മറ്റൊരുത്തനേം വിശ്വാസമില്ല... പൗരത്വഭേദഗതി നിയമത്തിനെതിരായ പ്രതിരോധത്തില് സുരേന്ദ്രന്റെ നേതൃത്വത്തില് നടന്ന സാമ്പിള് വെടിക്കെട്ട് ഫലം കണ്ടതോടെ സുരേന്ദ്രന് കൂടുതല് ഉത്തരവാദിത്തം നല്കി അമിത്ഷാ; പൗരത്വഭേദഗതി നിയമത്തില് പ്രതിപക്ഷ പ്രക്ഷോഭം ഒതുക്കാനുള്ള ചുമതല കെ സുരേന്ദ്രന്; ബിജെപി സംസ്ഥാന പ്രസിഡന്റെല്ലെങ്കില് ഉയര്ന്ന സ്ഥാനം
പൗരത്വഭേദഗതി നിയമത്തിനെതിരായ പ്രതിപക്ഷ പാര്ട്ടികളുടെ പ്രതിഷേധം തണുപ്പിക്കാന് ബിജെപി ദേശീയ അധ്യക്ഷന് അമിത്ഷായുടെ നേതൃത്വത്തില് തന്ത്രങ്ങളൊരുക്കി. ഇതിന്റെയടിസ്ഥാനത്തില് ഓരോ സംസ്ഥാനത്തും വേണ്ടി ഓരോ നേതാക്കളെയാണ് ചുമതലപ്പെടുത്തിയത്. കേരളത്തില് ഇതിനായി നറുക്ക് വീണിരിക്കുന്നത് ബിജെപി നേതാവ് കെ. സുരേന്ദ്രനേയാണ്. പ്രതിഷേധത്തിനെതിരായി സുരേന്ദ്രന്റെ നേതൃത്വത്തില് കേരളത്തില് നടന്ന സാമ്പിള് വെടിക്കെട്ട് ഫലം കണ്ട് വിഷയം വഴിമാറിയിരുന്നു. സിനിമാ താരങ്ങള് നടത്തിയ പ്രതിഷേധമാണ് സുരേന്ദ്രന്റെ നേതൃത്വത്തില് സന്ദീപ് വാര്യരും കുമ്മനവും കൂടി പ്രതിരോധിച്ചത്.
സിനിമാക്കാരില് ടാക്സ് നല്കാത്തവര് പിടിയിലായാല് പിന്നെ കുറ്റം പറയരുതെന്നാണ് സന്ദീപ് പറഞ്ഞത്. പിന്നാലെ സിനിമാക്കാരുടെ രാജ്യസ്നേഹം കുമ്മനം എടുത്തിട്ടു. സുരേന്ദ്രനാകട്ടെ സന്ദീപിന് പിന്തുണ നല്കുകയും സംസ്ഥാനം നിയമത്തിനെതിരെ എതിര്ത്താല് കേന്ദ്ര വിഹിതം അവതാളത്തിലാകുമെന്ന സൂചനയും നല്കി. സാമ്പത്തിക പ്രതിസന്ധിയില് ഉഴലുന്ന സര്ക്കാരിന്റെ അവസാന വര്ഷം പദ്ധതികള് പൂര്ത്തിയാക്കണമെങ്കില് കേന്ദ്ര സഹായം വേണം. സംസ്ഥാനത്തെ മിക്കവാറും ജനക്ഷേമ പദ്ധതികള് 60 ശതമാനവും കേന്ദ്രമാണ് വഹിക്കുന്നത്. അത് നിന്നാല് തന്നെ ജനം വെറുത്തോളും. ഇത് സര്ക്കാരിനേയും പാര്ട്ടിയേയും പ്രതിരേധത്തിലാക്കുന്നുണ്ട്. ഈ ഘട്ടത്തിലാണ് സുരേന്ദ്രന്റെ സാമ്പിള് വെടിക്കെട്ടിന്റെ വിജയം.
ഇതോടെ ആര്.എസ്.എസും നിലപാട് മാറ്റിയിട്ടുണ്ട്. ബി.ജെ.പി. സംസ്ഥാന പ്രസിഡന്റിനെ ബി.ജെ.പി. തന്നെ നിശ്ചയിക്കട്ടെയെന്നും കെ. സുരേന്ദ്രന്റെ പേര് ഉയരുകയാണെങ്കില് എതിര്ക്കേണ്ടെന്നും ആര്.എസ്.എസ്. തീരുമാനം. പൗരത്വ ഭേദഗതി നിയമത്തില് പ്രതിപക്ഷ പ്രചാരണം ചെറുക്കാനുള്ള നടപടികളുടെ ഏകോപനച്ചുമതല സുരേന്ദ്രനു നല്കുകയും ചെയ്തു. സംസ്ഥാന അധ്യക്ഷന്റെ കസേര ഒഴിഞ്ഞുകിടക്കുന്നത് പ്രതിരോധത്തിന്റെ കരുത്തുകുറച്ച സാഹചര്യത്തിലാണു സുരേന്ദ്രനെ ചുമതലയേല്പ്പിച്ചത്.
