എങ്ങനെ ഒരു കാര്യം നടപ്പിലാക്കാതിരിക്കാം അല്ലെങ്കില് എന്തെങ്കിലും കാര്യം ജനങ്ങള്ക്ക് കൊടുക്കാതിരിക്കാം എന്ന് ഗവേഷണം നടത്തുന്നവര് സര്ക്കാര് സര്വ്വീസിലുണ്ടെന്ന് മന്ത്രി കടകംപള്ളി
എങ്ങനെ ഒരു കാര്യം നടപ്പിലാക്കാതിരിക്കാം അല്ലെങ്കില് എന്തെങ്കിലും കാര്യം ജനങ്ങള്ക്ക് കൊടുക്കാതിരിക്കാം എന്ന് ഗവേഷണം നടത്തുന്നവര് സര്ക്കാര് സര്വ്വീസിലുണ്ടെന്ന് മന്ത്രി കടകംപള്ളി സുരേന്ദ്രന് ആരോപിച്ചു. മിക്കവാറും ആദ്യം ഫയല് കൈകാര്യം ചെയ്യുന്നവര് നെഗറ്റീവ് കുറിപ്പാണ് എഴുതുന്നത്. പ്രൊഫഷണലായി കാര്യങ്ങളെ സമീപിക്കുന്നവര് കുറവാണ്. അത് പരിഹരിക്കുന്നതിനാണ് സംസ്ഥാന സര്ക്കാര് കേരളാ അഡ്മിനിസ്ട്രേറ്റീവ് സര്വ്വീസ് നടപ്പാക്കുന്നതെന്നും മന്ത്രി വ്യക്തമാക്കി. 2020 ഫെബ്രുവരി 22 ന് നടക്കുന്ന കേരള അഡ്മിനിസ്ട്രേറ്റീവ് സര്വ്വീസ് (കെ.എ.എസ്) പ്രിലിമിനറി പരീക്ഷയ്ക്ക് അപേക്ഷ നല്കിയവര്ക്കായി സംസ്ഥാന യുവജനക്ഷേമ ബോര്ഡ് നല്കുന്ന ഓണ്ലൈന് പരിശീലന പരിപാടിയായ ദ വിന്ഡോയുടെ ഉദ്ഘാടനം നിര്വഹിക്കുകയായിരുന്നു മന്ത്രി.
നിലവിലെ ഉദ്യോഗസ്ഥര്ക്ക് കൂടി അവസരം ലഭിക്കുന്ന രീതിയിലാണ് കെ.എ.എസ് സര്ക്കാര് നടപ്പാക്കുന്നത്. എല്.ഡി.എഫിന്റെ പ്രകടനപത്രികയില് ഇക്കാര്യം പറഞ്ഞിരുന്നതാണ്. അതിനാല് കെ.എ.എസ് നടപ്പാക്കേണ്ടത് സര്ക്കാരിന്റെ ഉത്തരവാദിത്തമാണെന്നും മന്ത്രി പറഞ്ഞു. കെ.എ.എസിലേക്ക് കടന്ന് വരാന് യുവജനക്ഷേമബോര്ഡ് യുവാക്കള്ക്ക് മാര്ഗനിര്ദ്ദേശം നല്കാന് തയ്യാറായത് വലിയകാര്യമാണ്. എന്നാല് പരിശ്രമിക്കേണ്ടത് ഉദ്യോഗാര്ത്ഥികളാണെന്നും മന്ത്രി ഓര്മിപ്പിച്ചു. വമ്പന് കമ്പനികള് വലിയ ഫീസ് വാങ്ങിയാണ് ഓണ്ലൈന് കോച്ചിംഗ് നടത്തുന്നത്. കച്ചവടസാധ്യതയാണ് അവരെ ഇതിന് പ്രേരിപ്പിക്കുന്നത്. അതിനാല് സംസ്ഥാന യുവജനക്ഷേമ ബോര്ഡിന് ഈ മേഖലയില് ഇടപെടാന് കഴിഞ്ഞത് വലിയ കാര്യമാണെന്നും മന്ത്രി ചൂണ്ടിക്കാട്ടി.
