മുമ്പ് എന്.ഡി.എഫ് പോലുള്ള തീവ്രസ്വഭാവമുള്ള സംഘടനകളുടെ പ്രവര്ത്തകര് സി.പി.എമ്മില് നുഴഞ്ഞുകയറുന്നെന്ന വ്യാപകമായ ആക്ഷേപം പാര്ട്ടിക്കുള്ളില് നിന്ന് തന്നെ ഉയര്ന്നിരുന്നു , ഇപ്പോ മാവോയിസ്റ്റുകളും
മുമ്പ് എന്.ഡി.എഫ് പോലുള്ള തീവ്രസ്വഭാവമുള്ള സംഘടനകളുടെ പ്രവര്ത്തകര് സി.പി.എമ്മില് നുഴഞ്ഞുകയറുന്നെന്ന വ്യാപകമായ ആക്ഷേപം പാര്ട്ടിക്കുള്ളില് നിന്ന് തന്നെ ഉയര്ന്നിരുന്നു. പാര്ട്ടിയെ ദുര്ബലമാക്കാന് ഇത്തരത്തിലുള്ള ശക്തികള് ശ്രമിക്കുന്നെന്നായിരുന്നു ആരോപണം. വീണ്ടും അതുപോലുള്ള പ്രതിസന്ധിയാണ് സി.പി.എം നേരിടുന്നത്. മാവോയിസ്റ്റുകളും എസ്.ഡി.പി.ഐ പ്രവര്ത്തകരും പാര്ട്ടി അംഗത്വം എടുക്കുന്നു, പകല് സി.പി.എമ്മും ഇരുളിന്റെ മറവില് അവരുടെ ഐഡിയോളജി പ്രാവര്ത്തികമാക്കാന് ശ്രമിക്കുകയും ചെയ്യുന്നു. കോഴിക്കോട് പന്തീരങ്കാവില് ബ്രാഞ്ച് കമ്മിറ്റി അംഗങ്ങളായ അലനും താഹയും അറസ്റ്റിലായതോടെയാണ് പാര്ട്ടി വെട്ടിലായത്. ഇത്തരക്കാരെ എങ്ങനെ പ്രതിരോധിക്കുമെന്നറിയാതെ കുഴയുകയാണ് സംസ്ഥാന സെക്രട്ടറി കോടിയേരി ബാലകൃഷ്ണനും മുഖ്യമന്ത്രി പിണറായി വിജയനും.
മാവോയിസ്റ്റുകളുടെ കടന്ന്കയറ്റം സൂക്ഷിക്കണമെന്നും ജാഗ്രതപുലര്ത്തണമെന്നും സി.പി.എം മലബാറിലെ പാര്ട്ടി പ്രവര്ത്തകര്ക്ക് നിര്ദ്ദേശം നല്കുന്നു. ഇതിന്റെ തുടക്കമെന്നോണം കോഴിക്കോട് ജില്ലയിലെ ലോക്കല് കമ്മിറ്റികള് കേന്ദ്രീകരിച്ച് പ്രവര്ത്തകയോഗം വിളിച്ചു. അലനും താഹയ്ക്കും എതിരെ യു.എ.പി.എ ചുമത്തിയതിനെതിരെ പൊതുസമൂഹത്തിന് പുറമേ പാര്ട്ടിയില് നിന്നും എതിര്പ്പുകള് ഉയര്ന്നതോടെ ജില്ലാ കമ്മിറ്റി അന്വേഷണം നടത്തിയിരുന്നു. ഇരുവര്ക്കും മാവോയിസ്റ്റ് ബന്ധം ഉണ്ടെന്ന് കണ്ടെത്തിയിരുന്നു. ഇവരെ പുറത്താക്കാനുള്ള തീരുമാനവും പ്രവര്ത്തക യോഗത്തില് അവതരിപ്പിക്കും. പാര്ട്ടിയുടെയും എസ്.എഫ്.ഐയുടെയും സജീവപ്രവര്ത്തകരായ അലനും താഹയും തീവ്ര ആശയങ്ങളില് എങ്ങനെ വഴിമാറിപ്പോയെന്ന് കണ്ടെത്താന് പാര്ട്ടിക്ക് കണ്ടെത്താനാകാത്തത് സ്വയംവിമര്ശനമായി ഉള്ക്കൊള്ളണമെന്നും യോഗങ്ങളില് പറയുന്നുണ്ട്.
