കഴിഞ്ഞ ലോക്‌സഭാ തെരഞ്ഞെടുപ്പില്‍ സംസ്ഥാന തെരഞ്ഞെടുപ്പ് കമ്മീഷന് വേണ്ടി അഹോരാത്രം പണിയെടുത്ത വീഡിയോഗ്രാഫര്‍മാര്‍ക്ക് ഇതുവരെ പ്രതിഫലം നല്‍കിയിട്ടില്ല. വാടകയ്‌ക്കെടുത്ത ക്യമാറകളുമായി ജോലി ചെയ്തവര്‍ പട്ടിണിയും പരിവട്ടവുമായി നട്ടം തിരിയുമ്പോള്‍ സംസ്ഥാന മുഖ്യതെരഞ്ഞെടുപ്പ് ഓഫീസറും മറ്റ് ഉദ്യോഗസ്ഥരും അനങ്ങാപാറ നയം സ്വീകരിക്കുന്നു. കേന്ദ്ര തെരഞ്ഞെടുപ്പ് ഫണ്ട് സംസ്ഥാന സര്‍ക്കാര്‍ വകമാറ്റി ചെലവഴിച്ചെന്നും അതിനാല്‍ ഫണ്ടില്ലാതെ സംസ്ഥാന മുഖ്യതെരഞ്ഞെടുപ്പ് ഉദ്യോഗസ്ഥനും മറ്റ് ഉദ്യോഗസ്ഥരും നട്ടംതിരിയുകയാണെന്നും ആരോപണം ഉയര്‍ന്നിട്ടുണ്ട്. ഫോട്ടോഗ്രാഫി രംഗത്തെ സി.ഐ.റ്റി.യു, ഐ.എന്‍.റ്റി.യു.സി യൂണിയനുകളും ഓള്‍ കേരളാ ഫോട്ടോഗ്രാഫേഴ്‌സ് (എ.കെ.പി.എ) അസോസിയേഷനും തെരഞ്ഞെടുപ്പ് ജോലികള്‍ ഭംഗിയായി നിര്‍വഹിച്ചത്.

അഞ്ച് മാസം പിന്നിട്ടിട്ടും പ്രതിഷേധം ശക്തമായതോടെ ചില ജില്ലകളിലേക്ക് ഫണ്ട് അനുവദിക്കുകയും അവിടെ വീഡിയോഗ്രാഫര്‍മാര്‍ക്ക് പണം നല്‍കുകയും ചെയ്തു. എന്നാല്‍ പത്തനംതിട്ട അടക്കമുള്ള ചില ജില്ലകളിലെ കാത്തിരിപ്പിന് അവസാനമുണ്ടായിട്ടില്ല. ദൈനംദിന ആവശ്യങ്ങള്‍ക്ക് പലരോടും കടം വാങ്ങി മിക്കവരും പ്രതിസന്ധിയിലായെന്ന് വീഡിയോഗ്രാഫര്‍മാര്‍ പറഞ്ഞു. കടക്കാരുടെ ശല്യംമൂലം കടുത്ത മാനസിക ബുദ്ധിമുട്ടിലാണ് മിക്കവരും. തെരഞ്ഞെടുപ്പു വിഭാഗത്തില്‍ മുന്‍പ് ജോലിചെയ്തിരുന്ന ചിലര്‍ തങ്ങളുടെ ബില്ല് മനപൂര്‍വം വെച്ചു താമസിപ്പിക്കുകയായിരുന്നെന്ന് സംഘടനകള്‍ പറയുന്നു.

കഴിഞ്ഞ ഏപ്രില്‍ 23 നായിരുന്നു തെരഞ്ഞെടുപ്പ്. ഫലപ്രഖ്യാപനം മേയ് 23 നും. ജില്ലാ കളക്ടറും തെരഞ്ഞെടുപ്പു വിഭാഗവും തങ്ങളുടെ ഉത്തരവാദിത്വം പൂര്‍ത്തിയാക്കി ഫണ്ടിനുവേണ്ടി കാത്തിരിക്കുകയാണ്. ലോക് സഭാ ഇലക്ഷന് കേന്ദ്ര ഇലക്ഷന്‍ കമ്മീഷന്റെ ഫണ്ടാണ് ഉപയോഗിക്കുന്നത്. ജനാധിപത്യ പ്രക്രിയ സുഗമമാക്കുവാന്‍ പങ്കാളികളായ പലരും പണം കിട്ടാതെ വിഷമിക്കുകയാണ്. ഇലക്ഷന്‍ വീഡിയോഗ്രാഫി പൊതുവേ കുറഞ്ഞ നിരക്കിലാണ് എടുക്കുക. തുടര്‍ച്ചയായി ഒരുമാസത്തിലധികം ദിവസം ജോലി ലഭിക്കുന്നതുകൊണ്ടാണ് പലരും ഇതേറ്റെടുക്കുന്നത്. ആദ്യമായാണ് പ്രതിഫലം കിട്ടുവാന്‍ ഇത്ര താമസം ഉണ്ടായതെന്ന് വീഡിയോഗ്രാഫര്‍മാര്‍ പറയുന്നു.

എണ്‍പതിലധികം വീഡിയോഗ്രാഫേഴ്‌സ് ആണ് തെരഞ്ഞെടുപ്പു ജോലി ഭംഗിയായും പരാതിക്കിട നല്‍കാതെയും പൂര്‍ത്തിയാക്കിയത്. തെരഞ്ഞെടുപ്പു കമ്മീഷനെ നേരില്‍ക്കണ്ട് പരാതി നല്‍കുമെന്നും പ്രത്യക്ഷ സമരപരിപാടികളുമായി മുന്നോട്ടുപോകുമെന്നും വിവിധ സംഘടനാ ഭാരവാഹികള്‍ പറഞ്ഞു. വരുന്ന വ്യാഴാഴ്ച സംയുക്ത യോഗംചേര്‍ന്ന് ഭാവി പരിപാടികള്‍ തീരുമാനിക്കുമെന്നും അവര്‍ പറഞ്ഞു.
എന്നാല്‍ കേന്ദ്രഫണ്ട് ലഭിക്കാത്തതുകൊണ്ടാണ് താമസം നേരിടുന്നതെന്നും ഫണ്ട് ലഭിക്കുന്നതിനുള്ള നടപടിക്രമങ്ങള്‍ പുരോഗമിക്കുന്നുണ്ടെന്നും പത്തനംതിട്ട ജില്ലാ കളക്ടര്‍ പി.ബി നൂഹ് പറഞ്ഞു. ഇലക്ഷന്‍ വീഡിയോഗ്രാഫേഴ്‌സിന്റെ പണം എത്രയുംവേഗം നല്‍കുന്നതിനുവേണ്ടിയാണ് ശ്രമിച്ചുകൊണ്ടിരിക്കുന്നതെന്നും അദ്ദേഹം പറഞ്ഞു.