കലിയുഗവരദനായ അയ്യപ്പന്റെ അപാരശക്തി ഭക്തര്‍ക്ക് ഒരിക്കല്‍ കൂടി ബോധ്യപ്പെടുകയാണ്. കഴിഞ്ഞവര്‍ഷം ഇതേ സമയം സംഘര്‍ഷം നിറഞ്ഞതായിരുന്നു ശബരിമല. ഇപ്പോഴാകട്ടെ ഒരു യുവതിയേയും കയറ്റാന്‍ പാര്‍ട്ടിയോ സര്‍ക്കാരോ പോലീസോ പിന്തുണ നല്‍കുന്നില്ല. അതോടെ ഒരു യുവതി പോലും ശബരിമലയില്‍ കയറാന്‍ രംഗത്ത് വന്നതുമില്ല. ഫലമോ ശബരിമലയുടെ യശസ് ഉയര്‍ന്നു. ഭക്തര്‍ ശബരിമലയിലേക്ക് ഒഴുകി. സര്‍ക്കാരിനാകട്ടെ കണ്‍നിറയെ വരുമാനവും.

അങ്ങനെ 41 ദിവസത്തെ വ്രതാനുഷ്ഠാനങ്ങള്‍ പൂര്‍ത്തിയാക്കി മണ്ഡലകാലത്തിന് ഇന്ന് സമാപനമാകുകയാണ്. രാവിലെ പത്തിനും പതിനൊന്നേ നാല്‍പതിനും ഇടയിലാണ് മണ്ഡലപൂജ. പുലര്‍ച്ചെ മൂന്ന് മണിയോടെ ക്ഷേത്രനട തുറന്നു. തങ്ക അങ്കി ചാര്‍ത്തിയുള്ള അയ്യപ്പനെ ദര്‍ശിക്കാന്‍ ആയിരകണക്കിന് തീര്‍ഥാടകരാണ് സന്നിധാനത്തേക്ക് എത്തിക്കൊണ്ടിരിക്കുന്നത്.

അതേസമയം ശബരിമല ദര്‍ശനത്തിനെത്തിയ ട്രാന്‍സ്ജണ്ടറുകളെ പമ്പയില്‍ പൊലീസ് തടഞ്ഞതായി പരാതിയുണ്ട്. അവന്തിക, രഞ്ജു, തൃപ്തി എന്നിവരെയാണ് തടഞ്ഞത്. ജില്ലാ കളക്ടര്‍ ഇപെട്ട് ഇവരെ ശബരിമലയിലേക്ക് കടത്തിവിട്ടു. ട്രാന്‍സ്‌ജെന്‍ഡര്‍മാരെ കയറ്റുന്നതില്‍ വിരോധമില്ലെന്ന് നേരത്തെ ശബരിമല തന്ത്രി വ്യക്തമാക്കിയതിനാല്‍ കാര്യമായ പ്രതിഷേധം ഉണ്ടായില്ല.

അതേസമയം ശബരിമലയില്‍ തീര്‍ത്ഥാടക പ്രവാഹത്തിനൊപ്പം വരവിലും വന്‍ വര്‍ധനവാണുണ്ടായത്. മണ്ഡലകാലം വെള്ളിയാഴ്ച തീരാനിരിക്കെ, 39 ദിവസത്തെ വരവ് 156.60 കോടി രൂപയാണെന്ന് ദേവസ്വം ബോര്‍ഡ് പ്രസിഡന്റ് അഡ്വ. എന്‍.വാസു പറഞ്ഞു. നാണയങ്ങള്‍ എണ്ണാതെയാണിത്. തിരുപ്പതി മാതൃകയില്‍ നാണയങ്ങള്‍ എണ്ണാന്‍ കഴിഞ്ഞദിവസമാണ് അനുമതി ലഭിച്ചത്. പ്രാഥമിക കണക്കില്‍ ഏഴു കോടിക്ക് മുകളില്‍ നാണയങ്ങള്‍ ഉണ്ട്. നാണയങ്ങള്‍ എണ്ണിത്തിട്ടപ്പെടുത്തുമ്പോള്‍ ഈ വര്‍ഷത്തെ വരവ് റെക്കോഡിലെത്തുമെന്നാണ് സൂചന.