നാളെ മുതല് മൂന്നു ദിവസം ജില്ലാ തലങ്ങളില് പൊതുയോഗങ്ങള് സംഘടിപ്പിച്ച് തുടക്കമിടുന്ന പ്രചാരണ പ്രവര്ത്തനങ്ങളാണ് സുരേന്ദ്രന് ഏകോപിപ്പിക്കേണ്ടത്. യുവമോര്ച്ച സംസ്ഥാന പ്രസിഡന്റ് അഡ്വ. കെ.പി. പ്രകാശ്ബാബു, പട്ടികജാതി മോര്ച്ച സംസ്ഥാന പ്രസിഡന്റ് സുധീര്, പാര്ട്ടി വക്താവ് എ. ഗോപാലകൃഷ്ണന്, അഡ്വ. ജയസൂര്യന് എന്നിവരാണ് ഏകോപന സമിതി അംഗങ്ങള്.
തുടര്ന്ന് മണ്ഡലാടിസ്ഥാനത്തില് 150 കുടുംബയോഗങ്ങള് സംഘടിപ്പിച്ച് പ്രചാരണം ശക്തമാക്കാനും ആര്.എസ്.എസിന്റെ നിര്ദേശപ്രകാരം ചേര്ന്ന ഉന്നതതലയോഗം തീരുമാനിച്ചു.തമിഴിെശെ സുന്ദര്രാജനു ഗവര്ണര് സ്ഥാനം ലഭിച്ചതോടെ തമിഴ്നാട്ടിലും നിയമസഭാ തെരഞ്ഞെടുപ്പു തോല്വിക്കു പിന്നാലെ സുഖ്റാം ഓറോണ് രാജിവച്ച ഒഴിവില് ഝാര്ഖണ്ഡിലും പുതിയ സംസ്ഥാന പ്രസിഡന്റിനെ കണ്ടെത്തണം. അതിനൊപ്പം കേരളത്തിലെ അധ്യക്ഷനെയും പ്രഖ്യാപിക്കാനാണു നീക്കം.
മിസോറം ഗവര്ണര് സ്ഥാനം രാജിവച്ചെത്തിയ കുമ്മനം രാജശേഖരനെ വീണ്ടും അധ്യക്ഷനാക്കണമെന്ന ആര്.എസ്.എസിന്റെ ആവശ്യത്തോടു ബി.ജെ.പി. കേന്ദ്ര നേതൃത്വം താല്പ്പര്യം പ്രകടിപ്പിച്ചില്ല. പാര്ട്ടിയെ നയിക്കുന്നതില് കുമ്മനം പരാജയപ്പെട്ടെന്നു വിലയിരുത്തിയ ബി.എല്. സന്തോഷാണ് നിലവില് ബി.ജെ.പി. കേന്ദ്ര സംഘടനാ സെക്രട്ടറി. ഗവര്ണറായിരുന്ന കുമ്മനം വീണ്ടും സംസ്ഥാന അധ്യക്ഷസ്ഥാനം ഏറ്റെടുക്കുന്നതിനോടു സംഘടനയില് ഭിന്നാഭിപ്രായവും ഉയര്ന്നതോടെയാണ് ആര്.എസ്.എസ്. നേതൃത്വം പിന്മാറിയത്. നേരത്തേ സുരേന്ദ്രനെ എതിര്ത്തപ്പോഴുണ്ടായിരുന്ന സാഹചര്യം മാറിയെന്നും തങ്ങള് നിര്ദേശിച്ച കുമ്മനത്തിനും തുടര്ന്നു പി.എസ്. ശ്രീധരന്പിള്ളയ്ക്കും രാഷ്ട്രീയ സാഹചര്യങ്ങളിലെ അനുകൂല കാലാവസ്ഥ പ്രയോജനപ്പെടുത്താന് സാധിച്ചില്ലെന്നും വിലയിരുത്തിക്കൂടിയാണു പിന്മാറ്റം.
കുമ്മനത്തിനും സംസ്ഥാന ജനറല് സെക്രട്ടറി ശോഭാ സുരേന്ദ്രനും ദേശീയ നേതൃത്വത്തില് സ്ഥാനം പരിഗണനയിലുണ്ട്. സംസ്ഥാന സംഘടനാ സെക്രട്ടറി എം. ഗണേഷിനെതിരേ വ്യാപക പരാതി ഉയര്ന്ന സാഹചര്യത്തില് അദ്ദേഹത്തെ തിരിച്ചുവിളിക്കാനും ആലോചിക്കുന്നുണ്ട്.
https://www.facebook.com/Malayalivartha
