അമ്പലമുക്കില്‍ വാട്ടര്‍ അതോറിറ്റിയുടെ പൈപ്പ് പൊട്ടി കുടിവെള്ള വിതരണം തടസ്സപ്പെട്ടു. അമ്പലമുക്ക്, കവടിയാര്‍, പേരൂര്‍ക്കട, മുട്ടം, കേശവദാസപുരം. പട്ടം, മെഡിക്കല്‍ കോളേജ്, പരുത്തിപ്പാറ തുടങ്ങിയ സ്ഥലങ്ങളിലാണ് കുടിവെള്ളവിതരണം തടസ്സപ്പെട്ടത്.
ഇന്ന് പുലര്‍ച്ചെ 5.30നാണ് പൈപ്പ് പൊട്ടിയത്. പേരൂര്‍ക്കടയില്‍ നിന്ന് അമ്പലമുക്ക് വഴി കവടിയാറിലേക്കും വെള്ളയമ്പലത്തേക്കും മുട്ടട, പരുത്തിപ്പാറ ഭാഗങ്ങളിലേക്കുള്ള പൈപ്പാണ് പൊട്ടിയത്. ഇങ്ങോട്ടേക്ക് ശുദ്ധജലമെത്തിക്കുന്ന 700 എം.എം പ്രിമോ പൈപ്പിലാണ് ചോര്‍ച്ചയുണ്ടായത്. വാട്ടര്‍ അതോറിറ്റി അറ്റകുറ്റപ്പണി തുടങ്ങിയിട്ടുണ്ട്. ഇന്നു രാത്രിയോടെ ജല വിതരണം പുന:സ്ഥാപിക്കാന്‍ കഴിയുമെന്ന് വാട്ടര്‍ അതോറിറ്റി അറിയിച്ചു.

പൈപ്പ് പൊട്ടിയതിനെത്തുടര്‍ന്നുണ്ടായ ജലപ്രവാഹത്തില്‍ റോഡിന് നടുക്ക് വലിയൊരു കുഴിതന്നെ രൂപപ്പെട്ടു. ലോഡുമായി വന്ന വലിയൊരു ടിപ്പര്‍ ലോറി കുഴിയിലകപ്പെടുകയും ചെയ്തിരുന്നു. ചെറിയ വാഹനങ്ങളാണ് കുഴിയില്‍ വീണിരുന്നെങ്കില്‍ വന്‍ അപകടം തന്നെ ഉണ്ടാകിനിടയുണ്ടായിരുന്നു. കുഴി രൂപപ്പെട്ടതിനാല്‍ അമ്പലമുക്ക് ഭാഗത്ത് ഗതാഗത നിയന്ത്രണമുണ്ട്.