പ്രായ പൂര്‍ത്തിയാകാത്ത പെണ്‍കുട്ടിയെ പ്രണയം നടിച്ച് പ്രലോഭിപ്പിച്ച് വീട്ടില്‍ കൊണ്ടുപോയി നിരന്തരം പീഡിപ്പിച്ച യുവാവ് അറസ്റ്റില്‍. തിരുവനന്തപുരം കല്ലമ്പലം തട്ടത്തുമല പറണ്ടക്കുഴി ചരുവിള പുത്തന്‍ വീട്ടില്‍ അന്‍സാഫ് (25) ആണ് അറസ്റ്റിലായത്. പെണ്‍കുട്ടിയെ കഴിഞ്ഞ ദിവസം കാണാതായതിനെതുടര്‍ന്ന് രക്ഷകര്‍ത്താക്കള്‍ പള്ളിക്കല്‍ പൊലീസില്‍ നല്‍കിയ പരാതിയില്‍ കേസെടുത്ത് പള്ളിക്കല്‍ സി.ഐ അജി ജി. നാഥിന്റെ നേതൃത്വത്തില്‍ എസ്.ഐ അനില്‍ കുമാര്‍, ബിജുമോന്‍, പിങ്ക് പോലീസിലെ വനിതാ എസ് ഐ അജിത എന്നിവരടങ്ങുന്ന സംഘം അന്വേഷണം നടത്തുകയും രാത്രിയോടെ യുവാവിനൊപ്പം പെണ്‍കുട്ടിയെ കണ്ടെത്തുകയുമായിരുന്നു. മൊഴിയെടുത്ത ശേഷം പെണ്‍കുട്ടിയെ രക്ഷകര്‍ത്താക്കളോടൊപ്പം വിട്ടയച്ചു. പോക്‌സോ പ്രകാരം യുവാവിനെതിരെ കേസെടുത്തു. മജിസ്‌ട്രേറ്റിനു മുന്നില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

തര്‍ക്കത്തിനിടെ സ്ത്രീയുടെ ദേഹത്ത് തിളച്ചയെണ്ണയൊഴിച്ച യുവാവിനെ വിഴിഞ്ഞം പോലീസ് അറസ്റ്റ് ചെയ്തു. കോവളം സ്വദേശിയായ ബഷീര്‍ (40 ) ആണ് അറസ്റ്റിലായത്. തിളച്ചയെണ്ണ വീണ് ഗുരുതരമായി പൊള്ളലേറ്റ കട്ടച്ചല്‍ക്കുഴി സ്വദേശിനിയായ സതി (42) യെ മെഡിക്കല്‍ കോളേജാശുപത്രിയില്‍ പ്രവേശിപ്പിച്ചു. മുക്കോല പെട്രോള്‍ പമ്പിന് സമീപമുള്ള സതിയുടെ തട്ടുകട യില്‍ കഴിഞ്ഞ ദിവസം വൈകുന്നേരത്തോടെയാണ് സംഭവം നടന്നത്. നേരത്തെ ഇരുവരും ഒരുമിച്ച് താമസിച്ചിരുന്നതായും ഇപ്പോള്‍ തെറ്റലിലായ ഇരുവരും തമ്മില്‍
സാമ്പത്തിക ഇടപാടിനെചൊല്ലിയുള്ള തര്‍ക്കത്തിനിടയില്‍ തട്ടുകടയിലെ പലഹാരം പൊരിച്ചുകൊണ്ടിരുന്ന എണ്ണ സതിയുടെ ദേഹത്തേക്ക് പ്രതി ഒഴിക്കുകയായിരുന്നുവെന്നും പോലീസ് പറഞ്ഞു. സംഭവത്തിന് ശേഷം ഒളിവില്‍ പോയ പ്രതിയെ ഇന്നലെ കസ്റ്റഡിയിലെടുത്ത് കോടതിയില്‍ ഹാജരാക്കി റിമാന്റ് ചെയ്തു. എസ്.ഐ.മാരായ രഞ്ജിത്ത്,സജി,പോലീസുകാരായ കൃഷ്ണകുമാര്‍,അജികുമാര്‍ എന്നിവരടങ്ങിയ സംഘമാണ് പ്രതിയെ കസ്റ്റഡിയിലെടുത്തത്.