വഴി തടയൽ കേസിൽ ദേവസ്വം -സഹകരണ വകുപ്പ് മന്ത്രി കടകംപള്ളി സുരേന്ദ്രനെതിരെ തിരുവനന്തപുരം അഡീഷണൽ ചീഫ് ജുഡീഷ്യൽ മജിസ്‌ട്രേട്ട് കോടതി ജാമ്യമില്ലാ അറസ്റ്റ് വാറണ്ട് പുറപ്പെടുവിച്ചു. മന്ത്രിയെ അറസ്റ്റ് ചെയ്യാൻ സംസ്ഥാന ഡി ജി പി ലോക് നാഥ് ബെഹ്റയോടാണ് മജിസ്‌ട്രേട്ട് ജയകൃഷ്ണൻ ഉത്തരവിട്ടത്. മന്ത്രിയെ അറസ്റ്റ് ചെയ്യാതെ വാറണ്ടുത്തരവ് പല ഒഴിവു കഴിവുകൾ കാണിച്ച് ഒന്നര വർഷത്തിലേറെ കാലവിളംബം വരുത്തി പൂജപ്പുര പോലീസ് വാറണ്ട് കോടതിയിൽ മടക്കി നൽകിയതിനാലാണ് ഡി ജി പി യോട് കോടതി ഉത്തരവിട്ടത്. അറസ്റ്റ് വാറണ്ടുത്തരവ് ഡി ജി പി നേരിട്ട് നടപ്പിലാക്കാൻ വിശദ വിവരണം കാണിച്ചുള്ള കത്ത് സഹിതം വാറണ്ടുകൾ ഡി ജി പി ക്ക് അയക്കാൻ കോടതി പ്രോസസ്സ് ക്ലാർക്കിന് നിർദ്ദേശം നൽകി.

മന്ത്രിയടക്കം പതിനഞ്ച് പ്രതികളെ അറസ്റ്റ് ചെയ്ത് ഡിസംബർ 28 നകം കോടതിയിൽ ഹാജരാക്കാനാണ് കോടതി ഉത്തരവ്. അതേ സമയം ദീർഘകാലമായി കോടതിയിൽ ഹാജരാകാത്ത കേസിലെ 3 പ്രതികൾ കോടതി ഉത്തരവ് അറിഞ്ഞ് ജാമ്യക്കാർ സഹിതം കോടതിയിൽ കീഴടങ്ങി. ജാമ്യാപേക്ഷയും മാപ്പപേക്ഷയും സഹിതം കീഴടങ്ങിയ പ്രതികൾക്ക് കർശന ഉപാധികളോടെയും വിചാരണക്ക് ഡിസംബർ 28 മുതൽ കോടതിയിൽ കൃത്യമായി ഹാജരാകണമെന്ന ഉത്തരവോടെയും കോടതി ജാമ്യം നൽകി. സി പി എം പ്രവർത്തകരും നാലും അഞ്ചും ഒമ്പതും പ്രതികളുമായ ഗോപൻ , ബിജു , രാജശേഖരൻ നായർ എന്നിവരാണ് കോടതിയിൽ കീഴടങ്ങിയത്.

മന്ത്രി സുരേന്ദ്രൻ അടക്കം പതിനഞ്ച് പ്രതികൾ ഒളിച്ചു മാറി നടക്കുന്നതിനാൽ അറസ്റ്റ് ചെയ്യാൻ സാവകാശം വേണമെന്ന് ഒന്നര വർഷത്തിലേറെയായി കോടതിയിൽ പൂജപ്പുര പോലീസിന്റെ റിപ്പോർട്ട്. ഒന്നര വർഷത്തിലേറെയായി അനവധി തവണ വാറണ്ടുത്തരവ് നൽകിയിട്ടും പൂജപ്പുര പോലീസ് പ്രതികളായ മന്ത്രിയെയും തിരുവനന്തപുരം മുൻ എം എൽ എ ശിവൻകുട്ടിയടക്കമുള്ള സി പി എം കാരെ അറസ്റ്റ് ചെയ്യാത്തതിനാൽ എല്ലാ പ്രതികളെയും കോടതി പിടികിട്ടാപ്പുള്ളികളായി പ്രഖ്യാപിക്കുന്നതിനും എല്ലാവരുടെയും സ്ഥാവരജംഗമ സ്വത്തുക്കൾ ജപ്തി ചെയ്യാൻ വില്ലേജ് ഓഫീസർമാർക്കും കോടതി നിർദേശം നൽകുന്നതിനും മുന്നോടിയായാണ് ഡി ജി പി ക്ക് വാറണ്ടയച്ചത്. വാറണ്ട് നടപ്പാക്കാൻ കോടതി പറഞ്ഞ കാലാവധി നാലു ദിവസം മാത്രം ശേഷിക്കെ ഡി ജി പി നാളിതു വരെ പ്രതികളെ അറസ്റ്റ് ചെയ്തിട്ടില്ല. അതേ സമയം കേസ് അപ്പാടെ പിൻവലിക്കാൻ ആഭ്യന്തര വകുപ്പ് മന്ത്രിയുടെ ഓഫീസിൽ അണിയറ നീക്കം തുടങ്ങിയതായി ആരോപണമുയരുന്നുണ്ട്.