സി.ഐ.ടി.യു, ഇടത് സര്ക്കാര് ജീവനക്കാരുടെ സംഘടനകള് എന്നിവിടങ്ങളില് മാവോയിസ്റ്റുകളും എസ്.ഡി.പി.ഐക്കാരും മറ്റും നുഴഞ്ഞ് കയറിയിട്ടുണ്ടോ എന്ന് പ്രവര്ത്തകരും നേതാക്കളും അന്വേഷിക്കണം. ഇക്കാര്യത്തില് കര്ശന ജാഗ്രത വേണമെന്നും നിര്ദ്ദേശിച്ചിട്ടുണ്ട്. പുതുതായി മെമ്പര്ഷിപ്പ് നല്കുമ്പോള്, പഴയപോലെ സൂഷ്മപരിശോധന ഇല്ലാത്തത് പലയിടങ്ങളിലും ഇത്തരക്കാര്ക്ക് നുഴഞ്ഞ് കയറാന് അവസരം നല്കിയെന്ന വിമര്ശനം പലയിടത്ത് നിന്നും ഉയര്ന്നിട്ടുണ്ട്. ചില സ്ഥലങ്ങളില് മാസ് മെമ്പര്ഷിപ്പ് നല്കുന്നുണ്ട്. അതിലൂടെയാണ് ഇത്തരക്കാര് അംഗത്വം എടുക്കുന്നത്. ഇവരെ കൃത്യമായി നിരീക്ഷിക്കാനുള്ള സംവിധാനം പാര്ട്ടിക്കില്ല. പലരും ഇതുപോലുള്ള കേസുകളില് അറസ്റ്റിലായ ശേഷമായിരിക്കും കാര്യങ്ങള് അന്വേഷിക്കുക. അതിനാല് മെമ്പര്ഷിപ്പുകള് കര്ശനമായ പരിശോധനയ്ക്ക് വിധേയമാക്കണമെന്ന ആവശ്യം പ്രവര്ത്തകരുടെ ഇടയില് നിന്ന് ഉയര്ന്നിട്ടുണ്ട്.
പാര്ട്ടി കുടുംബാഗമായ അലന് എങ്ങനെയാണ് മാവോയിസ്റ്റ് ആശയം പിന്തുടര്ന്നതെന്ന് വീട്ടുകാര്ക്ക് പോലും അറിയില്ല. അത്രയ്ക്ക് സൂഷ്മമായാണ് അവര് പ്രവര്ത്തിക്കുന്നത്. പലപ്പോഴും ഇത്തരക്കാര് പാര്ട്ടിയെ തന്നെ വെട്ടിലാക്കുന്ന സാഹചര്യം സൃഷ്ടിക്കുന്നുണ്ട്. പകല് കമ്മ്യൂണിസ്റ്റും രാത്രി മാവോയിസ്റ്റും എന്നാണ് സി.പി.എം പ്രവര്ത്തകര്ക്കെതിരെ ബി.ജെ.പി നടത്തുന്ന പ്രചരണം. അതിനെ പ്രതിരോധിക്കാനാകാതെ പലയിടങ്ങളിലും നേതാക്കള് കുഴങ്ങിയിരുന്നു. ഭാവിയില് ഇത്തരം സാഹചര്യങ്ങള് ഒഴിവാക്കാന് പ്രാദേശിക നേതാക്കളും പ്രവര്ത്തകരും ജാഗരൂകരായിരിക്കണമെന്ന് സംസ്ഥാന നേതൃത്വം ജില്ലാ ഘടകങ്ങള്ക്ക് നിര്ദ്ദേശം നല്കിയിട്ടുണ്ട്. എന്നാല് ഇത് എത്രത്തോളം പ്രാവര്ത്തികമാകുമെന്ന് കാത്തിരുന്ന് കാണാം.
https://www.facebook.com/Malayalivartha