ചങ്ങനാശേരിയ്ക്കടുത്ത് കുറുമ്പനാടം പുന്നാംചിറയില്‍ വീട് തല്ലിത്തകര്‍ത്ത് വീട്ടുകാരെ ആക്രമിച്ച കേസില്‍ അറസ്റ്റിലായ പുന്നാംചിറ കൊല്ലംപറമ്പ് ഷിന്റോ മാത്യു(22) കഞ്ചാവ് വില്പനയും ക്വട്ടേഷന്‍ അക്രമവുമായി സ്ഥിരം നാട്ടുകാരുടെ സൈ്വര്യജീവിതം കെടുത്തുന്നയാളെന്ന് പോലീസ്.

എതിര്‍ക്കുന്നവരെ സംഘംചേര്‍ന്ന് ആക്രമിക്കും. ഇതിനോടകം കഞ്ചാവ്, വീടാക്രമണം ഉള്‍പ്പെടെ ആറു കേസുകളില്‍ പ്രതിയാണ്. ഇയാളെക്കുറിച്ചുള്ള പരാതി കേട്ട് പോലീസും മടുത്തു.

ഗുണ്ടാ ആക്ടുപ്രകാരം ഇയാളുടെ പേരില്‍ കാപ്പ ചുമത്തുമെന്ന് തൃക്കൊടിത്താനം സിഐ സാജു വര്‍ഗീസ് പറഞ്ഞു.

പുന്നാംചിറ ഭാഗത്ത് കൈനിക്കര വീട്ടില്‍ ജസ്റ്റിന്റെ വീട് മൂന്നംഗസംഘം തല്ലിത്തകര്‍ത്തത് കഞ്ചാവ് വില്പന എതിര്‍ത്തതിനാണ്. വീട്ടില്‍ അതിക്രമിച്ചുകയറിയ സംഘം ജസ്റ്റിന്‍(48), മാതാവ് മേരിക്കുട്ടി (73), മക്കളായ ആബേല്‍, (17), ജോണിച്ചന്‍ (15) എന്നിവരെയും ആക്രമിച്ചിരുന്നു.

തൃക്കൊടിത്താനം സിഐ സാജു വര്‍ഗീസ്, പ്രിന്‍സിപ്പല്‍ എസ്‌ഐ എം.ജെ.ഐജു, എസ് ഐമാരായ ടി.എന്‍.ശ്രീകുമാര്‍, എന്‍.എം.സാബു, സിപിഒ ഡെന്നി എന്നിവരുടെ നേതൃത്വത്തിലുള്ള സംഘമാണ് പ്രതിയെ തിരുവനന്തപുരത്തുനിന്നും അറസ്റ്റു ചെയ്തത്. ഷിന്റോയ്ക്ക് ഒപ്പം അക്രമത്തിന് നേതൃത്വം നല്‍കിയ പുന്നാംചിറ സ്വദേശികളായ ഡാനി, വൈശാഖ് എന്നിവര്‍ ഒളിവിലാണെന്നും ഇവരെ ഉടനെ പിടികൂടുമെന്നും പോലീസ് പറഞ്ഞു.

ഗുണ്ടാനിയമപ്രകാരം തൃക്കൊടിത്താനം പോലീസ് അറസ്റ്റ് ചെയ്ത സബിജിത്തിന്റെ സുഹൃത്താണ് ഷിന്റോയെന്നും തൃക്കൊടിത്താനം സിഐ പറഞ്ഞു.