വായ്പാ കുടിശിക വരുത്തി എന്ന പേരില് വാഹനവായ്പ അടച്ചു തീര്ത്ത വീട്ടമ്മയെ അറസ്റ്റ് ചെയ്തു, മാനനഷ്ടത്തിനു വേണ്ടിയുള്ള നിയമപോരാട്ടത്തിന് സഹായവുമായി വനിതാ കമ്മിഷന്
കൊല്ലം മാടന്നട സ്വദേശിനി വാഹനവായ്പ അടച്ചു തീര്ത്തിട്ടും പൊലീസ് അറസ്റ്റു ചെയ്ത നടപടിക്കെതിരെ വനിതാ കമ്മിഷന് രംഗത്തെത്തി. ബാങ്ക് ഉദ്യോഗസ്ഥരുടെ വീഴ്ച മൂലമാണ് കോടതിയില് നിന്ന് വാറണ്ട് പുറപ്പെടുവിക്കാന് കാരണമെന്ന് മനസിലാക്കി പൊലീസ് ജാഗ്രതയോടെ പ്രവര്ത്തിക്കേണ്ടിയിരുന്നുവെന്ന് കമ്മിഷന് അംഗം ഷാഹിദാ കമാല് പറഞ്ഞു. വീട്ടമ്മയ്ക്ക് ഉണ്ടായ ദുരനുഭവം ഒരു പ്രമുഖ പത്രം റിപ്പോര്ട്ട് ചെയ്തതോടെയാണ് വനിതാ കമ്മിഷന്റ ഇടപെടല്.
നാദിയയെ വീട്ടില് നിന്നു അറസ്റ്റു ചെയ്ത് പൊലീസ് ജീപ്പില് സ്റ്റേഷനിലെത്തിച്ചത് കഴിഞ്ഞ മാസം പതിനേഴാം തീയതിയാണ്. വായ്പ കുടിശിക വരുത്തിയതിന്റെ പേരിലുള്ള കോടതിയുടെ വാറണ്ട് നടപ്പാക്കാനെത്തിയ പൊലീസ്, കാര്യങ്ങള് മനസിലാക്കി നടപടിയെടുക്കണമായിരുന്നുവെന്ന് ഷാഹിദ കമാല്.
കുടിശിക വരുത്തിയതിന് മൂന്നു വര്ഷം മുന്പ് അയച്ച വക്കീല് നോട്ടീസ് വാറണ്ടായത് ബാങ്ക് ഉദ്യോഗസ്ഥരുടെ ഗുരുതര പിഴവാണ്.
നാദിയയ്ക്ക് മാനനഷ്ടത്തിനു വേണ്ടിയുള്ള നിയമപോരാട്ടത്തിന് വനിതാ കമ്മിഷന് എല്ലാ സഹായവും നല്കും. വീട്ടമ്മയ്ക്കുണ്ടായ ദുരനുഭവത്തില് എച്ച്ഡിഎഫ്സി ബാങ്ക് നേരത്തെ ഖേദം പ്രകടിപ്പിച്ചിരുന്നു.
https://www.facebook.com/Malayalivartha
