കെട്ടിക്കിടക്കുന്ന കേസുകള്‍ പിന്‍വലിക്കാന്‍ കോടതിയുടെ അനുമതി തേടും എന്ന തലക്കെട്ട് പത്രങ്ങളിൽ വായിച്ചവർക്ക് പ്രത്യേകിച്ചൊന്നും തോന്നുകയില്ല. എന്നാൽ വാർത്തയുടെ വിശദാംശങ്ങളിലേക്ക് കടക്കുമ്പോഴാണ് സംഗതിയുടെ ഗുട്ടൻസ് പിടികിട്ടുന്നത്.

വ്യക്തമായ മേല്‍വിലാസം ലഭ്യമല്ലാത്തതുകാരണം സമന്‍സ്/വാറന്‍റ് എന്നിവ നടപ്പിലാക്കാന്‍ കഴിയാതെ ദീര്‍ഘനാളായി കെട്ടിക്കിടക്കുന്ന പെറ്റിക്കേസുകളില്‍ കോടതിയുടെ അനുമതിയോടെ പ്രോസിക്യൂഷന്‍ നടപടി അവസാനിപ്പിക്കാന്‍ സംസ്ഥാന പോലീസ് മേധാവി ലോക്നാഥ് ബെഹ്റ എല്ലാ ജില്ലാ പോലീസ് മേധാവിമാര്‍ക്കും നിര്‍ദ്ദേശം നല്‍കിയെന്നാണ് വാർത്ത.

ആവര്‍ത്തിച്ച് സമന്‍സും വാറന്‍റും അയച്ചിട്ടും മേല്‍വിലാസം കണ്ടെത്താന്‍ കഴിയാത്തതിനാല്‍ മാത്രം തീര്‍പ്പാക്കാന്‍ കഴിയാത്ത പെറ്റിക്കേസുകള്‍ ബന്ധപ്പെട്ട പബ്ലിക് പ്രോസിക്യൂട്ടര്‍/അസിസ്റ്റന്‍റ് പബ്ലിക് പ്രോസിക്യൂട്ടര്‍ എന്നിവരുടെ അഭിപ്രായമാരാഞ്ഞ ശേഷം കോടതിയില്‍ അപേക്ഷ നല്‍കി പിന്‍വലിക്കുന്നത് പരിഗണിക്കണമെന്ന് ഹൈക്കോടതി നിര്‍ദ്ദേശിച്ച സാഹചര്യത്തിലാണ് നടപടി. ഹൈക്കോടതിക്ക് ഇത്തരമൊരു ദുഷ്ടലാക്ക് ഒരിക്കലും ഉണ്ടായിരുന്നില്ല. എന്നാൽ രോഗി ഇച്ഛിച്ചതും വൈദ്യൻ കൽപ്പിച്ചതും പാല് എന്ന മട്ടിലാണ് സംസ്ഥാന സർക്കാർ പ്രസ്തുത തീരുമാനത്തെ സ്വീകരിച്ചത്.

കേരളത്തിൽ വ്യക്തമായ മേൽവിലാസമില്ലാതെ കേസുകളിൽ പ്രതിയാകുന്നവർ രാഷ്ട്രീയക്കാരാണ്. ഇതിൽ സഖാക്കളും സംഘികളും ഖദറുകാരും പിന്നിലല്ല. കേസുകളിൽ രാഷ്ട്രീയം ഉള്ളതും ഇല്ലാത്തതും കാണും. രാഷ്ട്രീയ കേസുകളുടെ പേരിൽ കോലാഹലം ഉയർത്തേണ്ട കാര്യമില്ല. ഭരണത്തിലെത്തുമ്പോൾ കേസ് പിൻവലിക്കുക എന്നത് അവരുടെ അവകാശമാണ്. എന്നാൽ ഇതിന്റെ പേരിൽ നിരവധി ക്രിമിനൽ കേസുകളും പിൻവലിക്കപ്പെടും. അവിടെയാണ് അഴിമതിക്ക് കളമൊരുങ്ങുന്നത്.

ഹർത്താലും ബന്ദും നടത്തിയ വേളകളിൽ പൊതു മുതൽ നശിപ്പിച്ചവർക്കെതിരെ രജിസ്റ്റർ ചെയ്ത എല്ലാ കേസുകളും ഇതോടെ അപ്രത്യക്ഷമാകും. നശിപ്പിച്ച സർക്കാർ വാഹനങ്ങളും സർക്കാർ സംവിധാനങ്ങളും നന്നാക്കാൻ ചെലവായ തുക നമ്മൾ നികുതി പണത്തിൽ നിന്ന് നൽകണം. കാരണം പൊതുമുതൽ നശീകരണ നിയമ പ്രകാരം അറസ്റ്റ് ചെയ്ത ആരുടെയും വ്യക്തമായ വിലാസം പോലീസിന്റെ കൈയിൽ കാണില്ല. രാഷ്ട്രീയക്കാരെ പിടിക്കുമ്പോൾ വിലാസം മാറ്റി എഴുതുക പോലീസിന്റെ രാജഭക്തിയുടെ ഭാഗമാണ്. കാരണം ഇന്നത്തെ പ്രതിപക്ഷം നാളത്തെ ഭരണപക്ഷമാണ്. ബി ജെ പി കേന്ദ്രം ഭരിക്കുന്നതിനാൽ അവരെയും പേടി തന്നെ.

വ്യക്തമായ മേൽവിലാസം നൽകാതിരിക്കുന്നത് സ്ഥിരം കുറ്റവാളികളുടെ പതിവാണ്. അവർ തെറ്റായ മേൽവിലാസം നൽകുമെന്ന് മാത്രമല്ല പോലീസുകാരെ വട്ടം ചുറ്റിക്കുകയും ചെയ്യും. കോടതിക്ക് വേണ്ടത് പ്രതിയും തെളിവുമാണ്. പ്രതിയെ കിട്ടിയാൽ മാത്രമാണ് തെളിവിന്റെ കാര്യം വരുന്നത്. പ്രതിയും തെളിവും ഇല്ലാത്തതാണ് സംസ്ഥാനത്തെ ബഹു ക്രിമിനൽ കേസുകളും.

പണം വാങ്ങി വ്യക്തമായ മേൽവിലാ സമില്ലാതെ കേസുകൾ എഴുതി തള്ളാൻ സാഹചര്യം ഒരുക്കുന്ന പോലീസുകാരും നാട്ടിലുണ്ട്. ഇതിൽ നർക്കോട്ടിക്, എക്സൈസ് കേസുകളും ഉൾപ്പെടും. ക്രൈം റെക്കോഡ്സ് ബ്യൂറോയുടെ കണക്കുകൾ പരിശോധിച്ചാൽ മനസിലാക്കാവുന്നതാണ് ഇക്കാര്യം. അധികാരവും സമ്പത്തുമുള്ളവർ കേസിൽ നിന്നും ഊരുമെന്ന് പറയുമെന്നത് ഇതു കൊണ്ടാണ്. ഹൈദരാബാദ് മോഡൽ വ്യാജ ഏറ്റുമുട്ടൽ കേസുകൾ വർധിക്കുന്നത് ഇതു കൊണ്ടാണ്. കാരണം നീതി ന്യായ വ്യവസ്ഥയിൽ വിശ്വാസം നഷ്ടമാകുന്നു.

ചുരുക്കത്തിൽ ചായ കുടിക്കാൻ പണമില്ലാത്ത സർക്കാരിന്റെ കീശ ഇതിലൂടെയും ചോരുമെന്ന് അർത്ഥം.