കടകംപള്ളി സുരേന്ദ്രൻ , ആനാവൂർ നാഗപ്പൻ , പുത്തൻകട വിജയൻ , ഗോപൻ , ബിജു , എസ്. പുഷ്പലത , ദീപക് , ഉണ്ണി എന്ന ഉണ്ണികൃഷ്ണൻ , രാജശേഖരൻ നായർ , പാപ്പച്ചൻ , എ.എ. റഷീദ് , മുൻ എം എൽ എ ശിവൻകുട്ടി , കോലിയക്കോട് കൃഷ്ണൻ നായർ , മീനാംബിക , പത്മകുമാർ എന്നിവരാണ് ഒന്നു മുതൽ പതിനഞ്ച് വരെയുള്ള പ്രതികൾ.

കേസ് 2017 ൽ സാമാജികർ പ്രതികളായ ക്രിമിനൽ കേസുകൾ വിചാരണ ചെയ്യാനായി സുപ്രീം കോടതി നിർദേശ പ്രകാരം ഹൈക്കോടതി രൂപീകരിച്ച എറണാകുളം സ്പെഷ്യൽ കോടതിയിലേക്ക് മാറ്റിയിരുന്നു. തിരുവനന്തപുരം മജിസ്‌ട്രേട്ട് കോടതിയാണ് കൈമാറ്റ സാക്ഷ്യപത്രം തയ്യാറാക്കി മുഴുവൻ കേസ് രേഖകളും സ്പെഷ്യൽ കോടതിക്കയച്ചത്. കേസ് വിചാരണ എറണാകുളം സ്പെഷ്യൽ കോടതിയിൽ നടക്കാനിരിക്കെ സാമാജികൾ പ്രതികളായ ക്രിമിനൽ കേസുകൾ അതാത് ജില്ലകളിൽ തന്നെ വിചാരണ ചെയ്യാൻ പുനർവിജ്ഞാപനം വന്നു. തുടർന്ന് കേസ് രേഖകൾ വീണ്ടും തലസ്ഥാനത്തെ കോടതിയിൽ എത്തി. വിചാരണക്കായി പ്രതികളെ ഹാജരാക്കാൻ ഉത്തരവിട്ടപ്പോഴാണ് പൂജപ്പുര പോലീസ് പ്രതികളുമായി ഒത്തു കളിച്ചത്.

പ്രതികളുടെ വീട് പൂട്ടിക്കിടക്കുന്നു , ഇപ്പോഴത്തെ വാസ സ്ഥലം എവിടെയാണെന്നറിയില്ല ,താമസം മാറിപ്പോയി , പരിസരവാസികളെയും സ്ഥലവാസികളെയും കണ്ടു ചോദിച്ചതിൽ നിലവിലുള്ള വിലാസം അറിയില്ലാലായെന്ന് പറയുന്നു , കേസുണ്ടെന്ന വിവരം മനസ്സിലാക്കി ഒളിച്ചു മാറി നടക്കുന്നു , ഉത്തരവ് നടപ്പിലാക്കാൻ സാവകാശത്തിനായി അപേക്ഷിക്കുന്നു എന്നിങ്ങനെ കളവായ മുടന്തൻ ന്യായങ്ങൾ ഒഴുക്കൻ മട്ടിൽ രേഖപ്പെടുത്തിയാണ് കോടതിയിൽ നിന്നയച്ച സമൻസും വാറണ്ടുത്തരവുകളും പോലീസ് മടക്കിയത്. വാറണ്ട് പ്രതികളെ പിടിക്കാൻ സ്പെഷ്യൽ ഡ്രൈവ് , കോമ്പിംഗ് ഓപ്പറേഷൻ എന്നിവ മാസം തോറും നടത്തി വാറണ്ട് പ്രതികളുടെ എണ്ണം സഹിതം കാണിച്ച് വാർത്താക്കുറിപ്പ് (പ്രസ് റിലീസ് ) പത്ര-ദൃശ്യ മാധ്യമ ഓഫീസുകളിലെത്തിക്കുന്ന സിറ്റി പോലീസ് കമ്മീഷണറും റൂറൽ എസ്പിയും സി പി എം നേതാക്കളും അണികളും പ്രതികളായ കേസുകളുടെ വാറണ്ടുകൾ നടപ്പിലാക്കാതെ പൂഴ്ത്തിവയ്ക്കുന്നുവെന്ന ആരോപണവുമുണ്ട്.

2012 ലാണ് കേസിനാസ്പദമായ സംഭവം നടന്നത്. പൂജപ്പുര ജംഗ്ഷന് മുന്നിലുള്ള പബ്ലിക് റോഡിൽ നേതാക്കളുടെ നേതൃത്വത്തിൽ ന്യായവിരോധമായി സംഘം ചേർന്ന് കാൽനടയാത്രക്കാർക്കും വാഹന ഗതാഗതത്തിനും തടസ്സം സൃഷ്ടിച്ച് ജനങ്ങൾക്ക് ഭരണഘടന വിഭാവനം ചെയ്ത സഞ്ചാര സ്വാതന്ത്ര്യം തടസ്സപ്പെടുത്തിയെന്നും നിയമവിരുദ്ധമായ ജനക്കൂട്ടം പിരിഞ്ഞു പോകണമെന്ന പോലീസിന്റെ ന്യായമായ ആജ്ഞയെ ധിക്കരിച്ച് വഴിതടയൽ തുർന്നുവെന്നുമാണ് കേസ്. 2013 മാർച്ച് 25നാണ് പൂജപ്പുര പോലീസ് കേസിൽ കുറ്റപത്രം സമർപ്പിച്ചത്.