ശബരിമലയുടെ ചരിത്രത്തിലെ ഏറ്റവും ഉയര്‍ന്ന വരവ് 2017ലായിരുന്നു. മണ്ഡലകാലത്തെ ആദ്യ 39 ദിവസത്തെ വരവ് അന്ന് 164 കോടി ആയിരുന്നു. കഴിഞ്ഞ വര്‍ഷം 105 കോടിയും.

ഇത്തവണ അരവണ നല്‍കിയ വകയിലാണ് ഏറ്റവും കൂടുതല്‍ വരവ്. 67.76 കോടി രൂപ. കഴിഞ്ഞ വര്‍ഷം 40.98 കോടിയാണ് കിട്ടിയത്. കാണിക്ക ഇത്തവണ 53.14 കോടിയാണ്. കഴിഞ്ഞ വര്‍ഷം 42 കോടി ആയിരുന്നു. ഈ വര്‍ഷം അപ്പം നല്‍കിയതില്‍ ഒന്‍പത് കോടി കിട്ടിയപ്പോള്‍ മുന്‍ വര്‍ഷം 3.8 കോടി ആയിരുന്നു. വഴിപാടുകളുടെ കണക്കിലും വരവ് കൂടി.

ഇതുവരെ 33 ലക്ഷം തീര്‍ത്ഥാടകര്‍ വന്നതായാണ് കണക്ക്. കഴിഞ്ഞ മൂന്നുദിവസം ഉണ്ടായ വലിയ തിരക്ക് നിയന്ത്രിക്കാന്‍ പോലീസ് കൊണ്ടുവന്ന നിയന്ത്രണം ഭക്തര്‍ക്ക് പ്രയാസങ്ങള്‍ ഉണ്ടാക്കിയെന്ന പരാതികളുണ്ടെന്ന് ദേവസ്വം ബോര്‍ഡ് പ്രസിഡന്റ് പറഞ്ഞു. വണ്ടികള്‍ ഇടത്താവളങ്ങളില്‍ തടയുന്നത് പതിവാണ്. പക്ഷേ, ഭക്തര്‍ക്ക് ഭക്ഷണവും മറ്റും കിട്ടുന്ന സ്ഥലങ്ങളില്‍ മാത്രമേ വണ്ടികള്‍ തടയാവൂ. ഇക്കാര്യം പോലീസിനെ അറിയിച്ചിട്ടുണ്ട്. ആരെങ്കിലും വീഴ്ചകള്‍ വരുത്തിയതായി തെളിഞ്ഞാല്‍ നടപടി എടുക്കാമെന്ന് പോലീസ് അറിയിച്ചതായും പ്രസിഡന്റ് വ്യക്തമാക്കി.

ശബരിമല സുരക്ഷയ്ക്ക് പോലീസ് നടപ്പാക്കുന്ന പദ്ധതികള്‍ ബോര്‍ഡുമായി മുന്‍കൂട്ടി ചര്‍ച്ച ചെയ്യണമെന്നും ആവശ്യപ്പെട്ടിട്ടുണ്ട്. മകരവിളക്ക് മുന്നില്‍കണ്ട് അരവണ, അപ്പം എന്നിവ ആവശ്യത്തിന് സംഭരിക്കും. 15 ലക്ഷം ടിന്‍ അരവണ കരുതല്‍ ശേഖരമായി ഉണ്ടാവും. അങ്ങനെ സമാധാന പൂര്‍ണമായ മണ്ഡല വിളക്കിനാണ് ഇന്ന് സമാപനമാകുന്നത്. ഇതോടെ ഭക്തരുടെ കണ്ണ് നിറയുകയാണ്. അവര്‍ കണ്ഠനമിടറി ശരണം വിളിക്കുകയാണ്. സ്വാമിയേ ശരണമയ്യപ്പാ...