സ്വകാര്യബസ് നിയന്ത്രണംവിട്ടു മറിഞ്ഞ് വിദ്യാര്‍ഥികളടക്കം അന്പതോളം യാത്രക്കാര്‍ക്ക് പരിക്ക്. പാലക്കാട് ചിറ്റൂര്‍ കല്യാണപ്പേട്ട കോരിയാര്‍ച്ചള്ളയില്‍ തിങ്കളാഴ്ച രാവിലെ 8.30നായിരുന്നു അപകടം ഉണ്ടായത്. വണ്ടിത്താവളം പാലക്കാട് വഴി ഓടുന്ന ശ്രീവത്സം എന്ന സ്വകാര്യ ബസാണ് അപകടത്തില്‍പ്പെട്ടത്. ബസുടമ ശശിധരന്‍ (50), വിദ്യാര്‍ഥികളായ നിമ, ഉണ്ണിമായ, മറ്റു യാത്രക്കാരായ പ്രീത (45), കൃഷ്ണന്‍ (55), ശശികുമാര്‍ (60), ദേവു (45) എന്നിവര്‍ക്ക് ഗുരുതര പരിക്കേറ്റു. ഇവരെ വിവിധ ആശുപത്രികളില്‍ പ്രവേശിപ്പിച്ചു.

ശശീധരന്റെ കാലൊടിഞ്ഞതിനെ തുടര്‍ന്ന് കോയന്പത്തൂരിലെ സ്വകാര്യ ആശുപത്രിയിലേക്ക് മാറ്റി. രാവിലെ സ്‌കൂള്‍ സമയമായതിനാല്‍ ബസില്‍ കൂടുതലും വിദ്യാര്‍ഥികളാണുണ്ടായിരുന്നത്.
ചിറ്റൂരില്‍ നിന്നെത്തിയ ഫയര്‍ ഫോഴ്‌സും പോലീസും സമീപവാസികളും ചേര്‍ന്നാണ് ബസിനകത്ത് അകപ്പെട്ടവരെ പുറത്തെടുത്തത്. നിയന്ത്രണം വിട്ട ബസ് റോസിനു വലതു വശത്തെ വൈദ്യുതി പോസ്റ്റിലിടിച്ചശേഷമാണ് മറിഞ്ഞത്.