനങ്ങള്ക്കുമെല്ലാം ഈ മട്ടില് സുരക്ഷയൊരുക്കാന് കഴിയും. ജില്ലാ കലക്ടര് എസ് സുഹാസ്, പൊലീസ് കമ്മിഷണര് വിജയ് സാക്കേറെ തുടങ്ങിയവരുടെ നേതൃത്വത്തിലായിരുന്നു പരീക്ഷണം.
https://www.facebook.com/Malayalivartha
