സാമൂഹ്യനീതി വകുപ്പിന്റെ കീഴില്‍ പ്രവര്‍ത്തിക്കുന്ന തിരുവനന്തപുരം ശ്രീചിത്ര ഹോമിലെ ജീവനക്കാര്‍ക്ക് പത്താം ശമ്പള പരിഷ്‌ക്കരണ ആനുകൂല്യം അനുവദിച്ചുകൊണ്ട് ഉത്തരവ് പുറപ്പെടുവിച്ചതായി ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര്‍ അറിയിച്ചു. ശ്രീചിത്ര ഹോമിലെ സ്റ്റാഫ് പാറ്റേണ്‍ പരിഷ്‌ക്കരിച്ച് ഉത്തരവായതിനെ തുടര്‍ന്നാണ് ജീവനക്കാര്‍ക്ക് പത്താം ശമ്പള പരിഷ്‌ക്കരണ ആനുകൂല്യം അനുവദിച്ച് ഉത്തരവാകുന്നത്. ഇതിലൂടെ ജീവനക്കാരുടെ കുറേനാളായുള്ള ആവശ്യമാണ് സാക്ഷാത്ക്കരിക്കുന്നതെന്നും മന്ത്രി വ്യക്തമാക്കി.

2014 ജൂലൈ 1 ന് നിലവിലുള്ള 80 ശതമാനം ക്ഷാമബത്ത അടിസ്ഥാന ശമ്പളത്തോടൊപ്പം ലയിപ്പിക്കുന്നതാണ്. തുടര്‍ന്നുള്ള ക്ഷാമബത്ത നിരക്കുകള്‍ ധനവകുപ്പിന്റെ ഉത്തരവ് പ്രകാരം അനുവദിക്കുന്നതാണ്. സര്‍വീസ് വെയിറ്റേജ് കണക്കാക്കുന്നത് ശ്രീചിത്ര ഹോമിലെ സേവനം മാത്രമേ കണക്കാക്കുകയുള്ളൂ. സിറ്റി കോമ്പന്‍സേറ്ററി അലവന്‍സിന് നഗര പരിധിയിലുള്ള ഓഫീസിലെ ജീവനക്കാര്‍ക്ക് മാത്രം അര്‍ഹതയുണ്ടായിരിക്കുന്നതാണ്. ഭിന്നശേഷി ജീവനക്കാര്‍ക്ക് പ്രതിമാസം 800 രൂപ സ്‌പെഷ്യല്‍ അലവന്‍സിന് അര്‍ഹതയുണ്ടായിരിക്കും. മറ്റ് അലവന്‍സുകളും ആനുകൂല്യങ്ങളും സര്‍ക്കാരിന്റെ മുന്‍കൂര്‍ അനുമതിയില്ലാതെ അനുവദിക്കാന്‍ പാടില്ല. മുന്‍കൂര്‍ അനുമതിയില്ലാതെ പുതിയ തസ്തികള്‍ സൃഷ്ടിക്കുകയോ തസ്തികകളില്‍ നിയമനം നടത്താനോ പാടില്ലെന്നും ഉത്തരവില്‍ വ്യക്തമാക്കിയിട്ടുണ്ട്.