വി.എസ്. ശിവകുമായ്യ എം.എല്.എ അധ്യക്ഷനായി. ബോര്ഡ് വൈസ് ചെയര്മാന് പി. ബിജു, ഐ.ടി സെക്രട്ടറി എം.ശിവശങ്കര് ഐ.എ.എസ് ലോഗോ പ്രകാശനം നിര്വഹിച്ചു. ഡോ.എ.ജയതിലക് ഐ.എ.എസ്, മുഖ്യപ്രഭാഷണം നടത്തി. ടെക്നോളജി യൂണിവേഴ്സിറ്റി വൈസ് ചാന്സലര് ഡോ.രാജശ്രീ എം.എസ്, കോളേജിയേറ്റ് വിദ്യാഭ്യാസ ഡയറക്ടര് വി. വിഘ്നേശ്വരി ഐ.എ.എസ്, ബോര്ഡ് മെമ്പര് സെക്രട്ടറി മിനിമോള് എബ്രഹാം, ഡെപ്യൂട്ടി ഡയറക്ടര് സി.ആര് രാംകുമാര് എന്നിവര് സംസാരിച്ചു. ഉദ്ഘാടനത്തിനുശേഷം .അലക്സാണ്ടര് ജേക്കബ് ഐ.പി.എസും പ്രൊഫസര് ഗംഗാധരന് നായരും ക്ലാസുകള് എടുത്തു.
കെ.എ.എസിന് അപേക്ഷ നല്കിയിട്ടുള്ള അഞ്ച് ലക്ഷത്തിലധികം യൂവതീ, യുവാക്കള്ക്ക് പരിശീലനം നല്കുകയാണ് ലക്ഷ്യം. സംസ്ഥാന സര്ക്കാരിന്റെ വിവിധ ഓണ്ലൈന് സംവിധാനങ്ങളുടെ സാങ്കേതിക സഹായത്തോടു കൂടിയാണ് പരിശീലന പദ്ധതി സംഘടിപ്പിക്കുന്നത്. 14 ജില്ലകളിലും വെര്ച്വല് ക്ലാസ് റൂമുകള് വഴി പഠന സൗകര്യം ഒരുക്കാനാണ് ശ്രമിക്കുന്നത്. താല്പര്യം ഉള്ളവര് വെബ് സെറ്റില് രജിസ്റ്റര് ചെയ്യാവുന്നതാണ്. രജിസ്ട്രേഷന് ഡിസംബര് 14 മുതല് 18 വരെ ഓണ്ലൈനില് രജിസ്റ്റര് ചെയ്യാവുന്നതാണ്. രജിസ്ട്രേഷന് പൂര്ത്തീകരിക്കുന്ന മുറയ്ക്ക് സെന്ററുകള് അനുവദിക്കുന്നതാണ്. സെന്ററുകളുടെ വിശദാംശങ്ങള് ഡിസംബര് 20ാം തീയതിയോടു കൂടി വെബ്സൈറ്റ് വഴി ലഭ്യമാകും. അഞ്ച് ലക്ഷം അപേക്ഷകരുള്ള പരീക്ഷയായത് കൊണ്ട് പ്രവേശിപ്പിക്കാന് കഴിയുന്നതിന് അപ്പുറത്തേക്ക് അപേക്ഷകര് വന്നാല് ഓണ്ലൈന് എക്സാം വഴിയോ കേരള സംസ്ഥാന യുവജനക്ഷേമ ബോര്ഡ് തീരുമാനിക്കുന്ന മറ്റ് സ്ക്രീനിംഗ് വഴിയോ പങ്കെടുക്കേണ്ടവരെ തെരഞ്ഞെടുക്കുന്നതാണ്. വിവരങ്ങള് http://www.ksywb.kerala.gov.in/ എന്ന വെബ്സെറ്റില് ലഭ്യമാണ്.
https://www.facebook.com/Malayalivartha
