സിസി ടിവി ദൃശ്യങ്ങളില് ഫാത്തിമ രാത്രിയില് മെസ്സ് ഹാളില് തനിച്ചിരുന്ന് കരയുന്ന ദൃശ്യങ്ങള് ഉണ്ടെന്ന് ബന്ധുക്കള്
മദ്രാസ് ഐഐടിയിലെ വിദ്യാര്ത്ഥിനിയായ ഫാത്തിമ ഒരു അധ്യാപകന്റെ പേര് മൊബൈല് ഫോണില് കുറിച്ച് സൂക്ഷിച്ചിരുന്നതായും അയാളുടെ പീഡനം മൂലമാണ് ഫാത്തിമ ജീവനൊടുക്കിയതെന്നും പിതാവ് അബ്ദുള് ലത്തീഫ്. ഇയാള് മിക്ക കുട്ടികളെയും കരയിക്കാറുണ്ട്. മിക്കദിവസങ്ങളിലും ഫാത്തിമ മെസ്സ് ഹാളില് തനിച്ചിരുന്ന് കരയാറുണ്ടായിരുന്നെന്ന് വിവരം ലഭിച്ചിട്ടുണ്ടെന്നും പിതാവ് വ്യക്തമാക്കി. അവിടുത്തെ സിസി ടിവി ദൃശ്യങ്ങള് പരിശോധിച്ചാല് പോലീസിന് വ്യക്തമായ തെളിവ് ലഭിക്കുമെന്നും അദ്ദേഹം പറഞ്ഞു.
കഴിഞ്ഞ ശനിയാഴ്ച രാവിലെയാണ് ചെന്നൈ ഐഐടിയിലെ എം.എ ഹ്യുമാനിറ്റീസ് ആന്റ് ഡവലപ്മെന്റ് സ്റ്റഡീസ് ഒന്നാം വര്ഷ വിദ്യാര്ത്ഥിയായിരുന്ന ഫാത്തീമ ലത്തീഫിനെ ഹോസ്റ്റല് മുറിയില് തൂങ്ങി മരിച്ച നിലയില് കാണപ്പെട്ടത്. ഫാത്തിമയുടെ മരണത്തില് ദൂരൂഹതയുണ്ടെന്നും ആത്മഹത്യാക്കുറിപ്പിലുള്ള അധ്യാപകന്റെ പീഡനത്തെ കുറിച്ച് ഫാത്തിമ മുന്പും സൂചിപ്പിച്ചിട്ടുണ്ടെന്നും ബന്ധുക്കള് പറഞ്ഞു.
ഫാത്തിമയുടെ മരണത്തെ തുടര്ന്ന് ഡിപ്പാര്ട്ടുമെന്റ് അടുത്ത 45 ദിവസത്തേയ്ക്ക് ക്ലാസുകള് റദ്ദാക്കിയത് കേസ് അട്ടിമറിക്കാന് ഉള്ള ഐഐടി അധികൃതരുടെ ഒത്തുകളിയാണെന്ന സംശയമുണ്ട്. പരീക്ഷ ഡിസംബറിലേയ്ക്ക് മാറ്റിയതിലും കുട്ടികളോട് വീട്ടിലേയ്ക്ക് പോകാന് നിര്ദേശം നല്കിയതിലും ദുരൂഹതയുണ്ട്. ഇതെല്ലാം തെളിവ് നശിപ്പിക്കാന് വേണ്ടിയാണെന്നും ലത്തീഫ് ആരോപിച്ചു.
ദേശീയ തലത്തില് ഐഐടി എന്ട്രന്സ് പരീക്ഷയില് ഉയര്ന്ന റാങ്കോടെയാണ് ഫാത്തിമ വിജയിച്ചത്. ക്ലാസിലെ ഏറ്റവും മിടുക്കിയായ കുട്ടിയായിരുന്നു ഫാത്തിമ എന്ന് അധ്യാപകരും പറയുന്നു. ആരോപണ വിധേയനായ അധ്യാപകന്റെ പേപ്പര് ഒഴികെ എല്ലാ പേപ്പറിലും ഫാത്തിമ ക്ലാസില് ഒന്നാമതായിരുന്നു.
ഫാത്തിമയുടെ മരണത്തെ കുറിച്ച് കുട്ടികള്ക്കോ അധ്യാപകര്ക്കോ യാതൊരു അറിവുമില്ല. ക്ലാസുകള് 45 ദിവസത്തേയ്ക്ക് റദ്ദാക്കിയെന്ന ആരോപണം ശരിയല്ലെന്നും ഹ്യുമാനിറ്റീസ് ഡിപ്പാര്ട്ടുമെന്റ് തലവന് ഉമാകാന്ത് ഡാഷ് അറിയിച്ചു. ക്ലാസുകള് പതിവുപോലെ നടക്കുന്നുണ്ട്. ഒരു ക്ലാസും സസ്പെന്റു ചെയ്തിട്ടില്ല. ഫാത്തിമയുടെ ആത്മഹത്യയുമായി ബന്ധപ്പെട്ട് അധ്യാപകരും വിദ്യാര്ത്ഥികളുമായി സംസാരിച്ചിരുന്നു. എന്നാല്, ആര്ക്കും ഇതേക്കുറിച്ച് ഒരു അറിവുമില്ലെന്ന മറുപടിയാണ് ലഭിച്ചിരിക്കുന്നതെന്നും അദ്ദേഹം വ്യക്തമാക്കി.
അതേസമയം, ചെന്നൈ ഐഐടി കുട്ടികളുടെ മരണകേന്ദ്രമാണെന്നായിരുന്നു ഒരു സീനിയര് അധ്യാപകന്റെ പ്രതികരണം. പലവിധ കാരണങ്ങളാല് നിരവധി കുട്ടികളാണ് ഇവിടെ ജീവനൊടുക്കിയത്. ആഗസ്റ്റിലാണ് ഫാത്തിമ ലത്തീഫ് ചെന്നൈ ഐഐടിയില് ഉപരിപഠനത്തിനായി ചേര്ന്നത്.
https://www.facebook.com/Malayalivartha